Read Chothe Naga RUIHNGEI TULLU 2 Bible Online

RUIHNGEI TULLU 2 - Chothe Naga bible

RUIHNGEI TULLU 2

¹Lanpina rungnie apha ah chu ngoiring lim na amunt akha chakka mani na rachon so.

²Edang dangnowa wanram tieng hai thou wa ajap ahai hang hekta thirang tara na mani onga am na inn sunga shihak ti so.

³Hana mani ha sarmei hekti alei akhana mani lim changhon kolla sarmei hana tongso.

⁴Chuna mani limpa ha muihla athieng na shihak pi adang adang tronga thou so ae muihla athieng hana trong shukpi nea so.

⁵Amunt hana Chungthieng ta atri lim thangwan thuija jat lim na Jerushalem ma phao ah am meh.

⁶Wairul riha mani lim na atara ha theipha juija rachon na mani lim ha thanum tha thou ae rouram chu mani lim pana ngoiringei na tronga am hi masha mak trong hekta thei sarukka.

⁷Angak shukka mani mur shukka ril, “na rourilla am ngei hi Galily malmashi ngei no wa meh?

⁸Alo ti ah meh? ani limpa na mani rouril lim ani trong hekta theipha hi?

⁹Ani hi Parthia Media akha chu Elam; tieng no meh? akha chu Mesopotamiya, Judah akha chu Kappadokiah Pontus akha chu Asia tieng no meh.

¹⁰Phrygia Pomphylia tiengno meh akha chu Egypt ramtienga Cyrene ningkolla Libya tieng no meh, hana ani ahre na Rom tieng no meh.

¹¹Jihudi akha chu jat adang Gentals hana kristen lea Arabia, ani ahre na kom Chungthieng na alok matullu ae na mani rouril ha ani tronghekta theipha nea ae!”

¹²Nungjel mangjella mani na angak shukka mani akha lea akha sai hlakka “Nahina ae am hi alo wa mo nu?”

¹³Chuti weta ahre na chu nuiso weta ril, “Mani hi leima ju rui so ae.”

¹⁴Hana Pitar na rouron asom akha ngei hitta ngir thou weta sanrol shukka wairul riha ngei karra rou ril, “Jerushalem sunga am nangei lim akha chu kalungshit Jihudi ngei oh karou ngeithei oh nahina rou ram sarukka kei na nangei ta dangpi tikke.

¹⁵Nangei na halla am ha mani hi jurui no sa ae; atun apha hi nituk apha aku chak tul lim sunge.

¹⁶Chungthieng rouril Joel rilphur ha ae:

¹⁷‘Chungthieng na ril atreem nie rungnie ah ka ae ang tullu ha na hi ae; meelim chang honna kamuihla athieng boun ange. Nasonaopa lea nasanaonu ngei na karou rillange; nangei unga ngeina ri nea ange, akha chu ulienchangei na amang mant ange.

¹⁸Chuna kasuuk kakor snu spa, ngei ta phao ha jongpa rungnie ah chu ka muihla athieng mani chunga boun ange, hana chu mani na karou ril thing ange.

¹⁹Keina Chungthieng wanna angakpi ae ange hana thuitieng simlei ah angak shuk kange. Hana sarmei ah athee am mange, akha chu meihut na shihak ti ange;

²⁰Nienu na thiemma amange, akha chu apuhlapa na athee hekta san na wullange. Arengpu hina alok ahoi jaihra marungnie tung matienga.

²¹Hana chu, atujungpa atujungna arengpu amota kok lim na sanpi pha ange.’

²²“Tonpi thanrul Israel, ngei oh rouhi Nazareth ta Jisu na nangei kar sunga ri ngei lou angakpi eja akha chu ane tullu najarra alimpa hi Chungthieng na angei mee ae ti hi nangei makna phao dangso ae.

²³Chungthieng na mahal madangpha nu juija Jisu hi nangei kut chunga pe so ae hana hrano akha hana jurra amota khross chunga aban jump ma that ae.

²⁴Chuti halkom Chungthieng na amota athi hai thou wa ring thoupiso, athi aol hana hai thou wa kom hla pi so. Rouram chu athi jaitha hana amota kolla shi nea rang ui thokno ae.

²⁵Marou hana sarukka David na ril, ‘Keina apha chang honna karengpu ha ka matienga am ri pha inge rouram chu amo ha kaban changtieng pa ae kei ephao ollang nange.

²⁶Chuna sarukka kalung hi ariem na shihakti ae, chuna karou limpa kom ariem chakkae, katak kom sui no wa aring, pha ange ta denna aminge.

²⁷Rouram chu nangna keita athi simlei karra etikkom shi angno che ae hana chakno wa narui athieng hata kom hrano amut akha ae ta ri no ae.

²⁸Nangna keita ringchang lam thingrang ri pi so che akha chu kakolla na am sarukka ariem na shihakti ae.’

²⁹“Ulehnao ngei oh, keina nangei kolla arat athei ani pu reng David hana rou riltikkae, atun hina makka mathit na akha chu ma uoi na hlan ha am meh.

³⁰Amo hi rouphupa akha jarra Chungthieng na matu mate ngei sunga akhana maphomlu ong ange ta saro ei ha amo na dangne ae.

³¹Chungthieng ningtienga ejongpa ae ang mo ti kom David na ri nea jarra khrista Jisu ringthou ranga amo na ril, ‘Jisu athi simlei na kolla shi nea ang no ae akha chu; matak hi kom hrano amut ephao na nea ang no ae.’

³²Chungthieng na Jisu ta athi haithou wa ringa thou pi so ae chuna ani lim pa na na adiek rou hina meelung ngir ae.

³³Chuna sarukka Chungthieng na maban changtiengpa ah wanga domma kalso. Chuna sarukka amo na Pathieng na saro eisha muihla athieng boun na jung atun nangei na ri ah am akha chu thei ah am rou ha ae.

³⁴David na wanram ma kalno phao sunga kom amo na hita ril, ‘ka rengpu kolla arengpu na ril; kaban changtiengpa ah ongo.

³⁵Nangta anda mee ngei ta nakaeto na kachangpi malim ma.’

³⁶“Chuna Israel inn sung lim na dang a ngoiring shu oh, khross chunga nangei that Jisu hi Chungthieng na sanpi nepa arengpu ae ta sem meh!”

³⁷Atun chu rou hi mani theipha juija mani lung leima olla Pitar akha chu arui ngei ta ril; “Ulenao ngei oh, kani hi alo ta ae ang meh?”

³⁸Pitar na sange, “Nangei lim na shilung hlonga Jisu khrista minga baptias ae oh, nangei pak sil pi ranga chule chu nangei na athieng muihla hana khuthul pha ange.

³⁹Rouram chu Chungthieng na nangei unga ngai akhu chu nangei taranga hana aram anei alah lim pata makolla phao ranga anipa Chungthieng na saro ei ah arengpu minga kokka am.”

⁴⁰Pitar rou adang eja kom mani kolla hlem ma rouril, “Natak kom sanpi pha oh, hrano amut meerul hina.”

⁴¹Hana rouril hata lashil weta baptias ae mee ha lasing inthum tolla nani ah mani masing hel kat ae.

⁴²Manina rouron ngei rourilhata mani theichakka lung lutta juija rochun na chupi takpi hana butol kuipi ah bakka akha chu nie ae,

⁴³Rouron ngei na angakpi anealah ae eja ta mani na ajak ati ae.

⁴⁴Ngoiringei lim na hata rachonna mani am adon lim akha lea akha saruk ja hlakkae.

⁴⁵Mani anei adon limpa jurhlakka mani lim sunga madarkar nujuija sam hlakkae.

⁴⁶Rungnie chang honna mani na athieng inn na ranchon na mani na shilung thienga ariemma mani inn na bakha in ha ae.

⁴⁷Malmashi limna ahra lunghal hana jarra ariemma manina Chungthieng ta dom meh. Chuna Arengpu na sanpi pha sha mani ta naha naha hella tolpi ae.