Read Chothe Naga RUIHNGEI TULLU 22 Bible Online

RUIHNGEI TULLU 22 - Chothe Naga bible

RUIHNGEI TULLU 22

¹Karou ril te theipi oh, “Uleanao Israel ngei oh, nangei maikung nga rou hi rilla am minge!”

²Ebriya trong nga marouril mani thei juija, mani hi hella dai ah; Pol na hata rourilla am so:

³Cilicia Tarsus ram ma don Jihudi sanao inge, chuti weta Jerushalem ma Gamaliel kol hai thou alien ashai shuk kinge. Makol hai thou wa nulea pa hina roukung hi hra bakta chu ah hang inge, hana atun hi Chungtheing kolla katak hi pe ah shinge, keikom atun nangei hekti inge.

⁴Keina mee ngei ta athit phao aol ana pe phur inge, akha chu snu spa eja ta mant na raen-inn shunga shi inge.

⁵Hina chungtekti thiempu ngei lea rouril abom ma ong ngei na karil rou hi adiek ae ta ril pi ang nge, hana mani na keita jeik sha rou pe ah hla ae Damaska ah am uleanao Jihudi ngei ta mant thing nga, keina thing weta mant na Jerushalem ma rui ah lea ah aol ana pek ranga.

⁶Nisungjai ah Damaska nai ah wak juija edang dang no wa ehekta awar akha na keita hulla.

⁷Alei chunga tu wa ka am lei ah sanrol akha na kei ta ril ae “Saul, Saul! ejerang nga keita aol ana pe ah cha meh?”

⁸Arengpu, nang atu cha mo ae? hata kashai juija amo na keita ril ae, ‘Kei hi nang na aol ana napek Nazareth ta Jisu inge.’

⁹Kei hitta am ha mee ngei na awar ha ri pha ae, chuti weta mani na chu rouril la am ha chu thei pha no ae.

¹⁰Arengpu keina alo ta ae ang meh ta sai inge. Hana arengpu na kei ta ril. Thou wa Damaska ah lutto amunt hana Chungthieng na ejongpa tullu nang ta ae pinum mo ti rou ha rillang nge.

¹¹Awar hana sharukka kei hi kamit ephao ri nong nge, chunapa chu katonpi ngei na keita kakut kai ah Damaska tung pi ae.

¹²“Hupi hana spa aming na Ananias ti dramochel ani roukung jui akha chu hana am Jihudi ngei na ehekta ajak ati shak spa akha am meh.

¹³Amo na ka am na phao wa kaning kolla ngirra ril, ‘Uleanao Saul, namit ri sier oh!’ apha hana makka woihapa kamit ripha nea ah amo ta an ninge.

¹⁴Amo na ril, na ngei pa ngei hina ani Chungthieng na nangta hal so ae, mahal ha dang rang sharukka, dharmochel kor ripha rang, hana mamur makka marouril theipha rang nga.

¹⁵Chuna nang na meelim chang honna naripha natheipha ha saro ei nea rang nga.

¹⁶Atun chu apha hakka am no sha oh. Thou wa thing weta makolla napak lim ril shukka baptias ae jou oh.’

¹⁷Jerushalem ma kalea ah keina mokna inn shunga prathana ka ae lei ah keina ripha inge.

¹⁸Karipha arengpu hana keita amo na ril, Jerushalem hi hou wa harra thing jou oh, rouram chu hina am mee ngei na kataranga narouril ha lapi num mang no ae.

¹⁹Hana kei na shang inge ‘Arengpa, mani na keita hrabakta dang nge ha chu synagog ka keina thingweta nangta ngoiring mee ngei ta mant weta phit ae ti ha.

²⁰Akha chu Stephen na nataranga saro ei ah narou rillei ah athat ha kei katak mak hana am minge, hana angei ha kei na pe ah amota that mee ngei hina apun ani ha hakka am minge.

²¹“Hana arengpu keita rouril ae, “Thing jou oh keina nangta jat adang ngei am na aram laa ah hla ang nge.”

²²Na roulim Pol na rilla am lei ah meelim na ngei ah am lei; chuti weta mani na kalla aou wa ril ae, “Makol hai thou wa thing jou oh! amota that oh! amo hi ring nga am ngei no ae!”

²³Mani na aham ashul phao ngei no wa apun ani deng nga vokphul achung tieng nga the ah ril.

²⁴Lamkaipu na Pol ha maralpal la rui rang nga mamee ngei ta ril. Amo na mani ta ril na spa hina alo ta anita anda ah mo hano lea ejongpa maral am mo jong nga phitla sai oh.

²⁵Chuna mani na amota huppanga mani aejuija Pol na hana ngirra am offisar kolla ril, “Rom sanao akha ta huppa shi hi roukung hana angai ah mo ae, amo ha chu ephao meethat meemant ephao ae no wa.”

²⁶Hana am offisar na rou hi thei juija lankaipu kolla thing weta sai, “Ejongpa ngan nang na ae ah am ma cha meh? na spa hi chu Rom sanao ae!”

²⁷Chuna pa chu lamkai pana Pol am na wa weta makolla sai, “Nang hi Rom sanao mo ae kamai kung nga rillo?” Pol na ril “Oh weh.”

²⁸Hana pa chu lamkaipu na ril, “Rom mee kachang ranga amant hi keina lokka pe inge.” “Chutiweta keichu kanu don thouwa Rom mee” inge, Pol na sang.

²⁹Makolla rou sai ang nga wa ngeina nutieng nga nulea so ae Hana lam kaipu amo mak phao wa Rom sanao akha ta thirling rui ah mahup hi ol so ae.

³⁰Lamkai hana Pol ta ejongpa matullu lu na am ma Jihudi ngei na maral pe amo ta jonge, chuna pa chu mathangpa rungnie ah chu Pol kutta thirling rui hla pi rang roupe ah, amona rouril abom akha chu chungtekti thiempu ngei ta rachun pi ah amo na Pol ta mani lim mai ah ngir pi so.