Read Chothe Naga RUIHNGEI TULLU 3 Bible Online

RUIHNGEI TULLU 3 - Chothe Naga bible

RUIHNGEI TULLU 3

¹Nahani akha ah Pitar lea Johon na athieng inn sunga nie niek ranga chanutieng apha innthum takjuija thinge.

²Hana adon hai thou kaehor spa ta mee ngei na ehekta ahra innhar am na ah tha hanga shi phur ae rouram chu athieng inn hana lut mee limta sum niek ranga.

³Pitar lea Johon mel amona rijuija ejongpa akha pe ang mo ae ta nie ae.

⁴Manui na amo ta mun na an weta Pitar na ril, “Kanui ta anno!”

⁵Chunapa chu amo na manui ni kolla ejongpa mo kha chu pha ang sange ta mun na an ae.

⁶Chuti weta Pitar na amota ril, “Shum lea pai chu kei ekom am nonge, chuti weta kakolla ka-am ha nangta pe inge; Nazareth ta Jisu khrista minga kei na nangta thou weta thingrang trongsan pe inge!”

⁷Hana pa chu amo na aban changtiengpa oh weta ngir thou pi ae, apha ha mak ka akae horra am spa ha atun chu damso ae;

⁸amona akae hana chamma thou weta ahul tunga thingthou so, chuna amo na manui hitta athieng inn sunga luttol so. Athinglam ma chomma amo na Chungthieng ta dom ae.

⁹Thing weta Chungthieng ta riemma madom ri malmashi ngei na.

¹⁰Amo hi ahra inhar ningkolla ong veta sum nie ah am pa ae ta dangpha juija angak alau shukka machunga alo wa mo nu ta hallea.

¹¹Solomon leihal aeta kokna amunt hana Pitar lea Johon kolla haitonna am malmashi ngei na angak shukka mani am na ah wa ae.

¹²Pitar na mani lim ta ri juija ril, “Israel tonpi thanrul ngei oh, nahina sarukka alowa angak shukka chau hana ejeranga nangei mitta mun na kani ta an na chau? Ejongpa akha tienga kani jatha ae ta hal chau ano lea Chungthieng tol no ae ta hal chau, ha spa kanina thingpi hi.

¹³Abraham, Isaac akha chu Jacob hina Chungthieng hana ani pipu ngei hina Chungthieng na masuuk Jisu ta mahung majai pek phau ah nangei na amota athat ranga pe so chau, hana chakno wa Pilate na amo ta that no ranga lungir phao nangei na amo ta ngeinum no chau.

¹⁴Nangei na adiek athieng hata pa ngeinum no wa meethat mee ta pa hla pi so chau.

¹⁵Nangei na ringchang sempa ta that hal kom Chungthieng na amo ta athi hai thou ringpi so. Kani na hina taranga lung ngirra am munge.

¹⁶Jisu khrista minga ngoiring jarra nangei na ri ah am spa hi atun chu arat pha so ae Jisu minga ma ngoiring hana jarra machunga pumdam dam pi so ae nangei na ri ah am hi ae.

¹⁷“Ulenao ngei oh atun chu, keina nangei ta dang singe nangei ta lamkai ngei hekta nangei na epromo ta am ha.

¹⁸Nahi Chungthieng na amatienga rouchoi ngei kolla rilsha rou sha ae, ha chu, khrista ha aol dong ange.

¹⁹Shilung hlonga Chungthieng ningtienga haileh oh, chu lea chu napak limpa kom silpi ange; ejonga nang na ae lea chu, jaitha pharanga apha ha areng kol hai thou phau ange.

²⁰Hajong muihla rat rang ha arengpa kolla haithou phau ae hana amo na nangei taranga ahal sa. Sanpipa Jisu ta hla ange.

²¹Amo ha chu thongwan ram ma mapha ha pha ma lim chu am mange eheilim athar ra shak malim ma Chungthieng na marouchoi ngei kolla amatieng eja ah saro ei nujuija.

²²Chuna Moses na ril, ‘Chungthieng nangei arengpu na nangei taranga rouchoi hla pi ange keita mahla hekta hana amo ha nangei mee makkange chuna nangei na kom maril eheilimpa ha jui ah ta ae.

²³Atujong na rouchoi rouril jui no mee amo chu Chungthieng mee ngei kol hai thou hran pi weta amang ata shuk pi ange.’

²⁴Rouchoi rouril lim sunga Samuel akha chu manutienga phao ngei na kom awoni ah shukka am hi rilphur sa so ae.

²⁵Chungthieng na marouchoi ngei kolla saro ei hi nangei taranga ae Chungthieng na nangei puthou Abraham kolla saro ei ah ril ha, ‘Simlei chunga natu nate ngei chunga keina jaihra pe ange.’

²⁶Chuna sarukka Chungthieng na marui ha hal weta amota masha ah nangei kolla hla ae, nangei limpa na nangei hrano lampi haithou wa lea weta jaihra pek ranga ae.”