Read Chothe Naga JOHON 3 Bible Online

JOHON 3 - Chothe Naga bible

JOHON 3

¹Hana leiya Jehudi ngei lamkai amingna Nicodimas tipa amo ha chu Pharisi ngei abom sunga tol lea.

²Nahani jintienga amo na Jisu kolla thing weta rille, “Ocha, kani na nanghi Chungthieng na hla ocha akha ae ta dang unge atu akha na kom angakpi na lu tullu jongpa ae no ae Chungthieng na amo hitta am hano wa chu.”

³Jisu na sange, “Keina nakolla adiek rou rillinge atu akha na Chungthieng rengram ha ri ang no ae amona lea ah don nowa chu.”

⁴“Alota lokka hangsa mee na lea ah don sirrang meh?” Nicodimas na saiye, “Amo na manu von sunga lut weta woini suna pa don chu nea ang no ae!”

⁵“Keina nangei kolla adiek rou rillinge” Jisu na sange, “Atu akha na ko Chungthieng Rengram lut nea ang no weh amo na tui akha chu muihla athiengna don a no wa chu.

⁶Malmashi hi manumapa hei lhou wa don ae chuti weta amo ha chu muihla tienga muihla a don ae.

⁷Nangna ephao angak shukno oh keina nakolla tharra don oh karil sarukka.

⁸Thirangna madit na ram munt tieng range thinge nangna atarra chu theipha che ae chuti weta nangna hoitienga thou phao mo akha chu hoitienga thingmo chu dangno ae chu hekta. Muihla a don meelim ko hati sa ae.”

⁹“Nahi alo ta shuk kang meh?” Nicodemas na saiye.

¹⁰Jisu na sang. “Nanghi Isrel ngei alok ocha akha weta nangna na hi dangno wa che.”

¹¹Keina adiek rou nangei kolla rilla aminge kanina rilla am hi chu kani na dang akha chu kanina ripha ha thangkou wa unge chu phao sunga nangei akha phao na kani rouril ha lah num no chau ae.

¹²Nangei na keita ngoiring no che ae keina simlei chunga roulim karil juija ngoiring no weta alo ta keina thangwan rouramma karil juija ngoiring ang sha?

¹³Chuna atu akha na thungwan na kal thing no songe thang wanna thou jung meesanaopa amo ano wa.”

¹⁴Moses na ramrukka arul ta thing kathanga tar hekta meesanaopa ta kom tar ange.

¹⁵Chuna atujong akha na makolla ngoiring lim na samla ringchang pha ange.

¹⁶Chuna Chungthieng na simlei hita ehekta lungshi pi-ae hana jarra akha chak don amo na masanaopa ta pepi so ae. Chuna atujong meena amota ngoiring lea chu athi am no wa samla ringchang ha pha so ae.

¹⁷Chungthieng na asanaopa ta simlei ah hla hi routreem ae rang no ae chuti weta sanpi ranga ae.

¹⁸Atujongna meesanaopa ta ngoiring lea chu routreem ae ang no ae chuti weta ngoiring no mee amota chu routreem so ae rouram chu amona Chungthieng akha chak don asanao ta ngoiring no ae.

¹⁹Routreem ha chu hiti a-ae tichu. Simlei chunga awar hi tungso ae chuti weta malmashi ngei na chu awar ta hella athiem ta di tekke maram chu mani ae-ngam ahra tullu no ae.

²⁰Atujong akha na hrano tullu lu lea chu awar ta atir ae hana awar am na ah wanum no ae. Maram chu hrano tullu ma lu ha ri pi num no ae.

²¹Chuti weta atujong na adiek tullu lu lea chu amo na awar am na wa num ae maram chu ma lu tullu ha Chungthieng aril atrong jui ja ae ta awarna muh ranga sa ae.

²²Hina waitakka Jisu akha chu arui ngei na Judiya ram tienga thinga hana apha atante mani hitta am ha weta baptias ae pi so ae.

²³Johon na kom Aenon na baptias ae pi ah am meh Salim hai thou wa aram lah no ae, rouram chu amunt hana tui leima tam am jarra mee ngei makolla phao weta amona mani ta baptias ae pi ae.

²⁴(Nahi Johon ta ahungin sunga si matienga ae.)

²⁵Johon arui ahre na Jehudi akha kolla trong wuk hlakka thou so ae mani talit tamang anu jui ja kut silna maramma.

²⁶Chuna manina Johon am na thing weta ril, “Ocha, Jordon nasu tienga apa akha nanghitta am ha ma maramma naril phur ha angei thei che? amona atun baptias ae pi ah am meelim makolla thingso ae.”

²⁷Johon na sang, “Atu akha na Chungthieng na makolla pe a no wa chu ephao pha nea no ae.

²⁸Keichu Messiya ha anonge, chuti weta keita mamatienga hla a sa aeta karilphurha nangei natakna kataranga meelungir ano ah chou meh.

²⁹Taichang angnu taranga chu taichang angpa ae; chuna makolla ngirra marou ngai ah am luhonh angpa atronpi na masanrol theijuija eja ah ariem meh hina chu hekta keina kariem hi shi hakti so ae.

³⁰Amona lella loktekka hangange keina sintekta tumma jung ang ae.”

³¹Achungtieng hei thou phao amo hana eheilim chunga amona loktekke. Amo hana aleiram tienga lea chu amona alei ram taranga rou rillange. Chuti weta thungwan hei thou phao amo na ehei lim chunga ameh.

³²Amona mari akha chu mathei pha ha rilpi-ae, chu phao sunga atu akha na marou ril lah num no ae.

³³Chuti weta atujong na marouril lah lea chu Chungthieng hi adiek takke ta lingno wa am meh.

³⁴Chungthieng na hla atujong amona Chungthieng rou chak tronge rouram chu Chungthieng na machunga muihla shi hakta pe ae.

³⁵Mapana asanao pa ta lungshi ae chuna jarra eheilimpa makut chunga shi so ae.

³⁶Atujong na asanaopa ta ngoiring lea chu amo ha samla ringchang pha so ae. Chuti weta atu jongna aril jui nole chu amo na ringchang tukne ang no ae chuna Chungthieng a lei choiya am mange.