Read Chothe Naga RUIHNGEI TULLU 21 Bible Online

RUIHNGEI TULLU 21 - Chothe Naga bible

RUIHNGEI TULLU 21

¹Kani na manit heraphur ah am jou de ril shu takka Kos ram tieng nga kung thouwa thing nga hana hu war ra chu Rhodes tung songe. Hana hai thou wa Patara ah thing songe.

²Hana kung chunga Phoenisiya tung rang nga kani na kung thou wa thing song nge.

³Kani na amunt hana thouwa Cyrus ri pha ah, akha chu natak Syria am na thinga Tyre turel ralla kung na choi pot lim hla so ae.

⁴Hana kani na ngoiring ngei ahre tuk hlakka mani hitta hapta akha am ha unge Muihla athieng hina jarra mani na Pol ta Jerushalem ma thing no rang rou rillea.

⁵Chutiweta mani hitta am ha apha shu jui ja chu, manita houphurra kani lam ma thing rang ae shonge hana mani namei sanao akha chu unga manilim na rachunna hupi hai thou wa turel aral phao kani hitta thingha ah amunt hana huk hrun na nie ha unge.

⁶Hana kani akha lea akha riemtuk pehlakka mani inn na lea ah kani na kom kung chunga thing shonge.

⁷Kani na Tyre haithou Ptolemais phao tuichung lam ma kung thou wa amunt hana ngoiringei hitta rungnie naha solha ah ariem pi ae.

⁸Hana mathangpa rungnie ah mani ta houphurra Kaisariya ah tung songe amunt hana Jerushalem ma ahalsha sari shunga rouril Philip inn na sol ha pha unge.

⁹Amo chu asanaonu taichang lou roumaphu inly am meh.

¹⁰Rungnie ahre kani na am shu waitakka, Juhudiah hai thou wa rouphu Agabus jung nga.

¹¹Kani am na wa weta amo na Pol konghit la ah akha chu akae makut ren ah ril, muihla athieng na hita ril, “Na konghit mitpu hi Jerushalem ma am Jehudi ngeina konghit hina hup ang nge, akha chu mani na adang jat ngei kolla pea ang nge.”

¹²Rou hi kani na theipha juija, adang ahre hitta kanina Pol kolla Jerushalem ma thing no rang makolla hlem shonge.

¹³Chutiweta amo na sang, “Ejerang nga hata rilla akha chu kalung ta olpi ah chau mo weh? Kei chu Jerushalem ma huppa shi chakno wa arengpu Jisu tarang nga Jerushalem ma athi ang phao ati nong nge.”

¹⁴Amo ta kani na hlem nea no wa, kani na makolla nahal ha ae jou oh ta ril songe, “Hana arengpu na ahal chang shu oh.”

¹⁵Amunt hana apha atante am shu takka kani ron nang pot lim semsha ah manita houphur ah Jerushalem ma thing shonge.

¹⁶Kaisariya hai thou wa rui ahre kom kani hitta thing ha ah. Cyprus ah Mnason hitta kani tung ha ang inn tolla kani ta rui ah thing nge amo ha chu ama tieng hai thou wa ngoiring nga am mee sha ae.

¹⁷Jerushalem ma kani tung nga ngoiring nga am ngei na kani ta ariem ma tuk shukkae.

¹⁸Hana hu warra Pol na kani hitta Jacob rilhlak ranga thinga abom shunga ulien changei kom am tol ae.

¹⁹Pol na manita ariem ma riemtuk pe ah Chungtheing na jat adangei karra alota machung nga tullu lu mo tina rou hi ripta ril sho.

²⁰Makol hai thou rouhi thei shu takka mani na Chungthieng ta domma mani na ril, “Uleanao Pol oh, nang na ripha ang che ae Jihudi lishing eja na ngoiring nga am hi, akha chu alo ta mahai mani na roukung hata ngoiring moti.

²¹Mani na hitta rillea, ha chu nangna jat adang ngei am na am Jihudi ngei ta Moses hina talit tamang roukung juino wa unga makhai ha ashar tan no hal kom ngai ae ta mani ta ril ae ti ae.

²²Ani na alo ta ae ei meh? mani na nang hi phao so ae ti hi thei sho ae.

²³Kani na nakolla ae ki num chu. Saro eisha spa inly kani hitta am ha ae.

²⁴Spa ngei hi rui ah mani dramo anujuija thiengpi na hlou alut sum nang na pe oh, chu lea chu mani lu sham tanna hou wange. Hana chu meelim na narou ha adiek no ae ta dang ang nge, ha chak no wa nang hi Moses roukung hina ril juija am mehta dang shu oh.

²⁵Khrista ngoiring jat adang ngeita chu kani na mani kolla jiekka hla ung nge ha chu kutta sem hlawang kolla bu don an don akha chu ahongrui hitta thi asha ano lea athi bakno oh hachakno wa vokno hrano tullu hai thou wa aram laa oh am mo ta ril song nge.”

²⁶Chuna pa chu Pol mathangpa rungnie ah manita rui ah athieng pi na tullu ha ae rang sha rukka mani hitta thing ha so. Hana amo na mokna inn na lut weta ejongpa rungnie ah hijongpa thiengpi na hi tem mang mo akha chu mani lim changhonna ae ang mo tina rou hi dangpi thing so.

²⁷Rungnie sari hi shu ang nga wak jaija Asia ram tieng hai thou wa Jihudi ahre na Pol ta mokna inn shung nga ri pha so. Mani na wairul riha ta julla hla ah Pol ta mant so.

²⁸Mani na ril, “Israel mee ngei oh!” “Sanpi oh! Spa hi ae amunt chang honna amo na thing thing weta ani Israel ta anda ah rolla akha chu Moses roukung ta ngei num no wa rol ae, Hana chakno wa ani athieng mokna inn na phao jat adang ngei ta rui ah lutta mut pi ae!”

²⁹(Mani na rouril hi chu Ephesiya ah Trophimus hi Pol hitta hupi ah mani na ri sharukka Pol na mokna inn na rui oh luttang nge ta halla ae.)

³⁰Hupi shung nga am meelim na halla shuk no wa spa ngei na rachun na Pol ta phitta rei ah mokna inn hai thou wa kaiya shuk so ae hana mokna inhar lim thing hap so.

³¹Hana meelim na Pol ta that tukkae ta ae ah rou lim hi Rom lamkaipu kolla mani hla juija Jerushalem ma am lim hi hamne ni jo weh.

³²Apha hana makka lamkaipu na offisar akha chu ralmee ahre hitta amunt hana harra phoa so ae. Mee ngei na amo akha ralmee ngei ta ri juija Pol ta mani phit chan so ae.

³³Lamkaipu na Pol am na wa ah amant rang rou rilla akha chu thirling takka jem rang nga ril so. Hana amo na sai, “Spa hi atu meh akha chu amo na ejongpa tullu lu ah meh?”

³⁴Ahre akha na akha ril hana adang ahre akha na adang nga ril ti pa chu lamkaipu ha elo wa na hi shukka am mo ae tina hrabakta dang nea ni jo weh, chuna pa chu mamee ngei ta Pol hi ma am na inn na rui rang nga rou pe sho ae.

³⁵Mani na ma am na rui ah lutta Pol ta ralmee ngei na nam ma rui ah shuk so ae, rouram chu hana am mee ngei hi ramsha hek ti hap so ae.

³⁶Manutieng mani na jui ja wa ah rang nga au ae, “Amota that oh!”

³⁷Ralmee ngei na Pol ta maralpal am na rui ang ae lei ah, amo na lam kaipu kolla ril, “Nakolla kei na ejongpa rou te rilla ngei ang meh?” “Grik trong naril chu nang trong nea ah che?” lamkaipu na ril.

³⁸“Halea chu nang hi Egypt sanao, apha akha ah spa lasing inly homma ramrukka ral bom thou mee ha nang no ae nu?”

³⁹Pol na sang, “Kei hi Jihudi sanao inge, Cilicia Tarsus ah don mee inge hajong maruol hupi sanao inge, chuna lungshi ngei ah meelim kolla rou ahre te ril tikkae.”

⁴⁰Chuna lamkaipu na amota angai pe so ae. Chuna pa chu Pol na aban dokka shukka meelim ta dai ah am rang rou ril. Meelim na dai ah am thou juija Pol na mani ta Ebriya trong nga ril.