Read Chothe Naga JOHON 4 Bible Online

JOHON 4 - Chothe Naga bible

JOHON 4

¹Pharisis ngei na theipha so, Jisu na Johon ta hella baptias ae pi ah akha chu marui na tam tekkae ta.

²(Routakka chu Jisu matakmak na atu akha takom baptias ae pi no ae, marui ngei na ae pi sa ae.

³Chuna Jisu rouhi theijuija amo na Judiah houphur weta Galily ah lea so.

⁴Hana maleh na lampi hana amo hi Samariah samma thinga tah ae.

⁵Samariah sunga Sychar ti hulokka amo na pha so. Hana na ram ha chu Jacob na asanao Josep ta pek loupukha aram lah ni jo weh.

⁶Hana Jacob tuikung ammeh, mani thingna lamma Jisu ha olla tuikung hana onga solhla so. Naha chu niesoun tieng ti lei so ae.

⁷Samariah nameinu na tui shuk kanga wa ah, Jisu na makolla ril, “keita inn rang tui pepi oh.”

⁸(Marui ngei chu hulok hanna abak ranga lei thing hlakka am meh.)

⁹Nameinu na sange, “Nangchu Jew ae, hana kei chu Samariah inge, chuna sarukka alo ta nangna kakolla inn rang tui sai ah che?” (Jews ngei na Samariah ngei tuidon inn na inn no ae.)

¹⁰Jisu na sang, “Nangna Chungthieng na pek hi emo dang phurta lea akha chu nakolla inn rang tui nie mee ha atu meh ta dangphur ta lea chu, nang na nie phur anga ae, hana amo na nangta ringna tui pepi anga ae.”

¹¹Nameinu na ril, “Arengpu” “Nangna tuishuk na bartin kom am no wa hija thuk tuikung hi alota nangna ringna tui shuk weta pe ang che?

¹²Kani puthou Jacob na kani ta peksha tuikunge; Amo na kom hana asanao ngei akha chu majoksha ngei na kom hina inphur ae. Nangna Jacob ta hella loktekkae ta halla am ma che?”

¹³Jisu na sang, “Atujong akha na, na tuikung hina tui inn ngei na woiha lea ah tuiral sier ange.

¹⁴Chuti weta atujong meena kapek kang tui inn mee amo ha woiha lea ah tuiral am mang no ae. Hana makolla kapek kang tui ha chu tuiphut changa ringchanga tuiral am no wa akha chu samla ringchung pha ange.”

¹⁵Nameinu na ril, “Arengpu” “Keita na tui ha pepi oh! Chuleh chu woiha lea ah tuiral ka am no ranga hana keina na amunt hina lea ah tui shuk wak no ranga.”

¹⁶“Thing weta napishal kok thingo, hana hina lea sierro ta Jisu na makolla ril.”

¹⁷“Kei chu kapishal am nonge” ta nameinu na sang, “Kapishal am nonge ta naril rou ha leima adiekka ril so che. Jisu na sang.

¹⁸Nang chu napishal ranga shu so ae, hana atun nang hitta am ha spa ha napishal athieng ah no ae. Nangna naril ha adiek takkae.”

¹⁹Nameinu hana ril, “Keina arengpu ha ripha singe, nanghi thiempu ae.”

²⁰“Kani Samariah pa pu ngei na, na mullon hina Chungthieng ta mokkae, chuti weta Jews nangei na chu nangei Chungthieng hi Jerushalem ma mokkanga ae ti ae.”

²¹Jisu na namei ta ril, “Keita ngoiringo, namei nu, malmashi ngeina, na mullon ah hal Jerushalem ma hal mapata mok no rang apha phao ange.

²²Samariah nangei na nangei mokhi routakka atu kolla mok mo dangno chao ae; chuti weta Jews kanina atu kolla moksha ti hi dang unge, chuna sarukka aring kaetlo hi Jews hai thou wa phao ae.

²³Chuti weta apha hakom phao ange hana hina amsu hakso ae, hana Chungthieng muihla hina jaitha jarra malmashi ngeina mokkange mapa amo ha mak.

²⁴Chungthieng chu muihla ae, chuna ma muihla hana jaitha jarra chak malmashi ngei na amota mok kange adiek tolla.”

²⁵Nameinu na rille makolla, “Messiya jung ange ti ha keina dang inge hana majung juija amona eheilimpa kanita ril pi ange.”

²⁶Jisu na sang, “Amo ha kei inge, nang hitta tronga am ha kei inge.”

²⁷Hana apha makka Jisu rui ngei lea ah mani na leima tam angak shuk kae amona namei akha hitta tronga am tukhlak juija. Chuti hal kom mani kar sunga kom namei nuta ril no ae “ejongpa nadit am sa?” ano lea “elo sarukka nameinu ta trong hlakka am ma che takom makolla sai no ae?”

²⁸Hana nameina na matapot houphurra mani hulokka lea weta mani mee ngei kolla rou ril.

²⁹“Wa weta anno katullu lu eheilimpa ril nea spa akha amo hi Messiya kom ah ngei ae?”

³⁰Chunapa chu mani na mani hulok houphur weta Jisu am na thingso.

³¹Hana lei apha sunga marui ngei na Jisu kolla nie, ocha abak pot eyongpa akha bak ko.”

³²Chuti weta Jisu na sang, “Keina abak rang nangei danglao am minge.”

³³Chunapa chu marui ngei na mani thei chakka sai hlak thou so, “Atujong akha na tieng mabak rang choiya phao mee tol la mo?”

³⁴Jisu na manita ril, “kabu chu” keita hla amo hana mahal keita mapek tullu su pi weta aril jui ha ae.

³⁵Nangna chu hita rilleh, ‘Shangpottang hla li chak so weh,’ chuna keina nangei kolla rilla aminge nahong tou wa namit anno loupokka shang ha potta ngei hang so ae!

³⁶Muchi vorh pa lea shang pot pa na eya ah ariem ha angsa, shangpot pa na malom mant pha hana atreem neino wa ring ranga muchi ha homma shi ae.

³⁷Rilla am hi adiek tak ae, ‘spa akha na muchi vorh ae, adang akha na muchi lukke.’

³⁸Keina shang pottanga nangta hla singe natullu lu no na loupukka adangei kom tullu lu ah am meh hana nangna kom tullu na lu na lommant tok pha ange.”

³⁹Samariah hulokka am meelim pa na Jisu ta ngoiring ae, roulam chu hana nameina ril rou ha, “Amona ka tullu lu eheilimpa ha keita rilleh.”

⁴⁰Chuna Samariah ngeina Jisu kolla wa ae, mani na Jisu kolla mani hitta am ha ranga rilla Jisu na rungnie nanie am ha so ae.

⁴¹Marou ril hana nujuiya leima tam tekka ngoiringso.

⁴²Chuna mani na namei nu ta ril, “Narou ril sharukka kanina ngoiring ah no weh. Kani tak makna marou hi theipha sarukka ae hana kani na dang songe amo hi routakka simlei limpa ta sanpipa ae.

⁴³Jisu na rungnie nanie am ha su waitakka manita houphurra Galily ah thingso.

⁴⁴Amo matak makna ril, “Chungthieng rouril ngei hi aram mak ngei na ajak ati no ae.”

⁴⁵Amona Galily matungjuiya malmashi ngeina ariem lamtuk hakka am meh, roulam chu manina Jerushalem ma lanpina reen na mani thinglei ah reen sunga eheilimpa ma lu tullu ha mani na riphur so ae.

⁴⁶Hana amona Galily Kana ah lea so amunt hana ae tui ta dharkha wul pi na ha hana Government offisar sananao pa kom Kapharnahum ma ana ah am meh.

⁴⁷Amona Jisu hi Judiah ram hai thou wa Galily ah phao so ae ta mathei juiya, amona Jisu kolla thinge, Kapharnahum ma thing weta asanao pa thi ang ae am pa ta dampi ranga sai so.

⁴⁸Jisu na makolla ril, “Atu akha nakom angakpi anealah nangei na ri malim ma ngoiring no ae.”

⁴⁹Offisar pa na sang, “Arengpu, kasanao thit matienga kei hitta thingsui oh.”

⁵⁰Jisu na makolla ril, “Thing jou oh nasanaopa ha ring ang ae!” Spa hana Jisu rouha ngoiringa thingso.

⁵¹Ma inn lampi ah kor ngeina amota tukhlak wa ah routhar ha ril so, “Nasanaopa ha dam sho ae.”

⁵²Amona manita sai, “Eyongpa apha ah kasanaopa hratekka hang meh, mani na sange, ajan ni soun na atrun manockha dom ae apha na akha tah jui ja.”

⁵³Hana mapana angei thei so ha chu Jisu na makolla rilna apha makkha, “Nasanao pa ha ring ang ae.” Chunapa chu amo akha chu inn sung limpa na ngoiringso.

⁵⁴Judiah heithou ah Galily maphao ah Jisu na woinie sunapa anealah hi ae so.