Read Chothe Naga ROMIYA 6 Bible Online

ROMIYA 6 - Chothe Naga bible

ROMIYA 6

¹Ani na alota rillei ti meh? Chungthieng lungshit tamtek ranga anina pakka am ri ei ti meh?

²Ano sa ae! ani hi pakka thi so ae chu ti lea ani na alota pakka ring ranga amanga meh?

³Nangeina suino wa danga am mange anina tuisounga baptias Jisu hita ae ha lei ah anina mathit hana ani kom thi tol so ae.

⁴Anina baptias ae hana amo hitta phum ha so ae akha chu mathit tum ha pha tol so ae. Khrista ta athi haithou wa mapa Chungthieng arat mahung majai tolla ringpi so ae, chuhekta anina athar ringchang ring ranga ae.

⁵Ani na mathit hekta thi ha sou chu maring hekta ringthou ange.

⁶Hana ani dang ha sha ae chu ani alui ringchang hi ma khross chunga thi tol so ae ti lea ani pakka am pum hi mangpi so ae. Chuna sarukka ani na pak hina kor changa am ni jo weh.

⁷Chuna meena mathit juija amo ha pakarat hai thou wa shukka thingso ae.

⁸Hana ani na Khrista hitta thi ha sou chu ani ngoiring chu amo hitta ring ha ange.

⁹Hina rou ram chu Khrista na athi hei thou wa ringthou sa ae anina dange. Hana woiha lea ah athi am mang ni jo weh. Athi hana machunga ephao nea ang ni jo weh.

¹⁰Chuna sarukka amona thi ah pak na machunga ephao ae nea no weh chuna atun chu maring chang ha Chungthieng hitta munha ah ring ha so.

¹¹Chuna chu hekta nangna kom hallanga ae natak hi thi so ae pak lam ma halhlak juija chutihal kom Khrista Jisu majarra ringchang hi Chungthieng hitta ringha so.

¹²Tuija mang ang pum hina chunga pak ta nea pi ja hana mani dit eja juipi ah am no sa oh.

¹³Napum ma sarukka akha phao wa hrano pak tullu lu ranga pe thing no oh, hana hutta napum lim ha Chungthieng taranga pe oh athi sa hai thou wa ringchang ronna phao ranga hana ahra adiekka ae rang napum lim pa pe oh.

¹⁴Pak ha namitpu no ae; rou ram chu nangna rouphun hana thuija ringa am no ae chuti weta Chungthieng lungshit thuija ae.

¹⁵Chu lea chu, Ejameh? ani na pak tullu lu ri ei ti meh, rouram chu rouphun hana thuija am no ae ta, hana Chungthieng lungshit thuija am meh ta? Ano ae!

¹⁶Nangeina dang ange ta hallinge nangna natak ha atu jongpa akha hana kor tarang napek su juija routakka namitpu hana ril ha jui ranga kor sa ae. Pak aleh chu nangta athija lamkai ange, ano lea aril jui mee lea chu nangta dramochel pi ange.

¹⁷Chuti weta Chungthiengta riemma dom shu oh! rou ram chu apha akha ah nangna pak hina kor changphur hal kom nangta chupi takpi napha hana nangna nalung songa adiek ka tukso che.

¹⁸Chuna nang hi pak kum ma hei thou washukka thingso che, hana atun chu dramochel ngei hina kor chang so che ae.

¹⁹(Keina ani am ha sa hekta trongsinge nangeita rouram chu nangei ringchanga pak hina kor changa am sarukka) apha akha ah napum limpata thieng no hrano tullu lu ranga napek phur ha chuhekta atun hi nangna napum limpa ha dramochel ngeitaranga akha chu athieng tullu lu ranga pe oh.

²⁰Nangei na pak hina kor changa am leija nangei na lu num tullu hana adiek hei thou wa thing phur ae.

²¹Atuna ajak tukka na am na lu tullu hana ejongpa kana pha cha meh?

²²Chuti weta atun chu nangei hi pak kum hei thou wa shukka thingso ae. Chuna nangei hi Chungthieng hina kor so ae. hina natung chu naring chang limpa makolla pek hana samla ringchang pha ang ae.

²³Rouram chu pak ae na amant chu athi ha ae chuti weta Chungthieng hina pek chu arengpu Jisu Khrista jarra samla ringchange.