Read Chothe Naga ROMIYA 10 Bible Online

ROMIYA 10 - Chothe Naga bible

ROMIYA 10

¹Ka-u-kanao ngei oh, alota keina kathin kalung lutta kamee ngei lim pa na sanpi pha ranga. Chungthieng kolla keina nie ah aminge!

²Keina hra bakta dang inge ha chu maniha Chungthieng ta lung lutta mokkae. Chuti weta mani mokha adiek tieng no ae.

³Chungthieng na mee ngei hi amo hitta adiek changpi meh ti hi mani na dang no ae hana hutta manina mani lamma tieng thinga Chungthieng adiek ha jui num no ae.

⁴Rouram chu Khrista na rouphun ha chu atreem na so ae, ngoiring lim na adiek chang ange.

⁵Moses na jiekka houphur rouphun jui mee ta Chungthieng hitta adiek pi ange: “Atujong akha na rouphun hana trongsan pek jui mee na ring ange.”

⁶Jieksha rou na, ngoiring jarra Chungthieng hitta diek ae ti hi, hisha ae: “Nathei chakka sai no oh atuna wanram ma kallang meh?” (Hachu Khrista ta rui tum ma ae).

⁷Ano lea atuna simlei athui ah tum mang meh? (Naha chu athi sa Khrista ta rui kalla ae.)

⁸Nahina rila shi chu hi ae: “Chungthieng rouha nakolla nai ah am meh murra akha chu nalung sunga” kani na rouril ngoiring rou ha na hi ae.

⁹Ejonga nangna namur shukka Jisu hi Arengpu ae akha chu Chungthieng na amota athi haithou ringpi ae ngoiring lea chu nangta sanpi ange.

¹⁰Chuna ani Chungthieng hitta diekka anina am mang chu ngoiring hana ae hana mur shukka lalsange ril hana ae anita sanpi pha rang.

¹¹Jieksha rou hana rilleh, “Atujong akha na amota ngoiring lea chu ephao wa ningshi pha no ae.

¹²Nahi na mee lim pa tol sa ae rouram chu Jihudi akha chu gental ta tai na ephao am no ae; Ani arengpu Chungthieng akha chakkae. Atujong amota kok mee na machunga atreem nei no jaihra pe ange.”

¹³Jieksha rou na hita rilleh “Atujongpa limna arengpu ta san ranga kok lea chu amo ha sanpi pha ange.”

¹⁴Chuti weta alota manina amota sanpi rang kokkang sha ejonga manina ngoiring no lea? akha chu alotah mani na thei pha ang sha rouril mee am no wa? Trongshan ha sui no lea alota mani na theipha ang meh.

¹⁵Akha chu alotah rou ron hi ril shukkang meh ejonga rou ron mee hla pi no chu? Jieksha rou na rilhekta, “Eja ah tripi ah hra sha ahra trongsan rou ron phao ngeiha!”

¹⁶Chuti weta lim pa na ahra trongsan ha langno ae Isaiah matak mak na ril phurre, “Arengpu atuna kani rouril hi ngoiring meh?

¹⁷Chuna ngoiring hi rouril theiphaveta pha ae, hana rouha Khrista maram ma sui weta shukkae.

¹⁸Chuna keina sai inge: Adiek takka manina rouril hi thei no wa meh? Jieksha rouna rilleh routakka chu: “Mani sanrol hana atarah ha simlei lim ma thange; hana mani rou ha alei ram lim ma tung pha ae”

¹⁹Woiha pa keina sai inge: Israel mee ngeina nahi dang no wa meh? Moses masha makna masha tekka sange: “Keina nangeita mee jati adangna anda rang sem mange; akha chu jaty adangei ta lungmo piveta kamee ngeita lungsha thana shukpi ange.”

²⁰Isaiah na atri am no lutta ril, “Keita jongno mee kom keina tuk kae; hana keita sai no ngei ta keina katak mak manita ri pi inge.”

²¹Chuti weta Israel ngei taranga amo na rillea, “Rungnie chang honna keina mani aril juino akha chu anda am manita kakut dokka manita hakka aminge.”