Read Chothe Naga ROMIYA 3 Bible Online

ROMIYA 3 - Chothe Naga bible

ROMIYA 3

¹Jihudi ngeina jat adang ngei ta hella ejongpa hra tek pha ah meh? Ano lea mani asartan hana ejongpa amant tam tek na am ma meh?

²Chuna eheilim lam ma Chungthieng na Jihudi ngei kolla ma sha ah marou hla mee sa ae.

³Ejong ahre na ngoiring no sarukka Chungthieng ta eko no hekta hallanga mo?

⁴Naha ano ae! Chungthieng chu adiek ka am sa ae. Malmashi ngei na murthei halkom jieksa rou na hita rilla shi ae, “Narou ril juija nangna adiek ha ri pi anga ae; nangta routreem ae juija nangna ane chang anga ae.”

⁵Chuti weta ejonga ani tullu lu na diekno weta Chungthieng adiek hana dangpi ah ani tullu ma malungshat pha na Chungthieng ae hi adiek no weh ta rillanga meh?

⁶Naha chang no shu oh, hajong ha alea chu Chungthieng na alota simlei ram hi routreem ae ang sa?

⁷Chuna ejong kahratno jarra Chungthieng hina adiek akha chu mahung majai ta keina tieng hella ahra tullu tienga danga takshuk pi lea eje sarukka keina jaishi akha ae ta olla amang sha?

⁸Chuna ani na ahra shuk ranga hrano ae ei oh ta alowa rillang no meh? Narou hina sarukka keita mani na ajak pe ae. Manina pha phung shuk dandi ha hata pha ange.

⁹Hra so ae, ani na Jihudi akha changa jat adang ngei ta hratek na am jou meh? ephao am no ae! keina nangei maikunga hra bakta takshuk phur sange, Jihudi akha kom jatadang lim pa hi pak arat thuija am meh.

¹⁰Ajiek sha rou hana hita rilla am meh: “Atu akha ko ahra am no ae.

¹¹atu akha amno ae lungsing lung war am no ae akha chu Chungthieng ta mok am no ae.

¹²Malmashi lim na Chungthieng hai thou wa mai hei lea hap so ae; maniha dieklou lam ma thing hap so; atu akha na adiek tullu lu nijo ae, atu akha phao na.

¹³Mani rou lim hi athi sa murthui hekti so ae; hana mani lei ah hrano na hleppa shi so, akha chu mani rol ha hlan har hekti ae, hana mani mur na arul tur hek tina;

¹⁴mani rou ril hi sharkou sanai akha chu akha na shihak ti ae.

¹⁵Mani na leima ranga alem akui akha chu meethat ae;

¹⁶Mani ha athat amant ranga chu range.

¹⁷Mani na adai hana lam dang no ae,

¹⁸mani na Chungthieng ta ajak atri am no ae.”

¹⁹Atun chu ani na rouphun na ril eheilim pa ha dang so ae, nahina ril chu rouphun hana thuija am ngei ta sha ae chuna mani lim na amur ra dai ja amveta na simlei ram lim hi Chungthieng routreem pha ranga sa ae.

²⁰Chuna atu akha am no ae Chungthieng ningtinga adiek am no ae rouphun hana tullu lu halko. Hana rouphun na tak chu malmashi hi pakchel ae ta chak dang pi ah sa ae.

²¹Chutiweta atun chu Chungthieng na mee ngei hi amohitta adeik chang rang ri pi phur so ae. Nahi chu rouphun hina ephao saruk tol no ae, Moses na pek phur rouphun hal kom akha chu thiempu ngei na hana taranga ngir pihal kom.

²²Chungthieng na Jisu Khrista kolla ngoiring ngei ta amona diek pi ae. Chungthieng na Khrista ta ngoiringlim ta na tullu hi ae na rouram chu malmashi lim hi adang, adang tina am no ae

²³Malmashi lim pa na pak chel jarra Chungthieng hina ahung ajai am na hai aram lah ah am meh

²⁴Chuti weta Chungthieng lungshi thei hana ariem salla adiek ahra ha Khrista Jisu majarra hai thou wa pe so ae hana mani takom amant salla hla pi so ae.

²⁵Chungthieng na amatinga hrano pak tullu limpa ha mathit mathee hana akha chu mani ngoiring hana jarra madongthei hana sarukka pak lim pa sil pi so ae amona nahi ae na chu makolla adiek ha ri pi ranga ae.

²⁶Atun apha hina malmashi ngei na amo mak khi adiek takkae ta dang ranga akha chu Jisu ta ngoiring ngei ta kom thiengpi nea ae ta dang shu oh ti na ae.

²⁷Chuna ani na lokchok ti rang am ma meh? Ano ae! Chuti lea chutina maram hi eja meh? Rouphu ril jui sharukka meh? Ano ae, chuti weta ngoiring hana ae.

²⁸Chuna anina atreem na ah chu mee hana ngoiring hana jarra Chungthieng na diek pi ae. Akha chu mani na rouphun hana pek rou tullu lu sarukka no ae.

²⁹Anoleh Chungthieng hi Jihudi ngei tarang chakka Chungthieng ah meh? Ano lea jat adang ngei Chungthieng ano wa mo? Jatdang tarang kom ah sa ae.

³⁰Chungthieng chu akha chakkae amona Jihudi ngei kom mani ngoiringnu juija diekpi ange. Akha chu jat adang ngei kom mani ngoiring hana jarra dikpi ange.

³¹Hina rilla shi ngoiring hana sarukka anina rouphun ha denga hou anga meh? Ano ae eko ano ae deng ang hutta anina jumma shi anga sa ae rouphun ha.