Read Chothe Naga ROMIYA 2 Bible Online

ROMIYA 2 - Chothe Naga bible

ROMIYA 2

¹Katonpi ngei oh mee adang chunga routreem chau meh? Chuna sarukka atu hal atu hal kom nangei ta ngakpi rang am no ae. Maram chu nangei na nangei routreem mee ngei ae hekta ae chou ae, nang kom nathei ah aol pha ah am che ae.

²Chuna hijongpa tullu hata ae ah am sha ngei chunga Chungthieng na routreem ae juija adiek takka ae ti hi ani na dange.

³Hana sarukka hijongpa tullu hata ae ah am weta mee adangei ta routreem ae ah am hana nangei Chungthieng routreem rungnie ah nangei na ae hlan ang ae ta halla am chou?

⁴Ano lea ejongpa nangna Chungthieng chu lungshi thei ae akha chu dongthei ae Chungthieng mahrat hana lung hlong ranga lamkai pi ae ti hi dangno chou ae?

⁵Chutiweta nalung hir hana nathei chakka Chungthieng na alungsha ah diekka routreem mang nangei ta lella aol ha soma ma ah am che ae.

⁶Ropuram chu Chungthieng na mee limta ma tullu lu na nujuija lommant peh ange.

⁷Malmashi ahre na chu ahra tullu hata ae ah thi lou ringchang jonga mahung majai ta ajak atri ae, Chungthieng na mani ta samla ringchang pe pi ange.

⁸Mee adang ahre na mathei chak taranga halla adiek tullu ta ngeinum no wa hrano tullu nujuija am manita chu Chunthieng na malungshat ha machunga bun nange.

⁹Hana juija hrano tullu lu ngeina aol ana pha ange masha ah Jihudi hana jat adang ngei ae.

¹⁰Chuti weta Chungthieng na ahra tullu lu lim ta chu ajak atri mahung majai akha chu adai ha masha ah Jihudi hana jat adang ngeita pe ange.

¹¹Rouram chu Chungthieng na meelim ngeita eichang ei oui nei no wa akha chakka routreem ae ange.

¹²Jat adang ngei na chu Moses hina rouphun am no ae chuna manina rouphun hai thou wa pak tullu lu ah mange. Hana Jihudi ngeina chu rouphun am meh chuna mani pakkha rouphun na routreem ange.

¹³Chuna rouphun hana thei hana Chungthieng hitta mee ngei ha diek pi ah no ae chuti weta tullu chunga ae ngei ha ae.

¹⁴Jat adang ngeina rouphun ha am no ae chuti weta ehalkom mani kom mani phun am meh. Moses rouphun ha am no hal kom.

¹⁵Mani semshak hana ri pi ae manilung sunga jiekka am sa rouphun ha hana mani lunghal hana kom na hi chu adiek takkae ta ri pi ae, hana mani lunghal na ejong juija manita neinunt pe ae ejong juija manita ngakpi ae.

¹⁶Chuna ahra trongsan hana anu juija keina nangei kolla rourillinge, Chungthieng na Jisu Khrista jarra meelim athup lung halim ha routreemni rungnie hek ti ange.

¹⁷Nangei chu alo ti meh? nangei thei chakka nangei n a Jihudi unge ta hal chou ae; nangeina rouphun hana beija Chungthieng maram ma lokchok ti chou ae.

¹⁸Chungthieng na nangeita ae pi num madit ha nangeina dange, adiek hi halne rang rouphun hai thou wa chu pha chou ae.

¹⁹Adiktakka nangei na mitcho ngeita lamkai anga ae hana nangei hi athiem ta awar chang anga ae.

²⁰Akha chu lungmo ngeita chupi takpi anga ae dangno theino ngeita kom. Nangei kolla adiek hana lungsing lungwar lim ha akha chu rouphun na nangei chunga shihakta am meh.

²¹Mee adang ngeita machupi ha nangna natakta chu alowa natakta chu pi no che? Hana malmashi pot ru no oh ta nachupi ha nang chu ru wa am che?

²²Nangna meenamei lalno oh narilha nangchu lalla am ma che? Kutta sem hlawang ta atierra am nangna athieng inn sunga pot ru wa am ma che?

²³Nangna Chungthieng minga rouphun ha kani kolla am meh ta lokchok na am ha nang na rouphun jui num no wa Chungthieng minga ajak tuk pi che?

²⁴Jiekka shi sa rou na rillea, “Jihudi na ngei sarukka jatadang ngei na Chungthieng ta hrano rou trong shukkae.”

²⁵Ejonga nangna rouphun hana rilla shi jui ta lea asar natan ha hra ae hana ejonga nangna rouphun hana ril jui no lea asarnatan ha tan no hek ti ae.

²⁶Ejonga asratan no jat adang ngeina rouphun hana rilla si ha jui lea chu Chungthieng na mani ha asartanngei hekta hallang no meh?

²⁷Chuna Jihudi nangeita jat adang ngei na neinunt pe ange rouram chu nangei na rouphun hata jui no ae. Ajuirang jiekka am halkom akha chu asartan halkom. Chutiweta mani chu pum ma asartan no hal kom mani na rouphun hata hrabak ta jui ae.

²⁸Athieng Jihudi atu meh thienga ah sartan ha? awao wa asartan hana Jihudi apa ha ano ae.

²⁹Hata hella athieng Jihudi ha chu asunga Jihudi changei ha ae, ha chu mani lunga asar tan shu so ae Chungthieng muihla hana tullu lu akha chu jieksha rouphun haithou ae. Hajong mee ngeiha mee kol haithou no lutta Chungthieng haithou adom pha ange.