Read Chothe Naga JOHON 2 Bible Online

JOHON 2 - Chothe Naga bible

JOHON 2

¹Rungnie nani waitakka Galily sunga Kana hulokka athieng nuhla ammeh Jisu manu kom hana am tol ae,

²hana Jisu akha chu marui ngei ta kom luhongna ah manita kom kokke.

³Darkha tui ha thanghap ti pa chu, Jisu manu na amota rille, “Mani darkha tui am nijo weh.”

⁴Jisu na sange, “Nangna ka ae angha rillanga a-no ae,” “Ka ae-ang aphaha atun pha no songe.”

⁵Chuna Jisu manu na asuuk ngeita rille, “Maril eheilimpa nangeina ae-oh.”

⁶Jehudi ngei talit tamang anu juija alung bel akhana tui litres riha chal alok aruk mani na shil tengrang doija shi ae.

⁷Jisu na shuk ngeita ril, “Na tuibel ngei hi tui shi hak ti pi oh.” Mani na bel amai phao shihak ti pi so ae.

⁸Hana amo na manita rille, “Atun chu tui ahre shukka lah weta abak a inn ron na am pa kolla choija thingo.” Mani na tui ha shukjuija.

⁹Atun chu darkha tui wulso ae hana amo na chihou an so ae. Amona na darkha tui hi hoitienga thou phao mo dangno ae (chuti weta tui shukka am arui hana chu dange.) Chuna amo na taichang angpa ta kokka.

¹⁰Makolla rille, “Masha a meelimta hra tekti darkha tui nangna samso che hana nutienga kom athui hrit ti hra akha sampi che ae chuti weta atun phao sunga ehekta hra darkha tui lim ma am songe!”

¹¹Jisu na ahalpa anealah tullu hi Galily ah Kana luhonga ripi ae. Hana amo na mahung majai ha mari pi juija marui ngei na amota ngoiring thou so ae.

¹²Hina nutienga Jisu hina manu manao akha chu marui ngeina kapharnahum ma thing weta rungnie atite am thinge.

¹³Lanpina na Reen apha naija wa sou chu Jisu na Jerushalem tinga thinge.

¹⁴Athieng inn sunga sum jurra am ngei kelmo jur ngei paipi jurngei hana sum chui kui ngei ejana na am amo na tuk hlakke.

¹⁵Chuna amona ruija rul mol sem weta athieng inn awao ah sum kelmo ngei ta julla wa ae hana sum chui kui ngei doukang kom achung athui letta sum chui ngei bun na chok chai so ae.

¹⁶Hana amo na paipi jurra am apa ta rille, “Hina hei thou wa choija shuk jou oh! Kapa inn hi kaithiel kal na neinou-oh.”

¹⁷Marui ngei na jieksa rou ha angei thei ae, “Oh, Chungthieng na inn sunga kamokhi sarmei hekta keita kange.”

¹⁸Jehudi ane angam ngeina sangveta rou saiye. “Nangna na tullu na lu hi aephung shukketa kani kolla eyongpa anealah ae weta mune ang chame?”

¹⁹Jisu na sange, “Na athieng inn hi nangei na hri hou-oh hana keina rungnie nathum nie a woiha lea a sha sir nea ange.”

²⁰“Nangna rungnie nathum nie ah woiha lea ah sha sir nea ange!” Mani na amota rille, “Nahi akum somli aruk lutta shak athieng inn ae!”

²¹Chutiveta athieng inn ta Jisu tronga am hi chu mapum hata ril na sa ae.

²²Chuna amo na athi hai thou wa ring thou juija marui ngei na na rou hi ae maril phur ta angei thei ae. Hana manina jieksha rou akha chu Jisu na rilphur ha ngoiringso.

²³Jisu na lanpina reen sunga Jerushalem ma, ma am leija angakpi maripi hata ri manina amota ngoiringso.

²⁴Chuti weta Jisu matakmakna chu mani ta ngoiring no ae, rouram chu amo na mani lim pa ta dange.

²⁵Hana atu akha na kom mani ha taranga makol rourillang am no ae, rouram chu amo matakmakna mani lungrang lim dange.