Read Chothe Naga JOHON 19 Bible Online

JOHON 19 - Chothe Naga bible

JOHON 19

¹Hanapa chu Pilat na Jisu ta laweta phit pi so weh.

²Hana ralmee ngei na aling abak thou wa lubur sam weta aluwa burpi ae; hana punsanko paipi ae.

³Hana makolla wa weta rille, “Sotta ringsu oh Jahudi ngei Reng!” manina wa weta beng so weh.

⁴Pilat na woiha shukweta abom ngeihata rille, “Anno keina amota angnei kolla rui shuk weta ripiange hana kei amota that rang diekno tukpha nonge.”

⁵Chuna Jisuna aling lubur bura, Punsan paiya shuk so weh. Pilatna manita rille. “Amo! Apaha hina amso weh!”

⁶Chungtikti thimpu khachu mokna innhak ngeina amota riyuiya manina aowe, “Aban yamweta thatto! aban yamwet that to!” Pilat na manita rille, “Nangeina amota ruiweta hata aban yamma amota thatta keina amota thatrang roulam tuk nonge.”

⁷Meebom ngeina hita sanglesir ae, “Kani rouphun kha ame, hana anu jui ah amo ha thitphung shuk kae, roulam chu amona athei chakka Chungthieng sanao ingeta rille.”

⁸Pilatna nahi theiyuiya, amoha ati lelsowe.

⁹Amona woiha insunga lut sir weta Jisuta saiye, “Nang hoi thou phao che?” chuti weta Jisuna sangno ae.

¹⁰Pilat na amota rilsir ae, “Kaninga nang tong ang niyo chame? keina nangta hla rang khachu thatrang ae nea ha kakut chung ame tiha dang ngo.”

¹¹Jisuna sange, “Nangna kachunga ae nea na amha Chungthieng pekke. Chuna sarukka keita nakut chung pe mee hana alella yai sitekke”

¹²Pilatna rou theiyui ah, Jisuta hla hourang lam yo nge. Chuti weta meebom ngeihana leya aosirae, “Nangna amota hla hou lea chu, nang keisar tronpini yo ae! atuyong Reng chang numle Keisar chunga rouril num ma ae!”

¹³Pilat na, na rongei hi theiyuiya, Jisu ta awao ah rui shuk weta. “Ongna alung” ti routreem ngei ongna hana ongpi so weh. (Ebriya tonga chu hi aming hi, “Gabbatha” ti-ae.)

¹⁴Hana nahi alalpi reen hana mating akha chu nishun pouyai pha hangso weh. Pilat na mee ngeita rille, “Hina nangei Reng ha amsowe!”

¹⁵Manina leya aolha ae, “Amota thatto! Amota thatto! Amota aban yama thatto!” Pilat na manita sai, “Keina ngei reng hata aban yama thatha dit chou?” Chungtekti thimpuna sange, “Kani rengchu Keisar chakke!”

¹⁶Chuna Pilat na Jisuta thatranga manita pesowe. Chuna manina Jisuta thatranga ruisowe.

¹⁷Amona mathitrang Kross ronna shukka “Lukuk ti amum pha so weh,” (Ebriya na chu “Golgotha” ta kokke.)

¹⁸Hana manina amota aban yamma thatsowe; manina adang apa aniko nak khating khatinga Jisuna ayai dongweta aban yamma thatte.

¹⁹Pilatna tonglam akha Kross luwang chung tarre. Hana mayik tonglam chu hi ae, “Nazareth ta Jisu Jihudi ngei Rengpa.”

²⁰Mee atampana na ayikha pa home roulam chu Jisuta thatna anun ha hupi hei thou aram lano ae. tongshan ha Ebriya, latin akha chu Grik tonga yikke.

²¹Chungtekti thimpuna Pilatta rille, “Nang na ‘Jihudi ngei Rengpa’ ae ta jiek no oh, chuti ang saruk chu ‘apa hina kei Jihudi ngei Reng ingeta rillea ta jiek ko.’ ”

²²Pilatna sange, “Keina kajieksa chu jieksa so ae.”

²³Ralmee ngei hana Jisuta thatsu nutinga, manina mapun mani ha atum inli shukka sammeh, ralmee chang honna tum akha akha change. Manina aphotna lam amno linglut achul hako lal weta,

²⁴Ralmee mani makhei, kha lea kha rillhakke; “Hichu therno eiyo; ani sung atuna changmo rawan anhlakei-oh.” Hi mani ae hi Athieng abai sunga jiekka houphur ha diekka shuk ranga ae: “Manina kapun kadir mani mahei sam lhakange akhako kalinglut achul manina rawan anhlakange.” Himak hi ralmee ngeina aephur ha.

²⁵Manu, ma-ou, Chlopas hina ammei Mathy, akha chu Madalini Jisu Kross kolla naiya ngir ae.

²⁶Jisuna manu akha chu malungsit arui ngeina hana ngira amha ri so weh; hana amona manuta rille, “Amo nasa nao pa ae.”

²⁷Hana amona ma-rui ngeita rille, “Amoha nangei nu ae.” Apha hana thouwa arui ngei amota ma-inna amharang rui so weh.

²⁸Atunchu Jisuna ngamlim suhap so weta danga; athieng abai sunga ril shuk ranga, “Kei tuiralsange,” ta rille.

²⁹Amunt hana athur na sihakti bel akha ameh, changpan asung tulweta, tongka thun weta ma-mura thunkalle.

³⁰Jisuna athur tuiha inweta rille, “Susinge,” hana chu amona alu bu weta thiso.

³¹Chuna Irai ni rukni sarukka, mani kross chunga solhakni phao am norang mani ke ha hrim weta choi tum ranga Jihudi ngeina Pilatta niye. Roulam chu solhakni hi athieng rungni ae.

³²Chuna sarukka ralmee ngeina wawete Jisu itta thiha apa ani hana ke ha rhim so weh.

³³Hana Jisu ke hrimang wakjui ah Jisuchu thihak tipachu manina hrim niyowe.

³⁴Chutiweta ralmee akhana Jisu nakka sei hoh ae, hati inlen athi akha chu tui lunga shuk kae.

³⁵(Hita shuk ri mee akhana rilphure, chuti lea chu nangei ko ngoiring ange. Maril ha adiekke, ‘Khachu amona matong hi adiekke ti dange.’)

³⁶Maram chu, “Jisu saru akhaphao tikkang no ae,” Athieng abai sunga rilha tung ranga hita shukka ae.

³⁷Hana adang abai akha na hita rille, “Meengeina nakka hoo amota anange.”

³⁸Hina anutinga, Arimethia Josep na Jisu pum phum ranga Pilatta niye. (Josep hi Jisu nutinga aruwa jui mee ae, maram chu amona Jehudi ngei ane angam ngeita ati yarra.) Pilatna amota apum ranga ngaipi so weh. Chuna Josep na choiya thing so weh.

³⁹Jisuta yinting akha rilhak thing phurpa Nikodim ko Josep itta thingha ae, maminga aman tam ariemhoi tang somthum, khachu myrrh lea aloe choiya thinge.

⁴⁰Hita ae ah manina Jisu pumha Jehudi ngei alam nu jui ah phum ranga ariem hoi choiya akha chu aman tam pun ah lhum so weh.

⁴¹Jisuta thatna amunt kolhana mahun akha ame, hana sunga atu akha phao phum no the lhan akha ammeh.

⁴²Nahi Solhakni rukni mating ah sarukka, akha na lhanna naiya amsarukka, Jisu ha hana phum so weh.