Read Chothe Naga JOHON 9 Bible Online

JOHON 9 - Chothe Naga bible

JOHON 9

¹Jisu na hata mathing juija adon haithou wa amit cho spa akha ta riso.

²Marui na Jisu kolla sai, “Ocha atu pakka amo hi amit cho ah don na meh? Nahi mapakka mo ano lea manu mapa ngei pakka meh?”

³Jisu na sange, “Mamit cho hi ephao mapakka akha chu manu mapa pakka ah no ae. Mamit cho hi Chungthieng na mahung majai ha mee na dang ranga ae.

⁴Nahi ani na am lei lim chu anina hla amo mataranga ani na hata tullu lu ah am tah ae jantieng apha phao so ae atu akhana tullu lu ang no apha.

⁵Keina alei ramma ka-am lei lim chu keina aleiramma awar ha kei inge.”

⁶Nahi maril sutakka, Jisu na alei chunga achil shak weta amo na adur sem ma amo na adur ha mitcho spa mitta tai so.

⁷Hana amo na ril, “Siloam tuikum ma thing weta namai phi tingo.” (Siloam ril na chu “hla.”) Chuna na spa hana thinga, amei phi ah amit ri ah lea so.

⁸Ma inn-ning kolla am mee ngei nakom amo ta bunie mee ae ta ril phur ae malmashi ngei na sai, “Na spa hino meh ong weta sum nie pa ha?”

⁹Adangei na ril, “Amo ha ae” Chu ti weta adangeina ril “Amo ha no ae” amel malla sa ae.” Chunapa chu matak makna ril, “Spa ha kei inge.”

¹⁰“Alota nang atun chu ripha nea ah che ta?” mani na mokolla sai.

¹¹Amo na sang, “Jisu ti spa na adur sem weta kamitta tai pi ae, hana Siloam tuikum ma thing weta kamai phi thingo ta rilleh, hana keina thing weta kamai phi su inn len keina ripha singe.”

¹²“Amo ha hoija ammeh?” mani na sai, “Amo na sanga “kei dang nonge.”

¹³Hana mani amit cho houphur pa hata Pharisis ngei am na ah rui so.

¹⁴Jisu na adur sem weta mitcho pa ta dampi nie rungnie ha sabbath nie ae.

¹⁵Pharisis ngei na spa mitcho houphur pa ta sai, alo ta amo na amit ri ah meh, amona mani ta ril, “Amo na adur ahre lah weta kamitta taipi ae, hana kamai kaphi jui hana chu keina rine singe.”

¹⁶Adang Pharisis ngei na ril, “Na spa ha Chungthieng ningtieng hai thou ang no ae rouram chu amo na Sabbath hana rou jui no ae.” Chuti weta adang ahre na ril, “Alo ta chu pak chel mee akha na chu hijongpa anelah tullu lu nea anga meh?” Chuna mani kar sung abom adang adang shukso.

¹⁷Chunapa chu Pharisis ngei na woihapa lea ah spa hata sai sier so. “Hra so ae nangna namitcho hi madam pi ae ta ril ta lea chu nangna chu amo ta alo ta ril num ma che?” Amo na sange, “Amo chu Chungthieng rouphu mee ae.”

¹⁸Manu mapa ta kok ma limphao, manina spa ha mitcho houphur ae akha chu ri so ae ti hi manina ngoiring num no ae.

¹⁹Hana mani na sai, “Na hi nasanaopa mo ae? nangei na chu adon hai thou wa mitcho ae rilleh atun chu alo ta amo na ri ah meh?”

²⁰Manu mapana sange, “Kani na kani sanaopa ae tihi dang unge hana kani na adon hai thou wa mitcho ah don ae ta dang unge.

²¹Chuti weta kani na dangno chu alota amo na amit ri nea mo, hana atu na amota dampi mo chu kani na dang nonge amo ta sai oh, Amo ha ulien chang so ve amo na, nalim pha sang nea ange!”

²²Manu mapa na na rou ril hi, Jewish ane angam ngei ta atri jarra ae rouram chu atujong akha na Jisu ta Messiya ae ta ngoiring mee ano ah Synagogue sung hai thou aming kakka julla hla ange ta angei hlak am sa so ae.

²³Hana sarukka ae manu mapa na ril, “Amo ha ulien chang so ae makolla sai oh!”

²⁴Woinie sunapa ah mani na adon hai thou mitcho pa kokka lea weta sai, “Chungthieng maikunga saro ei ah adiek rou rillo! Kani na nangta dampi mee ha dang unge amo ha pakchel mee ae.”

²⁵“Kei na dang nonge ejonga amo hi pak chel mee mo mee no mo,” “Kadang akha chu am meh, kei hi mitcho mee inge chuti weta atun chu keina ri pha nea sange” ta ano na sang.

²⁶Mani na sai, “Alo ta amo na nangta aepe meh? “Alo ta amona namit acho ha dampi meh?”

²⁷Amo na sange, “Kei na nangei kolla ril su sange” “Hana nangei na ngeinum no ae, chuna alo sarukka woiha pa thei num ma chau? nangei tieng marui chang num ma chou meh?”

²⁸Mani na trongsi ah ril, “Nang chu hajong mee hana rui ae; chuti weta kani chu Moses nu jui mee unge.

²⁹Kani na dang unge Chungthieng na Moses tolla rou rilla hla ae, hana hajong spa ha chu kani na amo hi hoitieng hai thou phao mo phao dang nonge!”

³⁰Spa hana sange, “Ehekta angakpi ahno meh! nangei na amo hi hoitieng hai thou phao mo ti dang no hal amo na chu kei kamit ri pi ae!

³¹Kani na dang unge Chungthieng na pak chel ngei kok thei num no ae, hana Chungthieng chu amota ajak atri ah mok ngei ta rang chak ae pi ae.

³²Simlei hi athou hai thou wa atu akha na theipha no ae adon hai thou wa mitcho mee na ripha so ae ta.

³³Nahi Chungthieng ningtieng hai thou ano wa chu amo na hijongpa tullu lu nea ang no ae.”

³⁴Manina sang, “Nangchu adon hai thou wa pakchella lokka sai ah hange hativeta nangna kanita chupi takpi ang hotna am ma che?” Hana mani na Synagogue sung hai thou amota julla hla so ae.

³⁵Jisu na shukka am ngei theipha juija amona spa akha tukhlakka makolla sai, “Nangna meesanaopa ta ngoiringa che?”

³⁶Spa na sang, “Kaning nga rilpi oh amo atu meh Arengpu, chu lea chu keina amo ta ngoiring tik ae!”

³⁷Jisu na makolla ril, “Amota nang ri so che ae hana amo ha chu atun na nang hitta tronga am pa ha ae.”

³⁸Spa hana ril, “Jisu maikunga ahuk hrun weta kei na nangta ngoiring ing Arengpu!”

³⁹Jisu na ril, “Simlei chunga kaphao hi routreem ae ranga ae chuna mit cho ngei na ri nea ange hana amit ri ah am ngei na mitcho ange.”

⁴⁰Pharisis ahre hana am ha ah maril rou thei ngei na makolla sai, “Chuleh kani hi mitcho mee ae rilna mo?”

⁴¹Jisu na manita ril, “Ejonga nangei na mitcho lea chu nangei ha pak am no ae chuti weta atun nangei na mit ri unge ti sou chu nangei ha pak chella am mee ae.”