Read Chothe Naga JOHON 8 Bible Online

JOHON 8 - Chothe Naga bible

JOHON 8

¹[Hana mani inn lam ma lea ah, Jisu na Olives mullon tienga thingso.

²Hana huwar nituk chama angal apha ah Jisu na athieng inn sunga lea so. Makolla meelim pana ahul tunga ongveta amona mani ta chupi takpi thou so.

³Roukung ocha ngei na akha chu Pharisis ngei na Simsi-bohron namei nu akha mani lim maikunga ruija wa weta ngirpi so.

⁴Manina Jisu kolla ril, “Ocha, na numei hi simsi-bohron ae leimakka kani na mant song ae.”

⁵Kani Moses roukunga chu hita trongsan pe ah shi ae, hijong namei ta chu alunga denga thatto ta chuna nangna chu alo ta ril num che?”

⁶Jisu ta changa mant nang na hi mani na ril ae chuna amota neinunt peak ranga chuti weta amona oun weta alei chung akut challa hita jiekso.

⁷Manina hata ngirra am weta makolla sai amona ngirthou weta amomakna manita ril, “Nangei kar sunga atujong pak am no akha na masha ah alung namei nu ta dengo.”

⁸Hana amona oun weta alei chunga jieksierso.

⁹Manina rou hi theijuija mani akha akha houphur ulien tek ti pa na masha Jisu chak am phur so. Hana nameinu ha chu hata ngirra am the songe.

¹⁰Amo matak makna ngir thou weta namei nuta ril, “Mani ha hoi ah thing so meh? Atu akha phou nanta neinunt pe ang amphur no meh?”

¹¹Namei nu na sang, “Arengpu atu akha phao am no ae “hra so ae.” Jisu naril, “Keina nangta ephao neinunt pe nonge, chuna thing jou oh chuti weta lea oh pak tullu lu no sa oh.”]

¹²Jisu na Pharisis ngei kolla woiha lea ah rilleh, “Kei hi simlei hina awar inge.” Amona ril, “Atu jongpa na kanutienga jui lea chu amo ha awar ringchang pha ange hana athiem thuija etik kom thing ang no ae.”

¹³Pharisis ngeina makolla ril, “Nangna nathei chak ka narou ah ril shuk che ae chuna narou ha na saro na ei ha adiek no ae.”

¹⁴Jisu na sange, “Ano ae,” “Kei na kathei chakka karou wa saro ei halling kom karil ha adiek takkae, rouram chu keina dang inge kei hi hoitienga thou phao sa hana hoitienga thing ang sha nangei na chu dang no ae kei hi hoi thou wa phao hana hoija thing ang sha.

¹⁵Nangei na pum ma an weta routreem ae chau ae kei chu atu akha ta kom routreem ae nonge.

¹⁶Chuti weta ejonga keina hajong routreem ae lea chu diekka ae ange rouram chu na ha kathei chakka ae ang nonge keita hla kapana ka-am na ah am tolae.

¹⁷Nangei roukunga chu hita jiekka shi ae, mee ani na saro eipi lea chu nangei na mani ril ha adiek so ae.

¹⁸Kathei chak ka rou ha kei na saro ei halling kom kapana karou wa amona saro ei pi ae.”

¹⁹Mani na sai amota, “Napa chu hoija am meh?” Jisu na sange, “Nangei na kapata kom keitakom dang no chau ae, ejonga nangei na keita dang ta lou chu kapa ta kom dang anga ae.”

²⁰Jisu na nalim pa hi athieng inn sunga pektheina upu am na amunt ka sunga chupi takpi halkom atu akha na amo ta mant no ae, rou ram chu mapha pha no sarukka.

²¹Woihapa Jisu na manita ril, “Keina kathing juija; nangei na keita jong ang chau ae, chuti weta nangei chu nangei pakka thi ange chuna nangei na kathingna ah nangei na thing nea ang no ae.”

²²Chunapa chu Jewish ane angam ngeina ril, “Amona rilleh ani na mathingna ah ani na thingne ang no ae. Hina rilna rou chu amo na mathei chakka that tikkae tina mo nu?”

²³Jisu na sange, “nangei chu, na simlei chunga mee ngei ae chuti weta kei chu achung tieng hai thou phao inge nangie chu na simlei chunga ae kei chu na simlei chunga nonge.

²⁴Nangei pak hana nangai thi ang chau ae ta keina nangei kolla ril no meh. Hana kei hi atu moti ngoiring no tlou chu nangei pak hana thi ang chau ae.”

²⁵Mani na makolla sai, “Nang chu atu ah cha meh?” Jisu na sang, “Keina nangei maikunga athou hai thou wa karilha.

²⁶Keina nangei kolla karilang leima tam am meh, nangei kolla hana taranga neinunt kapekkang am meh keita hla mee ha chu adiek takkae hana simlei mee ngeita ka rilhi makol hei thou wa athei ha chak ae.”

²⁷Jisuna mapa hana rouram ma manita rilla am meh ti hi sungjel thei no ae.

²⁸Chuna pa chu manita ril, “Meesanaopa ta dom shijuija nangeina dang ange kei hi atu mo; nangei na dang ang chau ae keina eikom kane matik ephao ae no ae tihi, chuti weta karil rou hi kapana keita rou chu ha chak rilla ae.

²⁹Hana keita hla amo ha kakolla am tolleh, amo na keita ka thei chakka houphur no ae rouram chu apha chang honna malunghop rang tullu chak lu inge.”

³⁰Jisu ril thei meelim na amota ngoiringe.

³¹Chuna Jisu atujong amota ngoiring mee ngei kolla ril, “Ejonga nangna kachupi kakakpi jui ta lea chu nanghi adiek takka karui ae.

³²Nangei na adiekha dang ange, hana adiek hana nangei ta arimshala hla pi ange.”

³³“Ani hi Abraham atu at-engie ae” mani na sang, “Hana ani na hoi ah kom meekor changna am no ae. Nangei ta hla pi ange ta marilna rou hi alo tina mo ae?”

³⁴Jisu na mani ta ril, “Keina adiek rou nangei kolla rillinge atujong akha na pakka am lea chu amo ha pak hana kor ae.

³⁵Kor hana ma am na inn sung hitta atreem nei no wa am ha ngei no ae chuti weta sanaopa chu atreem nei no wa am ha ange.

³⁶Ejonga sanaopa na nangeita arimshala hla pi lea chu nangei ha adiektakka arimshala hla pi so ae.

³⁷Keina dang inge nangei hi Abraham atu ate ngei ae ta, chu phao sunga nangei na keita that ranga hot na chao rouram chu nangei na ka chu pi katakpi ha lah num no ae.

³⁸Kapana keita ri pi ha keina ril singe hana nangei na kom napa na nangei kolla rilha ae oh.”

³⁹Manina sang, “Kani pa chu Abraham meh.” Jisu na sang, “Ejonga nangei na adiek takka Abraham sanao ngei lea chu nangei na ma ae hekta nangei kom ae oh.”

⁴⁰Eheilimpa ka tullu lu chu nangei kolla adiek rou rillanga ae keina Chungthieng hai thou wa theipha inge chu phao sunga nangei na keita that ranga hot na chao ae Abraham na chu hita eiko ae no ae!

⁴¹Nangei na lu tullu chu napa na kom hata ae sarukka ae manina sang. “Chungthieng amo chakkae kani pa ha chu. Hana kani hi adiek tak masanao unge.”

⁴²Jisu na manita sang, “Ejonga Chungthieng hi adiek takka nangei pa ah lea chu nangei na keita lungshi anga ae rouram chu kei hi Chungthieng kol hai thou phao inge hana atun keina hina am singe hina kaphao hi kathei chakka phao num ma phao nonge chuti weta keita amo na hla pi ae.

⁴³Alo sarukka nangei na karil rou hi song jel thei no wa chao? na hi nangei na karou ril hi hrabakta ngei thei no sarukka ae.

⁴⁴Nangei chu hrano dijabol sanao ngei ae, chuna nangei na napa na adit hana na juija thing num chao athou hai thou wa amo chu mee that mee ae hana makolla adiek ekom am no ae. Amo chu murthai mee ae hana marthui matrong juija mataranga chakkae amo chu murthai ngei lim hana mapa ae.

⁴⁵Chuna saruka keina nangei kolla adiekka karil juija nangei na keita ngoiring no ae.

⁴⁶Atu na nangei kar sunga keita pak nagam ae so ae ta takne ang meh? ejonga keina nagei kolla adiek karil jui hana allo ah keita ngoiring no chau meh?

⁴⁷Chungthieng ningtieng haithou phao ngei na marou ha ngei ae nangei chu Chungthieng hai thou wa ano sou chu nangei na ngeinum no ae.”

⁴⁸Manina Jisu ta sai, “kanina nangta Samariah akha chu nakolla dijabol am meh ta rilla chu anonge?”

⁴⁹Jisu na sang, “Kakolla dijabol am no ae.” “Keina kapata ajak atri inge chuti weta nangei na chu keita ajak atri no ae.

⁵⁰Keina kathei chakka ajak atri ranga jonga rol nange chuti weta atu mo akha na kataranga amona routreem ae pi ah jonga rolla am meh.

⁵¹Keina nangei kolla diekka rillinge; atujong akhana kachupi katakpi jui lea chu athi pha ang no ae.”

⁵²Manina makolla ril, “Atun chu kani na hrabak ta dang so ae nakolla dijabol am meh! Abraham kom thi ae hana Chungthieng rou phu ngei kom thi ae chu phao sunga nangna nachupi natakpi jui ngei chu athi ang no ae.

⁵³Kani pa Abraham athi hata nangna hella loktek ka che? hana Chungthieng rouphu maril ngei kom thi ae nangna alota nang chu alo ti inge ta halla che?”

⁵⁴Jisu na sang, “Ejonga kei na kathei chak taranga ajak atri ang lea hajong ajak atri ha chu ekom am no ae keita ajak atri ae amo ha keita ano ae kapata ae hana nangei na rilla am ha Chungthieng amo ta ae.

⁵⁵Nangeina amota ephao dang no ae chuti weta kei chu dang inge amo ta ejonga keina amota dang nonge ta rilleh chu keikom nangei hekta murthai mee ae chuti weta kei chu amota dang inge hana keina marou kom jui inge.

⁵⁶Nangei pa Abraham na kaphao ang apha hana taranga riem ma am meh, hanan mari jui ja leima tam ariem meh.”

⁵⁷Mani na Jisu kolla ril, “Nang chu akum som-nga kom ulien no weta nangna alota Abraham ta ri ah che?”

⁵⁸Jisu na sang, “Keina nangei kolla adiek rou rillinge” “Abraham pok matienga, ‘kei am phur singe.’ ”

⁵⁹Hanapa chu manina alung sarweta amota deng ang ae pa chu amo na bi weta athieng inn houphurra thing so.