Read Chothe Naga JOHON 6 Bible Online

JOHON 6 - Chothe Naga bible

JOHON 6

¹Hina waitakka Jisu na Galily tuipi lalla thingso. (Tiberias tuipi ta kom kokkae.)

²Wairul riha na manutieng jui je, rouram chu mani na Jisu na angakpi ah rai eja ta madampi hana.

³Jisu na mullon na kalla arui ngei hitta thing weta ongso.

⁴Lanpina reen kom apha leima neija wa so ae.

⁵Jisu na ahul tunga an juija wairul riha na makolla wak ripha so. Chuna pa chu amo na phelip ta sai, “Hoija amunt na ani na hija tam mani bakpi rung lei thing ang meh?”

⁶(Marilla am hi Phelip ta chang an na routakka chu amo na ejongpa tullu lu ang sa dang su so ae.)

⁷Phelip na sang, “Na mani limpa hi na atan te hal kom chungsap ti ranga chu rupa rihanie ah budol na kom lei ja hop hlak kang no ae.”

⁸Adang marui Simon Pitar mata Andrew na ril,

⁹“Hina rungthar sanao te akha kolla budol ranga lea tuiriek ani chu am meh, chuti weta mani hija tam hina taranga chu hophlakkang no ae.”

¹⁰Jisu na manita ril, “Malmashi ngei ha ong ranga ae pi oh.” (Amunt hana tingthou leima am meh.) Hana ong malmashi ngei ha spa ngei chakka lasing ranga jongpa ae.

¹¹Jisu na budol lah weta Chungthieng kolla nie so, hana onga am malmashi ngei ta sam piso. Hana amo na tuiriek kom hahekta ae weta ma ngei na mani hop ma lim ma pe so.

¹²Mani na shihakti so nu ti juija Jisu na arui ngei ta ril, “Atan atun tulla am ngei ha rachon pi oh anina ariem salla houno ei oh.”

¹³Chunapa chu mani na ha lim pa ha rachon pi juija chu tai asom anie sunga shi so, malmashi ngei na budol baksu waitakka.

¹⁴Jisu na ri pi ah am angakpi ri veta malmashi ngeina ril, “Routakka simlei chunga jung ange ti Chungthieng rou phupa mee ha amo ange!”

¹⁵Jisu na dangpa so mani na makolla wa weta mani rengpa chang ranga amota mant nange ta; chuna amo na adang mullon thinga thing so.

¹⁶Nietak apha pha juija Jisu rui ngeina tuipi ah tumma jungso.

¹⁷Kung sunga lut weta kapharnahum tienga tuipi lalla thing so, jantieng pha wa so, Jisu chu mani am na phao no songe.

¹⁸Hana lei apha sunga ajap ahai hanga tuijul hella hangso.

¹⁹Arui ngeina kung holla thinga kilometres ranga aruk hai thou wa Jisu na tui sunga kal choi ja mani kung neija wak ripha so. Hana mani na tri thouso.

²⁰“Atri no oh,” kei inge ta Jisu na manita ril.

²¹Hana manina ariemma Jisu ta kung sunga rui lutpi weta apha hana makka mani kung ha mani tung rang amunt mani matienga tungso.

²²Hana huwar rungnie ah wairul riha tuipi aralla am na dangso, ha chu kung sanao akha chak am meh. Hana Jisu na marui ngei hitta thing ha no weta manina dangso. Arui ngei na amota houphurra thingso.

²³Adang kung akha kom Tiberias hai thou wa-ah tuipi ahou tungso Jisu na budol dom weta mani bakna amunt ha nei hlak so.

²⁴Wairul riha na Jisu akha chu arui ngei hana am no juija, manina hana am kung hana lut weta kapharnahum tienga Jisu ta jonga thingso.

²⁵Malmashi ngei na Jisu ta tuipi aralla mani tukhlak juija manina makolla ril, “Arengpu, etikka na amunt tunga che?”

²⁶Jisu na sange, “Keina adiek rou nangei kolla rillinge. Nangei na keita jonga rol hi, budol nangei bak sarukka akha chu nangei dit pha jarra ae aeneleh nangei na ri sarukka no ae.

²⁷Abak taranga tullu lu no oh hrano tah ange, hana hutta samla rinchung taranga tullu lu pa na sottek kange na abak hi ae, meesanaopa na pekkang ha, rouram chu pa Chungthieng na machunga shi angei ha ae.

²⁸Chuna mani na makolla sai, “Kani na e tullu lu anga meh Chungthieng na kanita dit tullu lu ang hi?

²⁹Jisu na sang, “Chungthieng na nangei ta adit tullu chu mahla mee hata ngoiring ha ae.

³⁰Mani na sang, “Ejongpa anealah kanita ri pi anga che, kani na naha ri weta nangta ngoiring ranga? Ejongpa ae ang che?

³¹Kani pi pu ngei na ramrukka Manna bakpha ae, jieksha rou na ril nujuija “Amo na thangwan hai thou badol bakranga pe ae.”

³²“Keina adiek rou nangei kolla rillinge.” Jisu naril, “Moses na nangei ta pek budol ha thangwan hai thou ah no ae; Ka pathieng na nangei ta pek budol ha chu athieng thangwan hai thou ae.

³³Chungthieng na pek budol ha chu thungwan hai thou wa tumma jung weta maringchang simlei taranga pekha ae?”

³⁴Manina makolla sai, “Arengpu,” “Kanita hajon budol ha apha chang honna pepi oh.”

³⁵Jisu na manita ril, “Ringchanghina budol ha kei inge.” “Atu motieng kakolla wa mee chu awon tam am mangno ae; keita ngoiring mee amo na tuiral ti kom am mang no ae.

³⁶Atun chu keina nangei kolla rilla aminge nangei, na keita ri so chau ae chuti weta ngoiring no chau ae.

³⁷Kapathiengna keita peksha nangei lim hi, ka kolla wa ange, ka-am na wa mee akha phao nutienga lea pi ang nonge.

³⁸Rouram chu thangwan hi thou wa kajung hi kahal ha ae ranga jung nonge, keita hla mee amo hana ahal ae ranga jung inge.

³⁹Akha chu keita hla amo hana ahal ha ah ae amona kakolla pek limhi akha phao mangpi ang nong ae, chuna sarukka keina atreem na rungnie ah mani lim pa ta ringa thou pi ah ringchang pe anga ae.

⁴⁰Hina rouram ma pathiengna dit meesanaopa ta ri meelim na amo ta ngoiring lea chu samla ringchang pha ange, hana keina mani ta atreem nie rungnie ah thoupi weta ringchang pa ange.”

⁴¹Malmashi ngeina amota ril hlak thou so, ha chu amo na rilleh, “Kei thangwan hai thou jung budol inge.”

⁴²Chuna manina ril, “Na spa hi Jisu no meh Josep sanao pa ha? Ani na mapa manu danga am weta alo ta amo atun thungwan haithou jung inge ta rilla meh?”

⁴³Jisu na manita ta ril, “Nangei thei chakka rilhlakka am ha chanjou oh.

⁴⁴Keita hla kapathiengna lamkaija wa ano wa chu atu akha na kom kakolla wa nea no ae hana keina amota atreem nie rungnie ah ringthou pi ange.

⁴⁵Rouphupa na jiekka shi so ae, ‘Chungthieng na meelimpa ta chupi ange.’ Hana kapa kol hai thou mee atujong lim akhana theija dang nakakolla wa ange.

⁴⁶Nahina rilna chu meelimpa na kapathieng ta ri so ae ti na ah no ae. Chuti weta Chungthieng kolla am amo na chak kapa ta ri pha ae.

⁴⁷Keina adiek rou nangei kolla rilla aminge, atu motieng ngoiring mee na samla ringchang pha ange.

⁴⁸Ringchang hina budol ha kei inge.

⁴⁹Napa napu ngei na ramrukka Manna bak phur ae, chuti weta mani ha thi ae.

⁵⁰Chuti weta thangwan hai thou jong budol bak mee chu lungshi thei ah athi am ang no ae.

⁵¹Thangwan hai thou jung aring budol ha kei inge ejong atujong akha na, na budol bak mee amo na atreem nei no wa ring ang ae, hana makolla kapekkang budol ha chu katak mak ae hana kapek hachu simleija aring pha range.”

⁵²Nahina mani karak sunga hella lungsha hlakka trong jethlak thou so. “Alota na spa hina matak ta abakranga ani ta pe ang sha?” Mani na sai.

⁵³Jisu na manita ril, “Keina adiek rou rillinge; ejonga nangei na katak akha chu meesanaopa hana athee inn no lea chu nang natakmakha ringchang pha ang no che.

⁵⁴Atujong akha na katak akha chu kathee inn meelim pa na samla ringchang pha ange hana atreem nie rungnie ah kei na ringchang pe ange.

⁵⁵Chuna katak ha chu routak budol ae hana routak inn ranga hachu kathee ae.

⁵⁶Atujong katak bakmee akha chu kathee inn mee amona kakolla ringe, hana keina kom makolla ring inge.

⁵⁷Aring pathiengna keita hla jarra keikom ring inge hana hekta atujong keita bak mee amo hakom kajarra aring pha ange.

⁵⁸Hina sarukka thangwan hai thou jung budol ha napa napu ngei na bak phur budol ano ae mani thit ha chu hana tujong na hi budol bak mee na atreem nei no wa aring pha ange.”

⁵⁹Jisu na, na hi Kapharnahum Synagogue sunga chupi takpi ae.

⁶⁰Manutieng jui meelim na rou hi thei weta ril, “Machupi hi leima akai ae atuna ngeine ang meh?”

⁶¹Manina ril shuk no hal, Jisu na mani lungsunga rillhlakka am dangpha ah manita ril, “Na hina ngeita akai shukpi ah mo ae?

⁶²Chu lea chu mee sanao pa na masha ah ma am na ah lea weta kal ri ta lou chu alo ta rillanga chau?

⁶³Ringchang pek ha chu Chungthieng muihla sa ae; malmashi jaitha chu areem sum lea, nakolla karil rou ha chu muihla akha chu naha aringe.

⁶⁴Chu phao sunga nangei na ngoiringno chao ae.” (Jisu na dange athou hai thou wa atu ngeina ngoiring ang no ngei, akha chu amota jurra hou ang akha ha ta.)

⁶⁵Hana amona hikom rilleh, “Hina sarukka atu akhana kom kapa hai thou wa pe ah no wa chu ka-am na ah wa nea ang no ae.”

⁶⁶Hina rou sarukka Jisu nutieng jui eja na nungtienga lea ah amo hitta anutieng chu thingha nea no ae.

⁶⁷Chuna sarukka amona marui asom anie ta sai, “Nangei na kom manihekta houphurra thingnum ma chou?”

⁶⁸Simon Pitar na makolla sang. “Arengpu kani chu atu hitta thing ha ang meh? Samla ringchan pe nea rou ha nakolla am ae. Nangna rou wa chu nangna samla ringchang pe angeti.

⁶⁹Atun chu kani na ngoiring shung ae akha chu nang hi athieng Chungthieng kol hai thou ah jung ae ti hi dang shonge.”

⁷⁰Jisu na sang, “Keina nangei asom anieta halla shuk no wa meh? chu phao sunga nangei sunga akha chu dijabol ae!”

⁷¹Marilla am hi Judas, Simon Iscariot sanao pa ta ae amo na arui asom anie sunga akha hal kom amona Jisu ta jurrange.