Read Chothe Naga ROMIYA 11 Bible Online

ROMIYA 11 - Chothe Naga bible

ROMIYA 11

¹Chuna keina sai inge: Chungthieng na mamee mak ngeita ngeino wa meh? Ano ae! kei katak makkhi Abraham atu ate inge, hana Israel sanao, Benjamin sakai sunga thou inge.

²Chungthieng na athou hai thou wa mahal sha ngeita ngeinum no am no ae, Elija na Israel chunga Chungthieng kolla sem meh, nahi ajiek abai sunga am hi nangei na dang no wa chou?

³“Arengpu mani narouril thiempu ngei kom that sho ae, hana maicham ngei kom hri ah hou so ae; kei chak sho ae atun hi. Chuna keita kom mani na that tanga jonga ammeh.”

⁴Chungthieng na makolla ejongpa sang meh? “Keina kut ta sem hlawang mokno mee lasing sari kataranga shi inge”

⁵Hahekta Chungthieng jarra lungshi ah mahalsha ahre chak am so ae.

⁶Malungshit chu makut chunga am meh, mani ae na tullu ma no ae rouram chu ejonga Chungthieng na mani lu tullu nu jui ha lea chu malungshit ha athieng lungshi ano ae.

⁷Chuna alowa jou meh? Israel ngei na jonga am tukpha no chu, Chungthieng na hol mee atomte na chak na ha tukphurre adang alem ngei ha chu Chungthieng na kok thei no ae.

⁸Jieksha na ril chu hekta, “Chungthieng na mani lungrang akha chu lung dol piso ae. Chuna awoni hai thou wa mani na ri kom ri ang nie jo weh. Hana thei kom thei ang no ae”

⁹Hana David na rillea, “Mani reen tang hana changa munt hekta aol ana pha shu oh; hana mani na tu weta mani ha dandi pha shu oh!

¹⁰Mani mitkom cho shu oh hati lea chu mani na ri nea angno ae; akha chu apha chang honna aol ana pha ah am shu oh.”

¹¹Chuleh chu keina sai inge; Jihudi ngeina nahana kae mathui ah tu juija maniha amang atah pha jo meh? Ano ae mani kae mathui hana Gental ngei na aringkaetlo pha na change. Chuna Jihudi ngeina kom anar shu oh tina sa ae.

¹²Jihudi ngei pak hana simlei chunga alok jaihra pha na change akha chu mani muihla sul jarra Gental ngei na jaihra pha ae. Chuna ejonga Jihudi limna najaihra makhei pha lea chu eja makhei tam jaihra ang sha!

¹³Gental nangei kolla atun chu keina rilla aminge. Gental nangei karra rouril akha changa ka am lei lim chu katullu ah apel chang inge.

¹⁴Routakka chu kamee ngei makna anarveta mani kom ahre chu sanpi pha shu oh.

¹⁵Chuna manina ngeinum no jarra Gental ngeina Chungthieng ta mel dangna changso ae, akha chu anda mee hai thou wa atonpi wul so ae ejonga mani na la siel lea chu alo ti ang meh? Hana chu athi hai thou aring pha ange.

¹⁶Ejonga masha ah budol ha Chungthieng ta pe lea chu hana am budol lim pha ha kom mata ae. Aka chu ejonga thingkung atro ha Chungthieng ta pe shu lea chu abak ngei lim kom mata ae.

¹⁷Chuna aling churuphal bak ahre na tikka ramna churuphol bak hanu jumma kolom sem ma churuphol bak changa ra so ae, hana nangei Gental ngei hi ramma churuphol kung jong pa ae chuna atun chu nangeina Jehudi ngei hekta namuihla rat ranga saruk pha tol so ae.

¹⁸Chuna sarukka nangei na abak atikhata lungherno oh, nangei chu abakkae abak na atro ta ron no ae, atro na nangeita ronpi ah am sa ae.

¹⁹Chuti weta nangna ril kom ngei ae, “Oh weh, chuti weta abak hana tik sarukka keina makolla tou wa hanga inge ta.”

²⁰Naha routak kae, manina ngoiring no sarukka mani ha tikka sa ae, mani hut silla amunt hana am ha chu nangna ngoiring sarukka ae. Chuti weta lokchok ti no oh; hana hutta atri oh.

²¹Chungthieng na Jihudi ngeita tan hou ah no ae, abak amsa hajong hekta; nang ta kom tan hou ange ta ejonga halla che?

²²Hina ani na ripha nea ae Chungthieng hi eja ah lungshi thei meh akha chu eja ah ranga meh, thingbak tiksha ngei taranga eja ah rang chuti weta nangei ta chu eja ah lungshi sa. Chuna ejonga malungshitna nangei na ngei num no lea nangta kom hahekta tan na hou ange.

²³Ejonga Jehudi ngei na mani ngoiring nohi hata hla no wa am lea chu, mani hata Chungthieng na mani amphur na amunt hana rui ah lea weta shi ange maram chu naha Chungthieng ae na ae.

²⁴Gental ngei hi ramma tou churuphol jongpa ae chuna aphun na abak ha tanna houveta aphun churuphol kunga jam meh Jihudi ngei ha ating churuphol kung jongpa ae, aphun churuphol kunga atik abakha ta lea ah jom sier pa na tetta Chungthieng kolla lella leitekkae.

²⁵Athuppa shi rou am meh ka-u-kanao ngei oh. Keina nangeita kom dangpinum minge, nahana nangei na thei unge singunge ta halno rang sa ae. Tichu Isreal ngei na lung hirra am hi hatachak am mang no ae gental nangei na Chungthieng kolla susimta lut phao jui ah phao chakkange.

²⁶Chuna hita ae ah Isreal ngeita san ranga jieksha rouna rile, “Sanpipana Zion hai thou ah phao ange hana Jacob atu ate kar hai thou hrano lim julla hou ange.”

²⁷Keina mani pak shil pi shu jui ah manita keina angei chak rou si ange.”

²⁸Maram chu manina ahra trongsan ngai num no ae. Gental nangei sarukka jehudi ngei hi Chungthieng jekna mee ae Chuti weta Chungthieng na ahalsha sou chu manita Matonpi changpi ae Maram chu mani pi pu hana jarra.

²⁹Tichu Chungthieng hina malungden hi ahlong am no ae mahal sha ngei akha chu jaihra mapek sa ngei ta.

³⁰Gental ngei hi amatienga chu Chungthieng aril atrong jui no ae Chuti weta atun chu Chungthieng na ringrei ngei pha tuk so ae, maram chu Jehudi ngeina aril atrong juino sa rukka.

³¹Chuna nangeina maring-rei ngei pha hekta atun chu Jehudi ngei kom Chungthieng ringrei ngei pha ranga aril jui nijo weh.

³²Chuna Chungthieng na malmashi ta aril atrong yuino rang hunga si-ae, chuti lea manilim ta maringrei ngei ha ri pi ange.

³³Eya ah lokka meh Chungthieng neidon hi! Eja ah thukka meh malungsing lungwar! Atuna ma lung hata ril nea angsa? Atuna malam hi dangne angsa?

³⁴Jieksa na rilchu hekta, “Atuna arengpu Malung halta dangne angsa? Atuna amota ahra rou pe nea angsa?

³⁵Anoleh, arengpu kolla masha pe weta arengpu kolla haithou pha ang mee atu ammeh?”

³⁶Rouram chu eheilimpa hi makutsem chakkae akha chu eheilimpa hi makolla hai thou chakkae, chuna makolla Chungthieng hina mahung majai ha atreem nei no wa am shu oh! Amen.