Read Chothe Naga RUIHNGEI TULLU 19 Bible Online

RUIHNGEI TULLU 19 - Chothe Naga bible

RUIHNGEI TULLU 19

¹Apollo na Korenthiya ah am lei ah, Pol na mani ashung tieng lampi ah thing weta Ephesiya tung so ae, hana amona rui ahre tukkae.

²Hana amo na mani ta sai, “Nangei ngoiring shanu tieng nga nangei na muihla athieng ha pha chau mo ae?” “Kani na muihla athieng phao am meh ti thei no song nge,” ta mani na sang nge.

³Hana Pol na sai, “Hra so ae, chulea chu ejongpa ma-ong nga nangei na baptias ae chau mo ae?” mani na sang “Johon Baptias ae pi ha ae.”

⁴Pol na ril, “Johon na baptias ae pi chu Pak tullu lu ang nong nge ta ril ngei ae; hana amo na Israel mee ngeita ril, manu manutieng nga phao amo ta ngoiring ngo, amo ha chu Jisu ae.”

⁵Mani na, na hi thei pha juija arengpu Jisu minga mani na baptias ae so ae.

⁶Chuna pa chu Pol na mani chung nga akut shi lei ah muihla athieng na mani chungnga jung so. Hana mani na arul adanga trong, trong nga reru ril thou so, akha chu Chungthieng ril thou so.

⁷Mani ha spa asom ani jong pa ae.

⁸Pol na mani hitta hla thum am ha ah Synagog ka thing weta atri am no lutta Chungtheing rengram terang nga minna hal hlak pha ae.

⁹Chutiweta mani shung nga ahre na chu alung hirra ngoiring no ae, mani bomtul na shung nga mani ahre na chu hrano ril pa chu. Pol na mani ta hou phur ah ngoiring ngei ta rui ah thing nga rungnie chang honna Tyrannus inn lokka bomtulpi ah minna hal hlakkae.

¹⁰Na hi amo na kum ani hata ae ah Asia ram ma am meelim akha chu Jihudi hana jat adang ngei na arengpu rou theipha ae.

¹¹Chungthieng na mee na ae lou tullu anealah Pol ta ae pi ae.

¹²Mapun mani phao na kom ana asha akha chu rie rai eja takom dam pi ae. Hana hrano muihla ngei takom julla hla nea ae.

¹³Chuna pa chu Jihudi amunt aram dang no rolla am ngei na kom areng Jisu ming nga hrano muihla ta julla hou rang nga ril, mani rilna chu, “Keina trongsan pe ah am minge Jisu minga, Pol ril na chu hekta.”

¹⁴Chungtekti thiempu Sceva Jihudi sanao sari na tullu hi ae ah am meh.

¹⁵Chutiweta hrano muihla na mani ta ril, “Keina Jisu ta dang inge, akha chu Pol ta kom dang ing nge; chuti weta nangei chu atu chau mo ae?”

¹⁶Hrano muihla am spa na mani lim ta nea ah. Na inn hai thou wa apun ani therra akha chu alem akui shukka tanna thing so ae mani ha.

¹⁷Ephesiya ah am Jihudi lea jat adang ngei na rou hi thei pha pa chu, mani lim na atri na shihakti so ae, chuna pa chu arengpu Jisu ta, hella ajak atri pe sho ae.

¹⁸Leima tam ngoiring ngei na wairul riha na bomtul na munt na phao weta mani ae phur tullu lim ha ril shuk so.

¹⁹Hana mani kar shung nga doi ei tullu lu mee ngei na kom mani jieksha abai lim ron na phao weta wairul riha mai ah sarmai shung nga deng nga hou ae. Hana abai hina amant chu Rupa lishing som nga ae.

²⁰Arengpu jaitha hina jarra rouphom hi thang nga thing so ae aehan am no ah hana hella arat tul shuk so ae.

²¹Na lim hi shuk shu waitakka, Pol na alung ngir so, ha chu Mesedoniya lalla thing weta Akaiya tieng nga thingnga Jerushalem ma kalla hangso. “Hana katung shu juija” amona ril, “Rom ram kom an na houphur ang nge ta.”

²²Hana amo na Timothi lea Erastus amo ta sanna am ani ta na Mesedoniya ah hla so ae, hana lei shung nga amona Asia ram tieng nga apha hella tullu lu ah am.

²³Na lei shung hina so ae Ephesiya ah hella aol ana shukka am hi, Arengpa hina rouram ma.

²⁴Chuna sona sha pa Dematrius ti pa dijana hrai hru inn hekta sha weta akut akae athei eja ta tullu lu pi ah shi ae.

²⁵Amo na meelim ta kokka rachun pi ah akha chu tullu lu makhai akha chu hajong tullu lu meelim ta ril; “Anno na tullu hina ani na sum leima pha ae.

²⁶Chutiweta anno na spa Pol hina meelim ta nea ah Ephesiya akha Asia ram shung hina mee eja ta rui ah thing nga amo na ril ae kutta sem hraihru chu hraihru ano ae.

²⁷Ani tullu hi na tarang nga kom ahra shuk kang ni jo weh. Hana ani alok Artemis hraihru inn shakka shi ha kom kana no shukka wa ang so ae. Hana mahung majai kom hella thing ang ni jo weh Asia ram tieng nga simlei lim na mokka am na hi.

²⁸Na hi mani thei juija, mani na leima lungsha ah au wa thou so ae “Ephesiya hina loktekti Artemis ae.”

²⁹Mani au sanrol hana hupi ah am lim kolla thang so. Chuna pa chu meelim na Pol hitta thing ha Mesedoniya ah spa ani Gaius lea Aristarchus rel ta kom mant so ae. Akha chu mani hitta bomtul na inn na rui lut so.

³⁰Pol matak makkom wairul riha matieng nga thing num meh. Chutiweta ngoiring ngei na amo ta thingpi no ae.

³¹Hana rourilla am ane angam atonpi ngei na kom kakolla mamel hi meelim abom na inn na ri pi no rang nga rourilla hla ae.

³²Hana bomtul shung am meelim na au wa shukkae, ahre na adang nga au, ahre na adang nga rillea, rouram chu atam pa na mani hi ejongpa rou ah bomtulla mo kom dang no ae.

³³Ahre na chu Alexander na atreem na rou ron shu oh ta ril shu oh. Jihudi ngei na amo ta matieng nga thing rang nga rou ril sha rukka. Alexander na aban dom ma meelimta ta dai ah am rang nga rilla amona ngakthuk rang rouril.

³⁴Chutiweta mani na amo hi Jihudi ae ta mel dang shu takka, mani lim pa na rachun weta apha ani tul phao au wa am, “Ephesiya ah rattek ti chu Artemis ae!”

³⁵Hupi hana cleark na wairul riha ta dai ah ril. “Ephesiya ah spa ngei oh! amo na ril, meelim na dang ae Ephesiya hupi hi arat Artemis hina mokna inn engkul ae wan ram ma thou tuljung lung ae.

³⁶Chuna sharukka na adiek hita atu nakom tanne ang no sha ae chulea chu nangei na leima rang nga ae no oh dai ah tullu lu oh.

³⁷Nangei na spa hitta hina rui ah phao so ae, mani na ani mokna inn ru wa thing mo thing no mo akha chu ani hraihru ta hrano rilla mo.

³⁸Anolea ejong nga Demetrius akha chu atonpi tullu lu ngeina atu jong akha ta nungei no wa alung sha ah mo. Hana routreem ae ang mee am meh mani hana tullu lu song ang nge.

³⁹Ejong nga hana hella nangei na hella choi ja kal num che halkom adiek pa rou hana bahap ta pi song ang nge.

⁴⁰Awant ah ephao shukno tullu hina ani na hitta bomtulla maral pek kang hi ani tarang nga hrano shuk kang nge. Hana tarang nga rouram akha phao am no ae.

⁴¹Na rou hi ril shu takka amo na bamtulla am meelim ta hran hlak pi so ae.