Read Chothe Naga RUIHNGEI TULLU 11 Bible Online

RUIHNGEI TULLU 11 - Chothe Naga bible

RUIHNGEI TULLU 11

¹Ahalsha rui lea Judiah ram shunga am adang ngoiring lim na jat adang ngei na kom Chungthieng rou hi lah so ae.

²Pitar na Jerushalem mathing jui ja asar tan na chetta choi ja am ngei na makolla jat adang ngei kom asar tan ranga makolla rouril ae.

³“Ashar tan lou jat adang ngei inn na nang na inntung nga mani hitta bakha enn ha che ae!”

⁴Chuna Pitar na mani maikunga makolla shuk ehei lim ha athou na hai thou wa ril shuk so.

⁵“Joppa hupi ah nie ah ka-am lei ah. Kei na ripha nea inge kari ha chu ejongpa alok che akha hekta wanthui kachal inly ah shi hakta tum ma junga kamai kunga ngir so ae.

⁶Keina nei ah wa weta ashunga ka-an jui ja asha anga, awon na lon na thing akha chu awa lim ripha ing nge.

⁷Hana keina sanrol akha keita rouril theipha inge, ‘Pitar thou oh, akha chu that weta bakko!’

⁸Chutiweta kei na rillinge, ‘Arengpu! bak nea ang nonge rouram chu thienglou amunt rak hi mahou sha ah kabau ah bak nonge.’

⁹Wanram tieng nga sarol hana woiha lea ah ril sier ae ‘Nang na eheilim hi thieng louae ta halla am no oh Chungthieng na thieng happi sha so ae.’

¹⁰Nahi woithum phao shuk phur ae atreem na ah chu eheilim ha wanram tieng nga choi ja kal so ae.

¹¹Apha hana makka Kaisariya hai thou wa spa inthum ka am na inn amunt na hla ah tung so ae.

¹²Muihla na mani hitta ariem ma thingha rang keita rouril ae Joppa ramma ngoiring aruk hi kei hitta munt ha ah kani na Kaisariya ah Kornolias inn na thing ha unge.

¹³Amo na ma inn shung nga wanrui na ngirra am weta alota rou ril mo ti ha kani ta ril. Maril rou chu Joppa ramma Simon Pitar am na ah mee hla oh.

¹⁴Amo na nangta rourillang nge marou hana nang akha chu nani inn sung lim na sanpi pha ange.

¹⁵Hana karou ril thou juija muihla athieng na mani chung nga jung nga athou na ah ani kolla ae chu hekta.

¹⁶Hana keina arengpa rouril ha angei thei inge, “Johon na tui shunga baptias ae pi so ae chuti weta nangei no muihla athieng hitta baptias ae ange.”

¹⁷Anita mapek hekta Chungthieng na jat adang ngei ta kom thieng nga pe so ae ani na arengpu Jisu khrista ta ngoiring juija chulea chu kei so ae Chungthiengta thing rang hot na am hi.

¹⁸Chuna mani na rou hi thei juija mani trong jetta am ha chan weta Chungthieng ta dom ma ril, “Chulea chu Chungthieng na jat adang ngei kolla kom lunghlong nga ring rang nga pe so ae!”

¹⁹Stephen ta that lei ah amunt aram adang danga rolla thing Phonishiah, Saipras, akha chu Antiok ka ngoiring ngei na chu Jihudi ngei kolla chak rouril ae.

²⁰Chutiweta adang ngoiring ngei Saipras ah mee ngei akha chu Seriny ngei na chu Antiok ka thingweta jat adang ngei kolla areng Jisu hina routhar ahra trongsan hi sui thing nge.

²¹Mani karra arengpu jaitha tolla malmashi eja na arengpu kolla hai lea ha ngoiring mee tam ma hang nge.

²²Jerushalem ma am abom na rou hi theipha ah mani na Antiok ram ma Barnabas ta hla so.

²³Matung juija Chungthieng na manita eja ah jaihra pe meh mari juija. Amona ariemma mani ta nie sier ae meelim na adiek ka ngoiring chetta arengpu kolla shilung lutto ta ril.

²⁴Barnabas hi ahra mee ae muihla athieng na shihakti akha chu ngoiring chetta mee sha ae Hana amona mee eja kom arengpu am na rui ah phao ae.

²⁵Hana Barnabas na Saul ta an rang nga Tarsus ah thing.

²⁶Amo na matukhlak juija Antiok ram ma amota rui ah phao ah, kumchuppa abom ngei ta tuk hlakka leima tam mee eja ta chu pi takpi. Antiok ka ngoiring ngei hi ae masha ah kok khristian.

²⁷Hana lei apha ah rouphu pa ahre na Jerushalem hai thou Antiok ka thing.

²⁸Mani kar shunga aming na Agabas na ngirthou weta muihla na jaitha peh ah aleiram lim hina butang jutang akal akha shukkange ta rouphu ae (Klaudias na mapu changa am lei ah.)

²⁹Arui ngeina roungir ha chu mani lim na eja phao mo mane mane ha Jihudiah ah am tonpi ngoiring ngei tarang-nga san na hla ae.

³⁰Mani na namak ae ah Barnabas lea Saul kut chung nga abom ngei tarang nga sumhrai ha thunna hla ae.