Read Chothe Naga RUIHNGEI TULLU 13 Bible Online

RUIHNGEI TULLU 13 - Chothe Naga bible

RUIHNGEI TULLU 13

¹Antioch abom ah Thiempu ngei lea ocha ahre Barnabas, Simon (akokna chu ahang) Lucius (Cyrene haithou) Manaen (Herod hitta hang ha Govarnor ae.) akha chu Saul.

²Mani na bu hai weta areng pu tullu mani ae lei ah Muihla athieng na mani ta ril, “Barnabas lea Saul ha nangei am na thou hla oh, manui tullu lu rang keina manui ta kokka aminge.”

³Mani na bu haiweta nie na amunt hai thou wa manuita hla so ae.

⁴Muihla athieng na hla nujuija Barnabas lea Saul na Selucia ah thing so. Akha chu hana hai thou wa Cyprus tuijai ramkang phao tungso.

⁵Manui na Salamis ram tungjui ja manui na Synagoge shunga Chungthieng rouril ae. Manui na Johon Mak kom rui ae manui tullu ma san rang nga.

⁶Manina Paphos tuijai ramkang nga thingha ah Jihudi Bar-Jisu ta mitrang lak mee akha tukhlakkae amo chu keikom thiempu inge ta ril mee ae.

⁷Amo ha chu tuijai ramkang (tuijai mullon). Governor hina atonpi ae. Segius Paulus spa hi athei asing mee ae hana Governor na Barnabas lea Saul ta kom am na ah kokkae rouram chu amona Chungthieng rou ngeinum jarra

⁸Chutiweta meetrang lak Elymas (Grik minge.) na ngeipi num no ae rouram chu Governor hana ngoiring ha nulea ranga.

⁹Pol ae ta kom dang hlak Saul kom muihla athieng na shihakta mitrang lak mee kolla mun na an weta.

¹⁰Akha chu rouril, “Hrano sanao nang hi! Nanghi chu ahra eja lim hina anda mee ae, nang hi chu hrano eheilim hina shi hakti che ae, hana nang na arengpu adiek hana hai thou wa nulea rang hot na mee ae!

¹¹Chuna Arengpa kutna atun hi, na am na tum ma jung ang nge; Apha atan te shung nga nang na nisoun awar hi namit cho ah ri ang no che ae.” Hana makka Elymas mit ta athiem na wurra jung nga amo na atujong akha na amo ta akut oh pi weta lamkai rang jong thou so.

¹²Governor na shukka am hi mari juija amo na ngoiring so; rouram chu arengpu hina rouram ma chupi takpi hina amona kom ehakta angak shukkae.

¹³Pol akha chu atonpi ngei na Pamphyliah hupi ah Paphos hai thou Perga ah tui chunga phao ae. Hana Johon Mak ta houphur ra Jerushalem ma lea so.

¹⁴Mani na Perga haithou hata thing nga Antioch Pisidiya ah Sabbath ni ah tung nga Synagoge sungnga luttolla ong nga am meh.

¹⁵Moses hina pek roukung akha chu rouphu pa ngei na jieksha pat shu takka synagoge shung nga offisar na manita rouril hla ae, “Uleanao ngei oh, mee ngei taranga thanum thathou pi rang ejong rou am lea chu kani na nangai rouril di ung nge.”

¹⁶Hana Pol na ngirthou wa akut dom ma, rou ril thou so. “Israel akha chu jat adang lungshit tonpi ngei Chungthieng ta hina mokka am ngei oh karou hi thei pi oh!

¹⁷Israel ngei Chungthieng na ani pi pu ngei ta alok jaty akha sem phur ae Egypt pa hulang mee hekta mani na am lei ah. Chungthieng mane jaitha na Egypt hai thou wa rui ah shukka.

¹⁸Akha chu akum somly hi ramrukka amo na aol ana dongpi ae.

¹⁹Amo na Kanan ram ma jaty sari ta mang pi weta mamee ngei ta ram hana mitpu changpi ae.

²⁰Na lim hi akum rihaly lea som nga lutte: Hina waitakka chu Samuel rouphu pa pha malim chu mani ha routreem mitpu ta houphur ae.

²¹Chuna manina rengpa taranga Chungthieng kolla niekjuija Chungthieng na Benjamin sakai sunga Kish sanaopa Saul ta akum somly rengpa tarang nga pe pi ae.

²²Hina amota hou shu takka Chungthieng na mani taranga David ta reng changpi ae, Marou ah Chungthieng ril chu hi ae: Jesse sanaopa David ta keina rengpa tarang nga kadit sha ae spa hina keina kadit tullu ha amo na ae ang nge.

²³Jisu hi David atu ate hai thou jung nge makolla ae Chungthieng na masaro ei nu juija Israel ngei ta sanpi pa changpi ae.

²⁴Jisu na matullu thou ma ah, Johon na Israel mee ngei kolla nangei pak hai thou wa lea oh, hana baptias ae oh, ta mee ngei kolla rouril.

²⁵Johon na matullu shu ang nai ah wakjuija mee ngei kolla amo na sai, nangei na kei ta atu ae ta halla am chau? Kei hi nangei na hakka am mee ha nong nge. Amo ha chu kanutieng nga phao ange, kei chu machung honghup phao lippi ah matik cha nong nge.

²⁶Kalungshit Abraham tu te Israel ngei oh, akha chu Chungthieng ta hina mokka am jat adang ngei oh. Samla ringchang hi ani tarang nga ae ta rou hina ril sha so ae.

²⁷Jerushalem ma mee ngei lea lamkai ngei na chu amo hi sanpipa ae ta mani na dang pha no ae hana rouphu pa ngeina Sabbath rungnie chang honna pat ha adiek takka wakjuija kom mani na neinunt non na hla ae.

²⁸Hana mani na amo ta athit phao wa maral eja jong hal kom tukno wa Pilate kolla manina amo hi athat rang nga ril ae.

²⁹Jieksha rou na matarang nga eheilim pa ril shu takka khross chung nga thou lah ah tum ma hlan shung nga phom meh.

³⁰Chutiweta Chungthieng na chu rungnie nathum sunie ah athi hai thou ring pi ae.

³¹Hana amo na Galily hai thou Jerushalem phao ah amo hitta thing ha ngei mai ah mel muh ah rungnie atam pa na am phur ae. Atun hi mani na mataranga saro ei nea ang nga Israel ngei mai ah.

³²Chuna nangei tarang nga atun hi kani na ahra trongsan ronna phao unge ani pithou puthou ngei ta saro ei ah ma ae pi tullu ha atun kom ani tarang nga ae pi am meh. Jisu ringthou ringchang hina tu te mani tarang ani sunapa laabok ka jieksha hekta, ‘Nangei hi kasanao ae; awoni hai thou wa kei hi nangei pa sing.’

³³

³⁴Hi so ae Chungthieng ril athi hai thou ring pi ang nge hlan hur sung nga shotta am pi ang nong nge: ‘Kei na athup akha chu linglou jaihra pe ang nge David kolla kasaro ei sha so ae.’

³⁵Adang amunt na kom amo na rillea, ‘Hlan hur shunga nang na nasuuk athieng amota am pi ang no che.’

³⁶David na chu Chungthieng hina ahal hata hrabakta jui ae apha hana jui ja, mathit juija amo kom mapi mapu ngei hlan hur shunga apum ha tui ae.

³⁷Chutiweta Chungthieng na athi hai thou ringthou pi amo ta chu na hi shukpi no ae.

³⁸Kalungshit Israel ngei oh nangei ta kani dit chu, Jisu khrista majar ah pak lim sanpi na rou hi nangei kolla rilla am mung nge; chuna atu jong nu atu jongpa na amota ngoiring lea chu Moses roukung hana pak san nea no kom nangei pak hai thou san pi ang nge.

³⁹

⁴⁰Chuna hrabakta am mo, chu lea chu rouphu pa ngei na ril rou ha nangai kolla shukno shu oh.

⁴¹‘Anno, trongshi ril ngei oh,! Ngakka mang ang chao ae! Rouram chu kei na ejongpa tullu akha nangei tarang ae ang nge chuti weta nangei na ephao ngoiring ang no ae atujong akha na nangei kolla ril halkom!’ ”

⁴²Pol lea Barnabas na Synagoge houphura thingpa chu hana am malmashi ngei na mathang pa sabbath rungnie ah kom phou weta hina rouram hella manita rillang kok sier ae.

⁴³Mani bomtul shu waitakka Jihudya am Jihudi akha chu jat adang leimatam ngei na Pol Lea Barnabas nutieng nga juija, ahal sha rou ron rel na manita thanum thathou pi ah Chungthieng lungshit jarra ring rang rou rillea.

⁴⁴Mathangpa sabbath rungnie ah hulok hana am meelim pa na arengpu rou ril ngei ang nga phao ae.

⁴⁵Wairul riha mel hi Jihudi ngei na rijuija mani lungshung hi anar na shihakta Pol na ejong rou rilla am ma meh ta amota ajak pe ah trong jet hlakso.

⁴⁶Chutiweta Pol lea Barnabas na hella tieng ratta rou ril, “Chungthieng marou hi masha ah nangei kolla ril hi apeksha ae chuti weta nangei na la num no wa akha chu nangei na samla ringchang ta halnum no sou chu, kani na nangeita hou phurra jat adang ngei kolla thing ang nge.

⁴⁷Arengpu na kanita trongsan pek chu hi ae: ‘Kei na jat adang ngei tarang nga nanghi awar war pi singe chuna jarra simlei ram lim na sanpi pha shu oh.’ ”

⁴⁸Jat adang ngei na rou hi mathei juija, mani na ariem ma areng pu rouril lim hana tarang nga dommeh. Akha chu samla ringchang tarang nga ahalsha ngei na ngoiring so.

⁴⁹Arengpu marou hi hatieng nak ram lim ma thangso.

⁵⁰Chuna hana am Chungthieng ta ajak ati am nameinu ngei akha chu hupi ha lamkai ah am spa ngei ta Jihudi ngei na trong jet hlakka thou so. Mani na Pol lea Barnabas am na kolla aol ana pe ah mani ram hai thou julla hla so.

⁵¹Chuna pa chu ahalsha rui na mani kaebur ah wakphul tha houphurra Ikonium ma thing so.

⁵²Antiokka am ngoiring ngei na muihla athieng na shi hakta ariem meh.