Read Chothe Naga JOHON 5 Bible Online

JOHON 5 - Chothe Naga bible

JOHON 5

¹Hi waitakka Jisu na Jerushalem ma dramo reen sarukka thing so.

²Jerushalem ma kelmo sungkar am na ah tuikum akha am meh alutna ranga limpa hlumma shi ae Ebriya na chu nahi Bethsaida ta kokkae.

³Ahlutna ah kaettik mitcho, hana pum ahui athi sa wairul riha rai am malmashi ngei hana jalhlakka am meh.

⁴Ejong apha ah wanrui na tumma jung weta tuikum ma tui lingpi juija hana atujong akha na masha ah tui lingsu tukka katlo lea chu ejongpa rai hal kom ma-am rai ha dompi ae.

⁵Akum somthum arit ana ah am spa akha hana am meh.

⁶Jisuna jalla ma am ri ah akha chu amo na dangpha ae apha eja sotta amo hi ana pha ah am meh tah; chuna Jisu na amo ta sai. “Nangna adam pha num ma che?”

⁷Ana ah am spa na sang, “Arengpu, tuina ling juija keita lut pi ang mee kataranga atu akha am no ae; chuna keina lut ranga thou rang ka ae leija atu jong akha na masha chak ti ae.”

⁸Jisu na makolla ril, “Naphar choi weta thou wo, hana thingo.”

⁹Apha hana makka spa hana thou weta maphar ha choi weta thing thou so. Shukka am rungnie hi Sabbath nie ae.

¹⁰Chuna Jews ane angam ngeina spa hata atu na nangta dampi meh, “Rungnie hi sabbath ae chuna ani roukung ta ngeino tullu lu nangna phar choija rol hi.”

¹¹Amo na sange, “Keita dampi spa hana keita ril lea kaphar hi choiweta thingo.”

¹²Manina amota sai, “Atu meh spa ha nangta hi tullu lu oh ta ril mee ha?”

¹³Chutiweta adam pha spa hana chu Jisu atu meh ti dangno ae amunt hana wairul riha na amna Jisu chu shukka thingso ae.

¹⁴Hana nutienga Jisu na athieng inn sunga tuk hlakka ril, “Ano atun chu nang dam so ae; chuna pap tullu chan jou oh hella sathi rai nachunga shuk no ranga.”

¹⁵Hana spa hana thing weta Jewish ane angam ngei kolla ril so, “Keita dampi mee ha Jisu ae.”

¹⁶Chuna manina Jisu ta aol ana pe thou so. Rouram chu amona sabbath rungnie ah ana ta dampi ae.

¹⁷Jisu na sange manita, “Kapa na apha chang honna tullu lu ah am meh hana keina kom hahekta tullu lu tah ae.”

¹⁸Hina sarukka Jewish ane angam ngei na Jisu ta that ranga hella jong thou so, amona sabbath rungnie ah roukung anu juija kuipi chak ano wa Chungthieng ta kapa ae ta rilla, akha chu matak makhi Chungthieng hitta mana pe ae.

¹⁹Chuna Jisu na manita sang, “Keina nangei kolla adiek rou rillinge asanaopa na mathei chakka ephao ae nea no ae, ma lu tullu chu mapathieng na lu tullu mari ha chakkae, ejongpa mapathieng na lu tullu ha asanao pa na kom ae ah ae.

²⁰Hina rou ram chu mapa na asanaopa ta lungshit jarra matakmakna lu tullu ri pi ae. Amona hita hella alok tullu ta hella kom ae rang ri pi ange hana nangei na angak shukkange.

²¹Mapathieng na athi sa ngeita ringthou pi weta manita ringchang pekpi hekta asanao pana kom aring di ngei ta kom ringchang pe pi ae.

²²Mapathiengna chu atu akha ta routreem ae no ae. Amona asanaopata rou shu rang routreem ae nea rang pe so ae.

²³Chuna sarukka mapata meelim pa na ajak ati ae hekta asanaopa ta kom ajak ati anga ae, atu jongpa na asanaopa ta ajak ati no lea amota hla mapathieng ta kom ajak ati no ah ae.

²⁴“Keina nakolla adiek rou rilla aminge: atujong na karou theija akha chu keita hla amo ta ngoiring mee chu samla ringchang pha ange.

²⁵Keina nangei kolla adiek rou rillinge apha hi leima nei so ae. Apha ha chu tungso, athi sa ngei na Chungtheing sanaopa sarol thei rang, hana amona thei lea chu ringchang ha pha ange.

²⁶Mapa thiengna matak makka ring chan am chu hekta asanaopa kom makolla ringchang pe nea ae.

²⁷Hana amona asanaopa ta routreem ae nea rang jaitha kom pe so ae rouram chu amo ha meesanao pa ae.

²⁸Nahina sarukka angak shukno oh. Athi sa ngei na sanrol ha thei rang apha akha phao ange.

²⁹Hana mani hlanhur sunga thou wa shuk kange atujong ahra tullu lu ngeina hana ringthou wa aringpha ange. Hana atujong hrano tullu lu ngeikom ringthou weta amo ta chu aol pe ange.

³⁰“Keina kathei chakka ka nea ephou am nonge; routreem ka ae chu Chungthieng na keita ril ha chakkae, chuna karoutreem hi chu adiek chakkae rouram chu keina kadit hana ae rang kom am nange, chuna kei chu keita hla mee hana adit ha chak sa ae.

³¹Kei kathei chakna kataranga saro ei lea chu keina ril num minge amoha alakrang rou am no ae.

³²Chuti weta kasarukka saro ei mee am sharukka. Hana keina kom dang inge kata maram ma ma-ril ha adiek takkae.

³³Nangai makna Johan kolhai thou theipha so chou, akha chu amona adiek rou hana rou ril so.

³⁴Keina chu malmashi kolla kataranga saro ei mee lah ah nonge, chutichun nangei ta sanpi ranga keina rou hi ril singe.

³⁵Johon ha chu dewarkari si na chunga warra chak am ha ae chuna nangei na apha atan te taranga mamai kunga ariem ha di chao ae.

³⁶Chuti weta kei chu kasarukka soro ei Johon na pek saro ei ha ta hella alok am minge ka ae ah am tullu hi kapathiengna keita ae oh ta pek tullu lu hana makka keita hla ae ta karou hana saro am meh.

³⁷Keita hla pathiengna kom ka rou hana saro pe pi ae. Nangei na ephao ma sanrol hi theikom thei no songe hana mamai kom ri no songe.

³⁸Hana marouril kom nangei lungsunga shi no chao ae, hana nangei na mahla amo ta kom ngoiring no ae.

³⁹Nangei na jieksha rou ha Jong chao ae, chuna sharukka hana sunga nangei na samla ringchang pha ange ta hal chao ae! Akha chu kamaramma jieksha rou rilla shi hi, hi ae.

⁴⁰Chu phao sunga nangei na ringchang ha pha rang sarukka ka am na ah wa num no chao ae.

⁴¹Keina malmashi ngei na dom ma shi di nonge.

⁴²Chuti weta keina chu nangei hi ejongpa malmashi moti ha dang inge hana Chungthieng ta nangei lung sunga lungshit am no ae ti kom dang inge.

⁴³Kaphao hi kapathieng hina ane angam hita phao ha inge chuti weta nangei na kei ta lah num no ae; atujong akha na mathei chakka ane angam hitta phao hajui amo ta chu lah num meh.

⁴⁴Nangei na akha lea akha nangei mashel dom hlak di chau ae chuti weta nangei na Chungthieng athei chakna dom ranga ephao hot na no ae chuna sarukka alota nangei na keita ngoiring ang sha?

⁴⁵Keina nangei ta kapathieng am na ah aral nei nunt pe ange ta hal no oh, nangei na lungranga am Moses na tieng naral mei nunt pe ange.

⁴⁶Ejonga nangna routakka Moses ta ngoiring ta lea chu keitakom ngoiringo, rouram chu majiek rou ha karou ae.

⁴⁷Chuti weta nangei na majiekka shi ngoiring no am sou chu alo ta chu nangei na karilla am hi ngoiring ang sha?”