Read Chothe Naga RUIHNGEI TULLU 23 Bible Online

RUIHNGEI TULLU 23 - Chothe Naga bible

RUIHNGEI TULLU 23

¹Pol na rouril abom ngei ta denna an na ril, “Katonpi Israel ngei oh! Awoni ah Chungtheing ning tieng nga ring nga ka-am hi kalung nga hitta hella ahra am ni jo weta hallinge.”

²Chungtekti Thiempu Ananias na Pol kolla ngirra am ngei ta mamar ra phit rang nga rou pe ae.

³Pol na amo ta ril, “Chungtheing na nangta phit ange-angoupa noot in bang hek ti nang! hana ong nga na am hi roukung hana anu jui ja keita nang na routreen ae ang nga ae, chuti weta nangna roukung nujui no wa mani ta keita phit rang rou pe che ae!”

⁴Pol ningkolla ngirra am hana makolla ril, “Nangna Chungtheing Thiempu ta ajak pe ah am che ae!”

⁵Pol na sange, “Katonpi Israel ngei oh, amo hi chungtekti Thiempu ae ti hi kei na dang nonge. Jieksha rouna ril, nang na nangei chunga ane angam ngei ta hrano rou trong no oh ti ae!”

⁶Pol na Pharisis lea Sadusis abom ahre mari juija amo na rouril abom hana kokka ril, “Katonpi Israel ngei oh! Kei hi Pharisis sanao Pharisis inge, Athi hai thou aring ringchang lungraang ka-am sha rukka atun hi kei ta hijong aol ana dong nga am minge.”

⁷Rou hi maril shu takka, Pharisis ngai lea Sadusis ngei hi trongjet hlakka thou so ae, hana mani lowm ani shukka hran hlak sho ae.

⁸(Rouram chu Sadusis na ril athisa mee na ephao ring nea ang no ae hana wanrui akha chu muihla ephao am no ae; chutiweta Pharisis na chu inthum lim ngoiringe.

⁹Hana mani hi hella au hlaktek so chuna roukung ocha Pharisis anujui ngei na ngir thou weta mani ta ngei num nonge ta kalla ril sho ae. “Na spa kolla ephao aral tullu kani na tuk nong nge! Muihla na ano lea wanrui na machunga rouhi rilla kom ngei ae!”

¹⁰Mani jet hlak hi athat amant pha ah wakjui ja chu, Pol hi ta kom that ang nge ta lamkai pu ha hlawai ah maral mee ngei ta Pol ha rui ah ralpal shunga rui ah lut rang rou pe so ae.

¹¹Nanie jantieng nga arengpu na Pol kolla ngirra ril, “Atri no oh! Jerushalem hina nang na katarang nga ngir pi sho che, chuna Rom mako hihekta nang na ae oh.”

¹²Hana mathangpa nietakka Jihudi ahre na rachun na mani na hitta ril hlakkae, mani na Pol hi that malim ma bu an bakkang no ae ta saro ei hlakso.

¹³Mani meering somly lel la rachun na tullu hi hal hlakkae.

¹⁴Chuna chungtekti Thiempu akha chu ulien chang ngei am na thinga ril, “Kani na rachun ung weta saro ei ha shong nge, ha chu Pol ta that malim ma kani ephao bak inn ang nang nge.

¹⁵Chuna atun hi nang akha chu rouril abom ngei na Rom lamkaipu kolla Pol ha hina rui ah phao rang rouril rang mee hla oh, marou ha hella dang ranga nang na jiekka hla oh. Chutiweta kani na amunt hi mapha ma ah amo ta that rang hakka am mang nge.”

¹⁶Chutiweta Pol sanaopa hina asharnu na rou hi theipha ah; amo na ralpal hana Pol am na thing nga rou hi makolla ril sho.

¹⁷Chuna Pol na offisar akha ta kokka makolla ril, Na unga hi rui weta lamkai pu kolla ting ngo ejongpa ma makolla rou rillang am meh.

¹⁸Offisar na amota rui ah lamkaipu kolla thing nga ril, “Raen-inn am Pol na keita kokka na unga hi nakolla rui oh ta rilla rui ah wa inge, “Rouram chu amo hi nakolla ejongpa rourillang am meh ta.”

¹⁹Lamkaipa na amota amo makna rui ah makolla ejongpa rillang cha meh, ta sai ah, “Ejongpa nakolla am rou ha kakolla ril jou oh?”

²⁰Amo na ril, “Jihudi ane angam ngei na atuk hi Pol ta rouril abom ma rui ah wak rang nga nakolla ril wa ange ti ae marou hana hella diekka dangpha rang sai ange ti ae.

²¹Chutihalkom nangna ngei pi no oh de, rouram chu meering somly hel ngei na saro ei so ae mani hi amota that malim ma bakno inno ange ta, chuna mani ha atun hakka bi ah am meh nalungir chak hakka am so ae.”

²²Lamkai pu na ril, “Atu akha kolla rou hi kamai kunga nang na tak so ae ti hi ril no oh de” ta ril weta amona unga ha hla so ae.

²³Chuna lamkaipu na ma offisar anita kokka ril, “Kaisariya ah thing rang nga ralmee riha ni rachun pi oh hana sakour ral mee samsary akha chu sai chai mee rihani hit awoni jantieng apha na aku tak juija thing thou oh.

²⁴Pol tarang nga kom sakour pe oh hana amo hi Governor Felix am na ah thino nano wa tung ang nga ae.”

²⁵Hana lamkaipu na majiek rou ha hity ae.

²⁶“Claudius Lysias, Governor Felix hoiha lea jaihra na riemtuk pe ah am minge.

²⁷Jihudi ngei na spa hi mant na amota that tang ae ah am lei ah, karal mee ngei ritta thing nga amota san songe. Chuna amo hi Rom sanao ae ta kom kei na dang sange.

²⁸Chuna keina amo hi ejongpa maral mo ae ta dang num ma rouril abom ngei am na rui ah thing inge.

²⁹Amo hi thi ah ngei tullu hi ephao ae no ae ta kei na chu dang inge hana raen-inn shung phao shi num nange chuna marel jong ngei na mani takna sem roukung hitta tullu lu num meh.

³⁰Hana atun hi mani na chu amo ta that ranga sem sa ah tulhlak so ae ta ril rou kathei juija kei na nakola hla num minge chuna mani nakom maniril num rou ha namai kunga ril shu oh.”

³¹Chuna ral mee ngei na roupekha hitta munt ha ah mani na Pol ta nanie jan tieng makka rui ah thing so ae. Antipatres phao ah.

³²Hana mathangpa rungnie ah chu kae ralmee ngei na sakor ralmee ngei ha amo hitta thing ha rang houphur so ae.

³³Mani na Kaisariya ah rui ah thinga jieksha rou ha Governor kolla pe ah Pol kom makut chunga pe so ae.

³⁴Governor na jieksha rou ha pa ah Pol kolla nang chu ejongpa ramma mee ah che ta sai. Amo hi Cilicia ram hai thou wa mee ae ta madang juija.

³⁵Amo na ril, “Nangta nangta maral pe ngei phao jui keina mani kolla kom thei pha ange” hana amo na Pol hi hrabak ta Governor am na inn na hakka am rang rou pe so ae.