Read Chothe Naga JOHON 20 Bible Online

JOHON 20 - Chothe Naga bible

JOHON 20

¹Solhakni inthou huwar maah Madalini Mary na lhankunga thinge, hana lhan maiah dolla si alungha honga amha riso.

²Amona entinga tanna leweta Simon Pitar akha chu adang arui Jisuna lungsit manita rilsowe, “Manina Rengta lhansung hei thouwa choi thing so weh, hana hoiya siyomo kanina dangpha niyo onge!”

³Hanapa chu Pitar akha chu adang rui hana lhankunga thingso ae.

⁴Manui aniha ranga tanna thinge, chuti weta adang rui hana Piterta lella tanna lhankunga amona ma-sa-a tungso ae.

⁵Amona unna anyuiya alhumna punha ri-ae, chuti weta asunga chu amo lutno ae.

⁶Manutinga Simon Pitar tungso, hana amona yangbakta lhankung sunga lutsowe. Amona alhumna punha lhum ma amha riphure.

⁷Hana Jisu lu lhumna punhachu apum lhumna pun kolla amno ae chuti weta athei chakka kulla ame.

⁸Lhankunga masa-a lung aruihako asunga lutso ae, akha chu amoko ngoiringso ae.

⁹(Manina athieng abaisunga rilphur ha amona athi heithouwa ringthou angetihi lunga lungkimno ae.)

¹⁰Chuna arui ngeihana intinga leso-ae.

¹¹Mary na lhan awao-a tappa amleiya, anona lham sunga birra thirre.

¹²Wanrui anina awar pen dir aeweta Jisuna yalphurna a akhana aluchung, akhana kekunga onga amha ripha so ae.

¹³“Namei ije sarukka tappa ama che?” manina amota saiye. amona sange, “manina ka Rengha choiya thing so weh, chuna manina hoiya simo keina dangpha ni ange.

¹⁴Chuna amona heile a anyuiya Jisu hana ngira am ri so weh; chuti weta amona Jisu makke tihi dangno ae.

¹⁵“Namei nang eye sarukka tappa ama che?” Jisuna amota rille, “Atuta nang na yonga cha meh?” Mary na amohi mahun aepa ha rangeta halla amo na makolla rille, “Nangna amota la ah houtale, kakolla naha rilpi oh hana keina thing inge ae ta amota lathing tikke.”

¹⁶Jisuna makolla rille, “Mary!” Mary na maning tinga heiweta, Ebriya tonga rille, “Rabboni!” (Tichu “chupipa.”)

¹⁷“Keita onoh oh,” Jisuna makolla rille, “Roulam chu kei atun kapa kolla thing no song inge. Chuna ka-u-kanao ngei kolla thingchaweta kei kapa akha chu nangei pa, kapa Chungthieng akha chu nangei Chungthieng kolla lesier ange ta rilthing oh.”

¹⁸Chutipachu Mary Madalini na thing weta arui ngeita keina arengpu amota rishing: akha chu Jisuna maing nga ril mahei amona sui thing so weh.

¹⁹Solhakni atai nietak phayui, arui ngeina Jehudi ane angam ngeit atit yarra manina inn sunga innkal kal weta amleiya. Jisuna lut weta mani karra ngir weta, “Adai ha nangei kolla amsu oh” ta amona rille.

²⁰Hi rou rilsu in len, amona makut akha chu manak ha manita ripi ae. Arui ngeiha Rengta riyuiya ariemna siso ae.

²¹Jisuna manita leya rilsir ae, “Adai ha nangei kolla amsu-oh. Kapana keita lha hekta, nangeita ko keina lha inge.”

²²Hana amona hukthal manichung sem weta rille, “Athieng Muilha ha pha au-oh.

²³Nangei na mee ngei pak kokpi lechu mani ha kokpiso ae; nangei na manita kokpi nole, maniha kokniyo ae.”

²⁴Arui asomani sunga akha, Thoma (Abor tako kok) ha Jisu phaolei amochu mani itta amha phurno ae.

²⁵Chuna adang rui ngeina makolla rille, “Kanina Rengha risonge!” Thoma na manita rille, “Keina makutta thir ame kakutta thamalim khachu anakka kakutta tham malim kei ngoiring ang nonge.”

²⁶Rukni sari nutinga arui ngeina leya insunga bomma amlei, Thoma kom mani itta amha ae. Inn harha kalle, chuti weta Jisuna lut weta mani karra ngir weta rille, “Adai ha nangei kolla amsu oh.”

²⁷Hana amona Thoma ta rille, “Nakut chalha hina si oh; hana kakut hi anno; akhako nakutha yam chaweta kanakka thunno, nalung tinno ae no sa-oh ngoiring oh!”

²⁸Thoma na makolla sange, “Ka Rengpa khachu ka Chungthieng.”

²⁹Jisuna makolla rille, “Keita risarukka nangna ngoiring yo ah che? Eya ah yairha ah meh keita rino lutta ngoiringei ha!”

³⁰Jisuna aruingei maikunga anealah tullu eya ma lu phur hi Abai sunga yikno iya amsonge.

³¹Chuti weta Jisu chu Chungthieng sanaopa Messiya aeta nangeina ngoiring ranga, akha chu nangeina amota ngoiring jarra. Nangei ha aring pha ang ae.