Read Chothe Naga JOHON 7 Bible Online

JOHON 7 - Chothe Naga bible

JOHON 7

¹Hina waitakka Jisu na Galily ah thingso; Jewish ane angam ngei na amota that rang ae ah am jarra, amona Judea ram tienga thing num no ae.

²Jew ngei tusang reen kom leima ngija wa so.

³Hana pachu Jisu uleh nao ngeina makolla ril, “Na amunt hi houphur weta Judiah ram tienga thingo. Chu lea chu nanutieng jui mee ngeina na ae ah am tullu limpa ri ange.

⁴Atu akha na aming thangpi num lea chu matullu ae thuppa shi no ae. Nangna na tullu lu ah na am hina simlei ram lim pana nata dang su oh!”

⁵(Ma-u-manao ngeina phao amota ngoiring no ae.)

⁶Jisu na manita ril, “Kataranga acha apha ha pha no songe, chuti weta nangei taranga chu apha changhonna acha ae.

⁷Nangei ta chu simleiram na anda no ae keita anda ah ae chunasarukka keina apha chang honna karilha malmashi ngei thabak hra no aeta ka ril shuk sharukka keita chin simlei malmashi ngei na chu anda ae.

⁸Nangei chu reen ha tol thingo, kei chu reen ha thing ang nonge rouram chu kataranga apha acha ha phao no songe.”

⁹Nahi ril weta, amona Galily ah am phur so weh.

¹⁰Ma-u-manao ngei na reen ha thingsu waitakka Jisu kom thingso, chituhalkom amo chu aruhan ta thinge phongsonga thingno ae.

¹¹Jewish ane angam ngei na chu amota anna rolla am hana reen sunga manina sai “Amo ha hoija am meh?”

¹²Mani wairul riha karsunga aru aru ah rilhlak so. Ahre na chu, “Amo hi ahra spa ae,” adang ahre na chu “hra no ae,” adang na chu, “Amona malmashi ngei ta lam diekno wa lamkai ae.”

¹³Chuti weta atu akha kom awau shukka trong no ae, rouram chu mani na Jewish aneangam ngei ta atri jarra.

¹⁴Reen ajai challa wakjuija Jisu na athieng inn sunga lut weta chupi takpi thou so.

¹⁵Jewish ane angam ngei na ehekta hliwir shukka ril, “Alo ta na spa hina hoija kom chu thing no weta hija danga am ma meh?”

¹⁶Jisu na sange, “kachupi ah am hi katak hei thou mak ah no ae, Nahi keita hla Chungthieng hai thou junge.

¹⁷Atujong na ae num lea Chungthieng na ejongpa di moti dang ange, hana ka chupi lim hi kom Chungthieng ningtieng hai thou mo anoleh kathei chakka ane ah moti dang ange.

¹⁸Malmashi akha na mathei chakka ane angam ma trongshuk chu amo na mahung majai ha mathei chakka pha num ma ae. Chuti weta atu jong amo ta hla mee taranga ahung majai am mee chu alung thieng ange hana makolla diekno ephao am mang no ae.

¹⁹Moses na nangeita roukung pe pa ha? Chutihalkom nangei akha phao na roukung anu jui no ae, alo sarukka nangei na keita that tang ae ah chau?”

²⁰Wairul riha hana sange “Atu na nangta that tang ae ah meh? Nalung sunga dijabol am meh!”

²¹Jisu na sange, “keina anealah akha ri pi lea chu nangei limpa na hliwir shuk kange.

²²Moses na nangei sanao asarh tan rang trongsan pe ae (hihi Moses thou ah no ae chuti weta pi pu thou ah ae) hana nangei sanaopa ngei asarhtan ha sabbath nie ah tan ae.

²³Ejonga apasanao te ngei asarhtan ha sabbath nie ah tan lea chu Moses hina roukung pek ha kuipi no wa, ejeranga keina sabbath rungnie ah malmashi ta kadampi juija nangei lungsha ah chau?

²⁴Malmashi mai an weta routreem no oh chuti weta adiek rou ha diekka routreem ae oh.”

²⁵Jerushalem ma am malmashi ahre na rilleh, “Ane angam rouron ngeina thattange ta jonga rol mee ha amo no meh?

²⁶Anno! Amo na meelim maikunga maril rou ha manina ephao makolla ril nea no ae. Mani na routakka amo hi Messiya ae ta danga meh?

²⁷Chuti weta Messiya na phao juija chu atu akha na amo hi hoitienga phao mo dang ang no ae, hana ani na dang ange na spa hi hoitinga phao sa.”

²⁸Jisu na athieng inn sunga machupi ah amleija amona arol ringa ril. “Nangei na routakka keita danga chau meh hana kei hoi thou wa phao sa ti hi? Kaphao hi kathei chakka ane angam ma phao nonge keita hla amo ha chu adiek mee ae nangei na chu anota dangno ae.

²⁹Chuti weta kei chu dang inge rouram chu kei hi makol hai thou phao inge hana ano na keita hla ae.

³⁰Chuna mani na amota mant rang hot na ae chuti weta atu akha na machunga aban dok shuk mee am no ae, rouram chu mata apha ha pha no songe.

³¹Chuti weta wairul riha na mee ejana amota ngoiringa mani na ril, “Messiya na phao jui amo na spa hitta hella anealah ae nea ang meh?

³²Wairul riha na Jisu hina rou ril hlak tronghlak ha Pharisis ngei na theipha ah manina chungtekti thiempu ngei hitta bomtol weta Jisu ta mant ranga ahak ngei ahre hlaso.

³³Jisu na ril, “Keina apha atan te sunga nangei hitta am ha ange hana waitakka chu, keita hla mee am na ah thing ange.

³⁴Nangei na keita jong ang chau, chuti weta nangei na keita tuk kang no chau, rouram chu ka am na ah nangei na chu thing nea ang no chau weh.”

³⁵Jewish ane angam ngei na mani mashel rilhlak so. “Anina jonga tukkang no na hoija amunt am ma-amo na thing anga meh? amona Grik hupi ah thing anga, ani mee ngei am na ah. Thingveta Greekta chupi takpi anga meh?

³⁶Maril ha anina amota jong rol ange, chuti weta amota chu tuk kang no ae hana ma am ang na amunt na ani na thing nea ang no ae ti chu eta rilna mo ae?”

³⁷Ehekta mara oi akha chu atreem nie reen rungnie ah Jisu na ngir thou weta sanrol shukka ril, “Atujong tuiral mee na ka am na ah wa weta inn wa oh.”

³⁸Jieksha rou hana ril ae, “Atujong mee na keita ngoiring lea chu ringchanga pek tuichier ha malunga bun pi ange.”

³⁹Jisu na muihla rou ha rille, atu motieng amota ngoiring mee na pha ange hanalei apha makka chu muihla hi pe no songe, rouram chu Jisu hi ahung ajai tolla ringthou no songe.

⁴⁰Wairul riha sunga hai thou wa malmashi ahrena hi rou hi thei pha ah rilleh “Na spa hi routakka Chungthieng rouphupa ae!”

⁴¹Adangei na ril, “Amo chu Messiya ae!” Chuti weta adangei na ril, “Messiya chu Galily hai thou wa phao ang no ae!

⁴²Jieksha rou na rilleh, Messiya chu Rengpa David ngei atu ate sunga Bethlehem ram ma don nange ti ae, David na am phur na hulokka.”

⁴³Chunapa chu mani wairul riha sunga Jisu hina rou wa ahran pha hlakso.

⁴⁴Ahre na chu amota mant num ae chuti weta atu akha na makut ta chu oh nea no ae.

⁴⁵Ahak ngei na lea juija chungtekti thiempa ngei lea Pharisis ngei na manita sai, “Alo wa nangei na amota rui ja phao no wa chau?”

⁴⁶Ahak ngei na sang, “Malmashi lim pa na spa trong hekta trongne no ae!”

⁴⁷Pharisis ngei na mani ta sai, “Nangei ta kom lam adanga ruijo meh?”

⁴⁸“Ane angam ngei kar sunga ano lea Pharisis ngei atu jong akha na amota ngoiring jou meh?

⁴⁹Na wairul riha na Moses hina roukung ha dang no ae chuna mani ha Chungtheing na sarkou tukka am meh!”

⁵⁰Pharisis sunga Nicodemus Jisu kolla thing weta amatienga anthing amo na adangei kolla ril.

⁵¹“Ani roukung anuting juija ani na ma lu tullu ejongpa mo tukhlak malim ma, akha chu kok weta marou thei malim chu amo ta neinunt pe ngei no ae.”

⁵²Manina sang, “hra so weh,” “Nangkom Galily hai thou wa cha mo ae? Jieksha rou jonga akha chu nangna tuk hlakkang no ae Galily hai thou wa thiempu akha phao shuk kang no ae.