Read Chothe Naga RUIHNGEI TULLU 12 Bible Online

RUIHNGEI TULLU 12 - Chothe Naga bible

RUIHNGEI TULLU 12

¹Rengpa Herod na apha hina abom ngei kolla aol ana pe thou so ae.

²Amo na Jacob mata Johon ta champsai ah tanna that ae.

³Hana na lim hi Jihudi ngei na ri juija ariem meh ta madang pha ah. Pitar ta kom mant so weh (na hi chol tol lou budol reen shunga shuk sha ae.)

⁴Pitar ta mant shu takka raen - inn shung nga shi ah kachal inly ah maral mee ngei ta hakpi ah shi ae Herod hal chu lanpina reen tak ka meelim mai ah rui ah shukka chang ann num meh.

⁵Chuna Pitar na hatta raen inn shunga am lei ah, abom ngei na chu Chungthieng kolla shilung thieng nga matarang nga nie ah am meh.

⁶Herod na meelim maikung nga rui ah shuk ma jatieng nga Pitar hi hakka am ralmee ani maikung nga jalla am meh. Amo hi thirui takom ren na shi ae hana raen inn inhar kolla kom amota hakka am meh.

⁷Edang dang no wa arengpu wanrui mawar na shihakta warra ngirra am. Hana wanrui na Pitar lingchum ma thamp ma innhrang la pi ah ril, “Thou jou oh rang nga!” hana thirui ha kom Pitar kut chung nga thou tulla jung so.

⁸Hana wanrui na ril napun nani semma hung hup chung jou oh, Pitar na hamakhai ae so. Hana “wanrui na ril wa oh kanutieng jui oh.”

⁹Pitar na raen - inn shung haithou wa ephao dang no wa manutieng jui sho. Chutiweta mahalla chu mamang range ta halla am meh, wanrui na adiekka ae ah am tullu hi.

¹⁰Manui na masha innhar ah hakka am na hella thingso, hana ani su na pa kom, atreem na ah thirling har hupi thingna innhar tung nga. Inn har ha chu athei chakka hong nga manui na shukka thing so, manui na lamthuija thing nga edang dang no wa wanrui na amo ta hou phur so.

¹¹Pitar na makolla shukka am hi alo ti mo atun chu dangpha ah ril, “Atun chu kei na dang sangnge nahi adiek takkae! Herod hina mane akha chu Jihudi ngei na shukkang nga am hata hakka am eheilim hi Arengpu ma wanrui hla weta keita sanpi ah ae.”

¹²Nalim hi halla amo na Johon lea Mak manu Mary inn na meelim na rachun na nie na munt na thing so ae.

¹³Pitar na innhar awao tieng nga rei ah hla ah asuuknu aming na Rhoda na sang ang nga wa sho.

¹⁴Amo na Pitar sanrol hi dangpha ah ariem hai shulla inhar hong no lutta tanna lea so, akha chu Pitar awao wa ngirra am meh ta meelim ta dangpi so.

¹⁵Mani na amo ta ril, “Nang hi awet ae!” Chutiweta amo na adiek takkae ta kalla ril. Chunapa chu mani na sang, “Na hi mawan rui ange.”

¹⁶Hanalei sung phao Pitar na chu inn har rei ah am meh. Atreem na ah chu mani na innhar hong so. Achana mani na amo ta rijuija mani ha ngakhlak am so.

¹⁷Amo na mani ta makutta dai diek ta am rang rilla akha chu amo na alo ta arengpu na aral inn shung hai thou rui ah shuk mo tina hrabakta ril sho. “Jacob akha chu ngoiring mee ngei ta rilpi oh.” Hana amo na manita hou phur ra amunt adang nga shukka thing so.

¹⁸Inthou wa chu hakka am ral mee ngei kar shunga Pitar kolla shuk hina rou wa angakpi ah halla shuk nea ni jo ae.

¹⁹Herod na amo ta jong rang nga rilla mani na jong hal kom tuk pha nea no ae chuna pa chu ral mee ngei kolla Herod na rou sai ah athat rang rou peso. Hina waitakka Herod na Kaisariya akha chu Jihudia ram ma thing nga apha atante am thing nge.

²⁰Herod na Tyre akha chu Sidon na malmashi ngei ta leima lungsha ae chunapa chu mani na abom ma rilhlak thinge amo ta. Masha ah mani na inn hakpa Blastus ta bahap ta pi mee sha ae rouram chu amo na manita san pi rang nga. Hana mani na Herod am na thing nga adai lak pi rang nie ae rouram chu nani na abak ah enn lim reng ram hai thou wa pha ae.

²¹Ahal sha rungnie akha ah Herod na reng punchui dierchui seng nga reng phomlu ah ong nga meelim kolla rouril.

²²Mani na auw wa shukkae, “Nahi hlawang rol no meh, mee no ae.”

²³Apha hana makka wanrui na woiha chakka Herod ta tupi so ae, Rouram chu amo na Chungthieng ta ajak atri pe no sha rukka amo ha chongchal ngei na bakka thi so ae.

²⁴Chunalei shung nga Chungthieng marou chu atreem am no makhai sai ah thing nga hella hang nge.

²⁵Barnabas lea Saul kom Jerushalem ma manui tullu shu wa lea ah Johon Mak hitta rui ah lea ae.