Read Chothe Naga ROMIYA 14 Bible Online

ROMIYA 14 - Chothe Naga bible

ROMIYA 14

¹Ngoiring shulla am ngei ta ariem ma lam tukko, hana mani ahalhako hatta trong wuk hlak no oh.

²Mee akhana mangoiring jar hana amona eheilimpa abak ngai aeta bakke. Chuti weta ngoiring shul amona chu andiek nadiek chak bak ae.

³Atujong eheilimpa bakpa hana atu jong bak no amota atir no su oh, chuna bak een no amona kom abak amota routreem no su oh, maramchu Chungthieng na amo talah pi sa ae.

⁴Mee adang suukta routreem nangha atu cha meh? Mamitpu am meh amona ngir pi ange ti ha hana tu pi ange ti hal kom makut chunga am meh. Akha chu amona ngir pi ange maram chu arengpu na amota ngir pi nea ae.

⁵Mee akha na chu rungnie akha na rungnie adang ta hella cha lekketa maru ui nie ae, hana adang mee akha na chu rungnie lim pa hi akha rukkae ta. Chuna meelim pa na mahal, mahalha lungranga thienga danga hata lingno wa ngir su oh.

⁶Chuna atun jong amona rungnie akha na hella hra tekkae ta hal mee amo kom Chungthieng ta ajak atri ah sha ae. Rou ram chu eheilim bak ranga Chungthieng ta ariemma domma am meh. Hana atu jong bak num no amo kom arengpu ta ajak atri sa ae. Hana amona Chungthieng ta ariemma doma am meh.

⁷Ani sunga atu akhana ko matheichak taranga ring no ae, ani sunga atu akkana ko mathei chak tarang thino ae.

⁸Ejonga ani na ringle Arengpu taranga ae ani ringhi, hana ejonga ani na thi lea arengpu taranga ae ani thithi. Chuna sa rukka thi hal kom ring hal kom ani hi arengpu ta sa ae.

⁹Maramchu Khrista na thi weta woiha ringa thou hi. Aring akha chu athi hina Reng changranga ae.

¹⁰Andiek nadiek chak bakka am nangna alo sarukka na-u-nanao kolla routreem ae am che? Akha chu eheilimpa bakka am nang na alowa na-u-nao ta namit thuija ansi na che? Ani limpa hi Chungthieng maikunga routreem ranga ngir ang ruk kae.

¹¹Tichu jiek sha rouna ril lea, “Keihi adiek aring Arengpu Chung nga Chungthieng inge, Arengpuna rille, mee lim na ka mai kunga huk hrun ange hana meelim pana kei hi Chungthieng ae ta rilshuk kange.”

¹²Chuna meelim pana ma-ae ma aena lim Chungthieng kolla pe ange.

¹³Chuna akha lea akha routreem ae hlak ha chan sei oh, hana hutta, na-u-nao akha kolla kae ma thui weta pakka lut no ranga nalung ngir ro.

¹⁴Arengpu Jisu hitta ka am hana jarra dangpha inge, tichu thieng no abak ah een ekom am no ae; Chuti weta ejonga mee akhana thieng no abak ah een ae ta halle chu na ha mataranga thiengno chang nge.

¹⁵Ejonga nabak na een pot hana na-u-nao kolla tong lea chu, nang na lungshi ing tina am no ae, Khrista na mahut shilla thit na ha nabak pot hana amang shuk pi no oh.

¹⁶Chuna ahra aeta nangei lim ha hrano aeta ril shuk pino oh.

¹⁷Rouram chu Chungthieng reng ram chu abak ah een na no ae. Chuti weta adiek, adai akha-chu ariem tarang muihla athieng na pek sa-ae.

¹⁸Atu jong akha na Khrista hita tun hlou ron na am ta lea chu Chungthieng amota ariempi ae hana mee adang ngei na kom amota domange.

¹⁹Chuna sarukka anina pha chang honna ani hi akha lea kha ta thanum pi ah kha chu adai hata choija kha lea kha arat shukpi anga ae.

²⁰Abak ah inn sarukka Chungthieng lu tullu ha mangpi no oh. Eheilimpa bakka ngai chakkae, Chuti weta atujong akha ta pakka tul ang ha chu bak een ha adiek ah no ae.

²¹Unao ngeita kae mathui pha ang saruk chu ameh bak, ju een no pa na hra tekkae hina maram ma.

²²Chungthieng lea nanui karra nangoiring ha chetta sih oh. Adiek keta marou treemsa chunga lalle ta halno meeha yairha ae.

²³Chuti weta nabak na een hana chingna lea chu, Chungthieng na amota mabak ma een hana neinunt pe ae, maram chu ma ae shuha ngoiring jara no ae. Hana eheilimpa ah ngoiring jarno lea pakkae.