Read Chothe Naga JOHON 21 Bible Online

JOHON 21 - Chothe Naga bible

JOHON 21

¹Hina nutinga, Jisuna woiha leya Tiberi Tuipi kolla arui ngeita ripisir ae. Hana amona manita ripi.

²Simon Pitar, Thoma (Abor takok), Nathanel (Galily sung Caana thou phaopa), Zebedi sanaoparel, Jisu rui adang ani, hit manilim tulla amlei,

³Simon Pitar na adangei ta rille, “Kei tuirik manthing angsinge.” “Kani ko nanu jui ange,” manina makolla rille. chuna manilim kung akha chunga thing so weh, chuti weta zinting huwar phao manina ekhaphao mant no ae.

⁴Ni shukka hang jui ah, Jisuna tuihou ah ngirre, chuti weta arui ngeina chu Jisu ae ta dang phano ae.

⁵Hana amona manita saiye, “Unga ngei oh, nangei e akha phao mant no chou meh?” akha phao mamonge, manina sange.

⁶Amona manita rille, “Nangeina lenha kung changting nakka yunno, hana ahre mant ang chou ae.” Chuna manina len ha yun so weh, hana tuirik tamma mant na len he kaine niyo ae.

⁷Jisu na lungsit arui Pitar ta rille, “Hichu Rengpa ha ae!” Pitar na Rengpa ae ta theiyuiya, amona malinglut achulha lahou weta (tichu amona malinglut ha lip so.) tuisung chomma lut so weh.

⁸Adang rui ngeiko kungha chung weta tuihouwa tuirik na sihakti lenha kaiya wa-ae. Maniha kangpal pharang aram laniyowe, lam riha chak so weh.

⁹Manina kang palla tungle, manina meihol tungpi weta achunga turik roh ah am akha chu batol ahre amha manina riso ae.

¹⁰Jisuna manita rille, “Atuna nangei mant tuirik ahre choiya shukko.”

¹¹Simon Pitar na thing weta tuirik alok na sihakti lenha kaiya wa ae, tuirik limha tuljuiya riha lea somnga inthum shuk kae; haya tam yuihalko lenha itephao titno ae.

¹²Jisuna manita rille, “Bakwa aowo.” Arui atu akha phaona amota, “Nang atu ah che meh?” ta saino ae roulam chu manina Renge ta dange.

¹³Chuna Jisu na wa weta, batol laweta manita pe ae, tuirik ha ko laweta chuhekta ae so ae.

¹⁴Chuna hi Jisuna athi hei thouwa ring thouwa amona aruingeita woithum su ah ripi so ae.

¹⁵Manina baksulen, Jisu na Piter ta rille, “Simon Johon sanao pa, nangna hi adangei lungsitta lella keita lungsi cha meh?” “Oh ae, Rengo,” amon sange, “Keina nangta lungsi ae ti nangna dangche ae.” Jisuna amota rille, “Ka kelmo ha rhabakta anpi oh.”

¹⁶Woini lea ah Jisu na amota rille, “Simon, Johon sanaopa, nang kei ta lungsi cha meh?” “Oh ae, Rengo,” amona sange, “Keina nangta lungsi ti nangna nadang ha ae.” Jisu na amota rille, “Ka kelmo ngei ha rha bakta anpi oh.”

¹⁷Woithum shu ah Jisu na rille, “Simon, Johon sanaopa, nangna keita lugnsi cha meh?” Pitar ha alung olso ae, roulamchu Jisuna amota waithum, “Nangha keita lungsi cha meh?” ta saipachu. Chuna amona makolla rille, “Rengo, nang na ripta dang che ae; “Keina nangta lungsi ae ti nang dangche ae!” Jisuna amota rille, “Ka kelmo ngei ha rhabakta anpi oh.

¹⁸Keina naninga adiek ka rillinge: nangna naoponglei chu nangna konghit sui weta nathing num na ah thingche ae; chuti weta nangna ulien chang jui chu, nangna naban dokkang che ae hana atuyong ngeina nangta huppange hana nathing numlou amunt ah thingang che ae.”

¹⁹(Hita rilna chu Pitar anutinga mathitrang ha rilla ae.) Akha Chungtheing mahung pek ranga chuna Jisuna rille, “Kanu yui-oh.”

²⁰Pitar na heiya anyui ah manungting Jisu na lungsit arui abakleiya Jisu ta haiton weta, “Rengo, atuna nangta yurrang ae ah meh?” ta sai arui ha ammeh.

²¹Pitar na amota riyuiya, amona Jisu ta sai ae, “Reng, hi apa hi chu alo tiang meh?”

²²Jisu na maninga sange, “Keina amota kayung malim amhakko rille, nakolla inarillang am mameh? Kanu yuiyo!”

²³Chuna Jisu arui limngei na, Jisu arui ngei chu thiangno ah ata rouhi thei hom so weh. Chutiweta Jisu na chu amoha thi ang no ae ti ah no ae, amona maril chu, “Kei na kayung malim amona hakka amlea chu, nahana nakolla eshukka meh? tia ae.

²⁴Roulam ngeihi rilphur ae akha chu jiekka houphur aruiha hi ae, na majiek limhi adiekke ti anina dange.

²⁵Atun Jisuna aephur adang eya kon am meh. Halim ha akha akha jiek lea chu, simlei ram lima abai challang no ae ta ngai inge.