Read Chothe Naga ROMIYA 12 Bible Online

ROMIYA 12 - Chothe Naga bible

ROMIYA 12

¹Chungthieng na lokka maringrei ngai hana jarra ka-u-kanao nangei kolla keina roudoh ah aminge; Chungthieng na lungshit ranga nangei pum ha aringa kat pot changa, akha chu matullu tarang peya amota ariemna changpi oh nahi diekka mokrang nangei ae phung shuk kae.

²Chuna natakmak simlei simsak waisak nu yuino oh, chuna hutta nangei sunga akha chu lunghal ha Chungthieng ta hlongpi oh, chutile nangeina Chungthieng na ahalha dang na ange eyong pana acha mo mariem na mo akha chu adiek moti ha.

³Maram chu Chungthieng na keita lungshi ah pek khuthul yarra keina nangei limpa ta na rou hi rilling nangei natakna hal phungsuk hata heldonna hal thing no oh. Chuna hutta natak makna natakta routreem weta Chungthieng na pekka am nakolla ngoiring hana chak hallo

⁴Ani pumma kajat atam amhom meh chuna na kajat lim hi mata mata tullu adang, adange.

⁵Chuna chu hekta ani limpa hi kom Khrista Jisu pum ma akha chakkae, akha chu ani kajat lim pa hi adang adang halkom pumma am limpa hi jom hlak hek ti ae.

⁶Chuna Chungthieng na anita malungshit ta pek adang, adang khuthul anu juija anina thinga taso ae. Ejonga Chungthieng na anita rourillanga pek khuthul am lea chu anina ngoiring nujuija ae tah ae.

⁷Ejonga hlou ae ranga lea hlou ron tah so ae, ejonga chupi takpi ang nga lea anina chupitakpi tah so ae

⁸Ejonga adangeita thanum thawaopi ang am lea chu na tullu ha ae su oh. Ape mee amona apam am no lutta pesu-oh alu ching ngei nako lung lutta lam kai su oh. Atujong akha na ringrei ngei thei lehamona kom ariem ariemma ae pi shu oh.

⁹Lungshi tichu leima lung thieng anga ae, hrano tah atierro, hana ahra ta chetta kollo.

¹⁰Khristen uleh nao ngei hekta akha lea akha lungshi hlakko. Akha chu akha lea akha ajak atri hlakko.

¹¹Ngam ratta ae oh, adol no oh, nalunglimna arengpu matun mahlou hrabakta ae oh.

¹²Na lungrang hina nalung ariemma am mo, naol na nat pha jui adongthei oh. Hana apha chang honna niyo.

¹³Na am nadon ha natonpi sara Khristen ngei hitta pha ha pi oh, akha chu hulhang ngei ta na inna tungpi oh.

¹⁴Nangta aol ana pe ngei ta jaihra pha rang Chungthieng kolla nie oh sarkou no oh.

¹⁵Ariem ma am ngei hitta ariem ha oh, trappa am ngei hitta trap tollo.

¹⁶Akha lea akha chakka ngai lhakko, keina theitek mee sangeta lokchok tino oh, chuna natullu lu juija lu bu-a nolukka ae oh.

¹⁷Atu jong akhana nakolla diek no tullu lu juija makolla nangna diek no tullu lepi no oh, chuti weta meelimna an juija lung lok tullu lu tirang ae oh.

¹⁸Na ae nea tullu eheilim ma meelim na adai ah ring rang ae oh.

¹⁹Mee kolla malungsui eko ae no oh katonpi ngei oh. Chungthieng malungshat tukrang amsu oh maramchu. “Arengpu na ajieksi rouna rille, “Keina malungsui ange, keina kut lea ange, Areng pana rille.”

²⁰Hana hutta jieksa rouna hitta rille, “Ejonga nangta anda mee na awon tam lea amota bakpi oh, atui ralle chu in pi oh, maram chu hita ae hina amona ayakka kang ange.”

²¹Hrano na nangta nea no shu oh, Hana hutta ahra na hrano ta nepi oh.