Read Chothe Naga RUIHNGEI TULLU 27 Bible Online

RUIHNGEI TULLU 27 - Chothe Naga bible

RUIHNGEI TULLU 27

¹Italy ah hla rang nga kanina roungir hlakka Pol akha chu adang raen-inn shunga am ahre hitta manina Rom siphai offisar Julius kut chunga shil na hla so ae “Mani ha chu Rengpa ralmee shiphai ae.”

²Kani na Adramyttium hai thou wa Asia ramma thing ang kung am sha hana thing songe Thesolonikiya hai thou wa Aristarchus Masedoniah mee kom kani hitta thing songe.

³Hana mathangpa rungnie ah kani na Sidon tung songe Julius hi ehekta lungshi thei ae chuna amo na Pol ta aton pi ngei hitta ri hlak rang apha pe pi ae chuna atonpi ngei na kom nadarkar hap chu pe shu oh ta.

⁴Kani na hana thou wa thing nga kani am na thi rang rang nga wak pa chu kani na tuijai mullon Cyprus tieng nga thingso.

⁵Kani na Ciliciya lea Pamphylia tuipi lalla thing nga Lycia Myra ram ma pha unge.

⁶Hana offisar na Italy thing ang Alexandriya hai thou kung tuk hlakka amo na kung shunga hap so ae.

⁷Kani na rungnie eja lutta har no lutta ehekta aol ana eja hitta thing nga atreem na ah Cnidus hulok ka tungso. Thirang na jap hai shulla hatta hella thing nea no wa kani na tuijai mullon Crete Salmone tieng tumma junga shol hla pha unge.

⁸Kani na aol ana eja hitta munt ha ah Lasea hulok hai thou aram anei te kung sol hakna mun kangphal pha ah tung so ae.

⁹Mani na apha mangpi ah kung thou wa thing nga atun chu bu bak reen nutienga leima khudong thi rang pha ah Pol na mani ta ril.

¹⁰“Malmashi ngei oh, kei na ri pha nea inge ani tui lampi hina leima tam ahra no shuk kang so weh, pot eya kom mang ang, akha ani ringchang phao mang ang so ae.”

¹¹Chutiweta ralmee riha lamkai na chu Pol rou jui ang hutta kung mitpu lea athou mee ril juija thingso.

¹²Kung sol hakna amunt ha phalbi tem ma chu leima dai sharukka mani tam tek pana Phoenix ram ma tung ranga kalla kung thou wa Philbi ha dong rang halla am. Na kung ngir rang amunt ha chu Crete nashu natak animak tuk hlak na ae.

¹³Ehekta adai thirang na natak tieng hai thou wa rang hanga, mani na hallea Crete kangphal tung rang thertum ha ella amunt tung ha ei oh.

¹⁴Chutiweta akal thirang akha na nashu natak hai thou wa tuijai mullon na ranga hang so.

¹⁵Kung mai ah thirang na jappa kung mai hi hrabakta hai nea nijo weh kani na thirang na jui rang kalla hot na unge.

¹⁶Kani na Cauda tuijai mullon pha ah wakka apha atante solha pha unge hana aol ana eja hait hou wa kung ha chu asui angam am ni jo weh.

¹⁷Mani na kung ha ella wa ah ahul tunga rui takka ren na shi so. Mani na ati hei shulla Libya waipin abom am na tienga tanna thingso ae.

¹⁸Amang atah ang ajap ahai na hata channo wa am pa chu, hana mathangpa rungnie ah chu kung shung hai thou pot ngei hi danga hou so.

¹⁹Hana mathangpa rungnie ah mani na kung hai thou wa pot ahre chu denga hou so ae.

²⁰Rungnie ashotta nimel akha chu arshi mel ripha no wa thirang phaibu na kalla ranga wa ah atreem na chu ring ange ti kani lugnhal am ni jo weh.

²¹Mee ngei na apha shotta bakno inno nutieng nga Pol na mani maikunga wa ah ngirra ril, “Malmashi oh, karil ka rou hi thei pi lea chu, Crete hai thou thing no lea chu amang atah hi shukkang no sha ae.

²²Chuna nangei ta mokka aminge ha chu ani ringchang hi atu akha phao mang no shu oh, kung hi chu mang jou shu oh.

²³Ajantieng nga mokka ka-am akha chu mamee changa ka-am Chungtheing wanrui na ka-am na phao ae.

²⁴Hana ril, “Ati no oh Pol! nang hi rengpa maikung ngir weta Chungthieng hina ahrat na ha rillang sha ae. Nang akha chu nang hitta kung chunga thing ha meelim aring pha angei.

²⁵Chuna tonpi ngei oh olno oh! rouram chu Chungthieng ta keina ngoiring inge, keita maril ha makha pha ange.

²⁶Chutiweta ani hi ejongpa tuijai ramkang munt na tunga tah so ae.

²⁷Rungnie yan asom inly pha wa so ae ani hi Mediterien tuipi hai thou wa thirang phaibu na rui ah wa khi, yanyai hana chu kung thou pana ramkang munt hi nei ah wa so range ta halla am.

²⁸Chuna pa chu tui hi eja thukmo ta mani na an pa chu miter somly ah am so ae, hana atan te meni thinga an sier jui ja chu meter somthum chak tukhlakso.

²⁹Chuna pa chu mani na hallea kung hi alung chunga then sier ang mo ta hana thuitekti kung doppa pot ahre tol pi ah achunga mani na hu war phao wa nie ah am.

³⁰Kung thou mee chu ati hei shulla kunghai thou wa tum ma thing ranga kung sanao hi hla ah thou so ae ama tienga.

³¹Chutiweta Pol na shiphai offisar kolla thingweta ril, “Ejonga kung hol mee ngei tol no lea ani ring nea rang lung rang am no ae.

³²Chuna pachu shiphai hana kunga mani huppa shi rui ha tan na kung sanao ha athei chakka thingso ae.

³³Chuna huwar ma hai ta Pol na mani liem ta bu bakrang rou ril so. “Nangei na rungnie asom inly hakka bakno inno wa so ae.

³⁴Chuna nangei na bak rang sha rukka keina nangei ta roudoh ah aminge nangei na ring ranga, “Nangei lu ah sampum akha phao mang ang no ae.”

³⁵Hina nutienga Pol na budol ahre choija kalweta meelim maikunga therra Chungthieng kolla nie weh ta bakthou so.

³⁶Mani lim na ngei pi ah bu bakthou so.

³⁷Mani kung shunga am meelim hi 276 ae.

³⁸Manina awon hoppa bak shu takka chu kung ha kom rit nijowe hana tuipi shunga kom ahre denga hou so weh.

³⁹Hana hu warra wakjuija chu kung hulpa ngeina ram munt kom dang ni jo weh kangphal ha, chuti weta alung alok akha chu mani na ripha ah hana tunga ngei lea chu tung rang hot na so.

⁴⁰Chunapa chu mani na pot ngei ron lim ha tuipi chunga lutshu oh hana hitta munt ha ah manina kung thou ngei na huppa shi rui ha kom hla pi so ae. Hana mani na kung matienga thinga kung hulla mani matienga am kang te chu tung rang ae so.

⁴¹Chutiweta kung hana waipin abom shunga lut thou so ae chuna pa chu kungmatieng ha ephao ling nea jowe, hana anungtieng sharuk makhai na ajap ahai na kui pi hap so ae.

⁴²Chuna ralmee ngei na halla thouso raen-inn shung thou mani rui shuk lim hi that rang hal hlak so ae, chulea chu mani akha phao na tanna thing nea ang no ae.

⁴³Chutiweta ralmee offisar na Pol ta san num ma mani na tullu lu no rang ham so ae, hana hutta amo na tui thei ngei na kung hai thou tum ma kangphal pharanga rou pe so ae.

⁴⁴Hana theino alem ngei na humpek choi weta akha chu ahre na kung akuisha atan, atan choi ja hita kani na kangphal tung unge.