Read Chothe Naga RUIHNGEI TULLU 7 Bible Online

RUIHNGEI TULLU 7 - Chothe Naga bible

RUIHNGEI TULLU 7

¹“Na hi routakka meh?” Chungtekti thiempuna sai.

²Stephen na sange, “Ulea nao kapa ngei oh, karao hi ngei thei oh! Ani pi pu ngei matienga, Abraham na Haran ram ma thinga ringa am lei ah Mesopotamiya ah Chungthieng na mahung majai tolla ri pi ae.

³Hita makolla ril, ‘na-u-nanao akha chu naram houphurra kari pi rang ramma thingo.’

⁴Chunapa chu amo na maram haouphurra Haran ramma am thingso. Abraham mapa thit su takka atun na am na ram ma Chungthieng na hlonga am pi so.

⁵Chungthieng na chu Abraham ta lam ha alei ram te phao ma taranga ta pe no songe chutichun, Chungthieng na matarang akha chu matu mate ngeita range ta saro ei ah shi ae Chungthieng na masaro ei lei apha sunga Abraham chu asanao am no sange.

⁶Nahi ae Chungthieng na makolla ril rou ha: Natu nate ngei hi mee ram ma kum rihaly mee suuk meekor changa ehakta aol pha ange.

⁷Chuti weta mani ta suukka nei malmashi ngei chunga kei na routreem mange hana nutienga naram sunga hai thou wa shukka phao weta na ram hina mani na keita mokkange.

⁸Hana Chungthieng na Abraham ta asar tan ranga roungir rang rou pe ae chuna Abraham na Isaac don su hapta akha waitakka asartan ae; Isaac na kom masanao Jacob ta asartan ae, akha chu Jacob na kom ani pi thou puthou phao asanao asom anita asar tan ae.

⁹“Jacob sanaou ngei na mani nao Josep ta anarra Egypt ram makor changa jurra hou chuti weta Chungthieng na chu amo hita am ha ae.

¹⁰Hana maol manat lim chung hai thou wa amota hrabakta sanpi ae Egypt rengpa maikunga Josep shuk juija Chungthieng na lungsin lungwar akha chu lungshit rang mel ri pi ah Rengpa na Josep ta rengpa inn sung changpi ah ram sung hana Governor changpi ae.

¹¹Hana lei apha ah Egypt akha chu Kanaan ram sunga butang aol akha shukka ani pi pu ngei na bu hai ah aol pha ae.

¹²Egypt ram ma sang am meh ta Jacob na thei ah, ani puthou masaunao ngei ta ahal pa changa hla so ae.

¹³Hanna woini suna pa ah Josep na ma-u-manao ngei ta mamel dangpi ah Egypt rengpa na kom Josep inn sungei hi dang so ae.

¹⁴Chunapa chu Josep na mapa Jacob kolla rourilla hla rou chu, Egypt ram ma inn sunga am somsary ranga meelim ha phao oh.

¹⁵Hana Jacob na Egypt ramma thinga amunt hana asanao akha chu amo kom thi ae.

¹⁶Shekim ramma Hamar sanao pa kolla Abraham na hlankung taranga sum ahre ah lei na ram ma mani tak chu choi ja lea weta ui ae.

¹⁷“Chungthieng na Abraham kolla saro ei tung ang apha nei ah wakjuija chu Egypt ramma ani mee na tamtek tekta hangso.

¹⁸Atreem na ah chu Josep maram ma shupdang, dang no spa akha na Egypt ramma Rengpa changa.

¹⁹Amo na ani pi pu ngei ta wutta rella nao thar don unga lim ha thi ung shu oh ta inn hai thou wa shi pi no ae.

²⁰Hina lei apha sunga ehekta ahra unga Moses don so hla thum sunga chu amo hi mapa am na ah jokka shi ae.

²¹Hana inn sunga hai thou wa hou thing juija Rengpa sanaonu na asanao hekta amota jokka lokka hangso.

²²Amo hi Egypt ngei athei asing lim chupi takpi ah anutienga chu ehekta trong thei akha chu tullu lu thei mee changso ae.

²³“Moses na kum somly mapha juija alo sharukka mamee Israel sanao ngei ta hija ol pi shi meh ta jong thou ranga lungir so.

²⁴Egypt sanao akha na mani Israel sanao akha ta aol pekka am mari juija amona thing weta matarang sarukka thatta lamant dingso.

²⁵(Mahal malung chu Chungthieng na amo ta shiji na weta mamee ngei hi ta rui ah shuk pi ange ti hi bahap ta range ti weta mani na chu baha tano wa am so.)

²⁶Hana mathangpa rungnie ah mani Israel sanao mashel sulhlakka am mari juija amona manui ni makta adai lakranga ril. ‘Ngei oh, nanui ani mak ha Israel sanao rukkae; alo sarukka hita sulhlakka am ma chau?’

²⁷Chuti weta sulhlakka am ani sunga akha na Moses ta illa hla weta rilla sai, ‘Atu na kani hita nangna routreem ae oh ta rilla meh?’

²⁸‘Ajan na Egypt sanao ta nathat hek ta keita kom that tang ae ah cha meh?’

²⁹Moses na rou hi thei juija Egypt ram hai thou wa tan na Midian ram ma thing weta hana asanaopa ani don na ringe.

³⁰“Kum somly waitakka Sinai mullon ningkol ramruk sarmei kanga am apunt bil akha hana wanrui na Moses ta ri pi.

³¹Kanga am apunt bil ha Moses na rijuija angak shukka alo wa mo hella bahap ta ranga nei ah mawakjuija Arengpu sanrol akha amo na theipi so.

³²‘Napa napu ngei Chungthieng ha kei inge, Abraham hina Chungthieng, akha chu Isaac lea Jacob.’ Moses na ati hai sulla an nea ni jo weh.

³³Arengpu na makolla rillea, nahonghup ha lah hou oh, nangir na amunt ha athieng amunt ae.

³⁴Egypt ramma kamee ngei na ehekta olla am ri singe mani tap tara kom thei inge chuna mani ha rui ah shuk ranga jung singe Hana wa oh; keina nangta Egypt ramma hla ange.’

³⁵“Moses chu mamee Israel sanao ngei na annum no akha ae mani sai na chu, ‘Nangta kanita routreem ae aranga atu na happa shi meh?’ Amo chu Chungthieng na mamee ngeita sum ranga hla mee ae apunt sunga kanga am sarmei karra mari wanrui hana jarra.

³⁶Amo ae Egypt hai thou mamee ngei ta lamkai ah shukka hana ramrukka kum somly angakpi aloupi eja akha chu Egypt ramma Red Sea ripinapa ae.

³⁷Chungthieng na rouphupa thiempu hla ange keita mahla hekta hana amo ha chu nangei mee mak kange ta Israel sanao ngei ta rilphur ha Moses ae.

³⁸Amo ha chu ramrukka Israel sanao ngei hitta rachun na am ha ange; hana amo chu ani pi pu ngei hita akha chu wanrui na Sinai mullon na Chungthieng na aringrouril pha ah anita rui ah lal pi ange.

³⁹“Chuti weta ani pi pu ngei na maril matrong jui no ae; Mani na amo ta lamhou wa illa houveta mani na Egypt ramtienga lea num meh.

⁴⁰Chunapa chu manina Aron kolla ril kanita lamkai ranga hlawang akha sempi oh, Atun kani ta Egypt ram hai thou wa rui ah shuk spa Moses ha alo ti someh ti dang ni jo weh.’

⁴¹Hana apha ah mani na shil hekti hlawang akha sha weta rithoi tamthoi weta manina shak nang hata ajak ati utta bakha inn ha ah reen ae.

⁴²Chunapa chu Chungthieng na mani hai thou wa mai hai lea ah thiempu abai sunga jiekka shi sha hekta thangwan arshi ta mokrang pe so ae: ‘Israel mee ngei oh! kum somly ramrukka asha that weta nangei katta am ha kei ta no ae.

⁴³Molek dambur ah hlawang hana thou nangei choija phao arshi hlawang Rephan hina ahla; mani ha chu nangei kuttakka amok ranga shakkae chuna sarukka keina nangei ta Babylon ram ma ah phaija ta pi ange.’

⁴⁴“Ani pi pu ngei dambur ra Chungthieng ha ramrukka mani hitta amtol ae naha chu Moses na mari nu juija Chungthieng na makolla sha oh ta ril ha ae.

⁴⁵Ani pi pu ngei maikung Chungthieng na julla hla jat ngei ram ma unga phao wa mani pha dambur inn ha chu Joshuah hitta ronna lutta David apha phao am phur ae.

⁴⁶Chungthieng ringrei ngeipi amo na nie Jacob Chungthieng am rang amunt te pek ranga.

⁴⁷Chuti weta Solomon na inn ha chu sha phur ae.

⁴⁸Thiempu na ril phur ae, “Chungtekty Chungthieng na malmashi ngei na shak inn na ringnum no ae,

⁴⁹Arengpu na ril, ‘wanram hina kaphomlu ae akha chu shimlei na kakae to na ae Ejongpa inn ha kataranga nangna shapi ah chou meh?

⁵⁰Eheilim pa hi kei katak makna sem no meh?’

⁵¹Stephen na hita aril atreem am no ah, eja nangei lung hira chau! “Eja ah nangei lung bit ta chau, Eja ah Chungthieng rouril theino dong chau! nangei hi napi napu ngei hekti chau ae nangei kom apha chang honna muihla athieng ta thinga shi chau ae?

⁵²Thiempu atu ta hal atu tahal nangei pipu ngei na aol ana pek no mee tol meh? Mani na Chungthieng rouril ta kom that ae, amo ha chu apha eja amatienga dangpi adiek mashukha, ae, hana atun hi nangei na amota jurra that ae.

⁵³Chungthieng roukung ta wanrui mak kol hai thou wa nangei pha ha chu ha phao sunga nangei na jui no chou!”

⁵⁴Stephen rou ngei ah am manilim pa na alung sha thou wa aha riel weta alung sha so.

⁵⁵Chuti weta muihla athiengna shi hak ti Stephen na wanram tienga ma an juija Chungthieng ban changtienga Jisu na Chungthieng ahung ajai tolla ngirra am ri pha so ae.

⁵⁶Amona ril, “Anno! keina ri singe wanram enkal honga Chungthieng ban changtieng pa oh, meesanaopa na ngir ra am ha!”

⁵⁷Hana bomtulla am meelim na mani kur ha mani kut takka thing weta rol shukka auw wa woihachak ma am na ah tungna wa sho.

⁵⁸Hupi awao wa rui ah thing weta amo ta alung deng so. Hana meelung ngir ngeina mani linglut banchul ha chu Saul ti spa am na houphur so ae.

⁵⁹Stephen na ao wa, karengpu “Arengpu Jisu kamuihla hi la pi oh!” kokka am lei ah mani na hata alung deng channo wa denga ammeh.

⁶⁰Amo na huk hrun weta sanrol shukka auw, “Arengpu! mani pak hi angei thei pi no oh!” nahi ril weta thi so.