Read Chothe Naga ROMIYA 8 Bible Online

ROMIYA 8 - Chothe Naga bible

ROMIYA 8

¹Khrista Jisu hitta am ha sa ngei taranga atun chu neinunt non rang am ni jo weh.

²Muihla tieng nga rou phungna ring changta Khrista Jisu hitta am ha rang ruiphao pi so hana pak athi kum sunga hai thou wa keita hla pi so.

³Rouphun na ae pi nea no ae rouram chu malmashi ring changna sul jarra asanao pa ta malmashi ringchang tul shukpi weta hajong pak ha hourang sarukka malmashi mel hekta hlapi.

⁴Chuna pum nutienga thingno lutta muihla nutieng jui anita rouphun hana rilha tung ranga ae.

⁵Malmashi pum ringchanga ringa am ngeina hata pum taranga hallea chuti weta muihla nutieng jui ngei na muihla na adit ha ae.

⁶Pum anu juija ringa am mani hina atreem na chu athi ha ae, hana muihla nu jui ja am na atreem na chu aring akha chu adai pha ae.

⁷Chuna malmashi ringchang tulpa na nea ah ringa am lea chu amoha Chungthieng ta jiekna mee ae rouram chu amona Chungthieng rou ril jui no wa ae hana jui kom jui ang no ae.

⁸Malmashi ringchang tul juija am mee ngei na Chungthieng ta lungshi nea ang no ae.

⁹Chuna nangei ringchang tulla ringno oh, hana hutta muihla na ril lam ma ringo. Ejongpa routakka Chungthieng muihla na nakolla am lea chu, hana atujong ngei na Khrista hina muihla amno wa ringa am lea chu amo ha chu makolla Khrista mee no ae.

¹⁰Chuti weta Khrista nakolla ringa am lea chu, muihla na nangta ringchang pe ange. Rouram chu nanghi Chungthieng am na ah thiengpi sa ae. Napum na pak sarukka thi su hal kom.

¹¹Jisu Khrista ta thi hai ringa thou pi Chungthieng muihla na nakolla ringa am lea chu athi hai ringa thou Khrista amona nang ngei pum hita ringchang pe ange nangei sunga am ma muihla ha na jarra.

¹²Chuna uleh nao ngei oh, anina ae ang akha chu am meh ha chu ani ringchang tulla adit hana anina ring no tah so ae.

¹³Rouram chu ejonga nangna naring chang tanna ringa am lea chu athi pha ange. Chuti weta muihla na nakolla ring lea chu pak luna tullu ah thi pi hal kom nangna aring pha ange ae.

¹⁴Chungthieng muihla na lamkai ah rol ngei ha Chungthieng sanao ngei ae.

¹⁵Chungthieng pek muihla na nakolla ephao wa meeshuk meekor changpi ang no ae hana ati pi ang no ae hana hutta muihla na nangta Chungthieng sanao ngei changpi ange hana muihla jaitha na Chungthieng am na anina “Apa! Kapa!” kokkange.

¹⁶Chungthieng muihla mak na ani muihla ah tolveta ani hi Chungthieng sanao ngei aeta phu shukkae.

¹⁷Ani na masnaongei chang sou chu mamee ngei taranga mashi jaihra ha ani kom pha tol ta so ae akha chu Khrista taranga Chungthieng na mashi ha kom pha ange; rouram chu ejongpa anina Khrista hina aol saruk ja tol lea chu anina mahung majai ha pha ha ange.

¹⁸Keina hallinge atun apha hina aol ana lim hi anutienga ani ta mapek kang mahung majai hitta anhlak ngai an no ae.

¹⁹Makutta mashem limna Chungthieng masanao pa ta mari pi ang ha hakjou no wa hakka am meh.

²⁰Rouram chu makutsem makhai na ephao kaneno wa am hi mani ae no ae nahi Chungthieng ahalhana ae shukpi sa ae, chu phao sunga asa chu am songe.

²¹Chuna nahi chu makutsem lim na amang hana shuk changa am halkom hla pi ange. hana juija chu Chungthieng sanao ngei na pha mahung majai ha pha tollange.

²²Atun apha hina anina na dangpha chu makutsem lim na ana kou ah am meh, unga don ang tieng hekta.

²³Chuti weta nahi makutsem ngei chak na ana kou no ae Chungthieng na masha ah pek muihla ani sunga ana kou ah am ae, anina Chungthieng masanao pa chang ranga hakkae akha chu ani pum lim hi hitta sanpi ranga.

²⁴Chuna ani na lungrang hina sarukka anita sanpi so ae; chuti weta ani ri hata lungrang alea chu naha adiek lungrang no weh maram chu atujong na ejong mari hatta lungrang ae ah am meh?

²⁵Chuna ejongpa anina ri no hata lungrang ae chu anina dong thei ah hakka am meh.

²⁶Chuna chu hekta anina sulla am lei ah athieng muihla na jungveta sanpi ae, rouram chu anina alota ni ang meh ti phao dang no ae. Hana muihla mak na Chungthieng kolla ani ril nea no rou ha rilla pi ae.

²⁷Hana ani lung ta ri pi ah am Chungthieng na muihla hana ejongpa mahalla am ha dange. Rouram chu muihla na mamee ngei hutta Chungthieng kolla mahal nu juija nipi ae.

²⁸Anina dangpha ae Chungthieng na amo ta lungshi ngeita ti chu, mahal anu juija kokpi ngei hata ahrat ranga tullu lim ae ha pi ae.

²⁹Chungthieng na masha ah ahalsha ngei hatta masanao pa hek ti pi so ae. Chuna asanao pa hana ulenao ngei lim karra masha pa ae.

³⁰Hana Chungthieng na adanga halla shi ngei ta kom amona makok ngeita amo hekta athieng changpi ae akha chu amona mani hitta mahung majai ha pha ha pi ae.

³¹Hilim nahina sarukka anina alota ril leisha? Ejongpa Chungthieng hi ani ta lea atu na anita e ae nea ang meh?

³²Amona masanaopa ta kolla shi no ae. Chuti weta amona anitaranga pe ae. Amo na eheilimpa anita pe ang no meh?

³³Chungthieng ahal sha ngeita atuna e ae nea ang meh? Hana Chungthieng na thieng pi sha ngeita kom!

³⁴Atuna manita neinunt pe anga meh? Thi weta ringa thou Khrista Jisu na Chungthieng ban changtienga am weta anitarang rou ril pi ah am ha.

³⁵Atuna Khrista hina lungshit hai thouwa hran pi nea ang meh anita? Aol ana,butang jutang anoleh pun nie sal hana mo, anoleh champ seina mo ae.

³⁶Jieksha rouna hita rillea: “Nangei sarukka kanina apha chang honna thi ang eja pha unge, kanita athat tanga ruija wak kelmo hekta lah so ae.”

³⁷Anita malungshit jarra nalimpa hi kanina ral nea ah shu songe.

³⁸Chuna sarukka keina kahal chu ejong akha phao na hija malungshit hai thou wa hran hlak pi nea ang no ae. Athi na kom ringchang nakom, wanruina kom ah noleh thangwan na ane angam na kom atun na akha chu anutienga kom.

³⁹Anoleh simlei achungtieng na kom anoleh simlei athui tieng na kom makutsem ejong akha na ani arengpu Khrista Jisu majar hana Chungthieng na lungshit hi ahran nea rang jaitha am no ae.