Read Chothe Naga 1 KORENTHIYA 10 Bible Online

1 KORENTHIYA 10 - Chothe Naga bible

1 KORENTHIYA 10

¹Ulea nao ngei oh kei na nangei ta angei thei pi num minge, Moses nujuija hang, nu ngei pa ngei ta tuipi lin lal pi-ae akha-chu shumphai thui alippa thingpi ae.

²Manilim na Moses anu jui mee ngei changa shumphai akha chu tuipilin sunga baptias ae so ae.

³Meelim na muihla rakha akha chakka bakha ae.

⁴Akha chu muihla tui kom akha chakka inn ha ae, maramchu mani itta thingha Muilha tinga sumlung hei thou inha so ae, hana sum lung ha chu Khrista sa ae.

⁵Chuti phao shunga Chungthieng na mani atampata lungshi no wa athisha mani pum ha ramrukka denga hou ae.

⁶Atun chu hilim hi ani taranga ripi so ae, tichu anina mani hektinorang akha chu rhanota dit no ranga hienna sa ae.

⁷Mee arhena kutta sem hlawangta mokhekta nangeichu mokno oh, Jieksha rou na rilhekta, “Meengeina bakharang ongsowe anutingchu arui abah a namei apa okno tullu lu so ae.”

⁸Akha chu mani arhena apa namei okno tullu lu sarukka naha nie akha chakta mee ring lasing somni inthum thi ae, anina vokno tullu manei hekta ae ang no ah ae.

⁹Mani arhena Arengputa chang ansarukka arulna thathekta, anina Arengputa chang an ang no sa ae.

¹⁰Anina mani hekta Roukat hlakka chak am mang no sa ae, mani ha Athi Wanrui na mangpi ae.

¹¹Manita shukka am ngamlim hi adang ngeina chu ranga sha ae mani ha na ani dang ranga jiekka shi phur sha ae. Maramchu ani ringa am hi atreem na apha ha wa so ae.

¹²Atujong mee na hrabakta ngirsinge ta hallechu, tu norang chetta ngirsu oh.

¹³Nakolla phao alhem ha mee lim kolla phao alhem ha sa ae. Chutiweta Chungthieng masharo ei sa chu lingno sa ae. Hana amona nadong nea angno alhem nakolla phaopi ang no ae, ejonga phaohal kom na nangta dongne rang jaitha pe pi ange, hana amona lam adang akha tienga honga hla ange.

¹⁴Chuna sharukka kalungshit tonpi ngei oh, kutta shem hlawang ta mok hei thou wa shukka thing jou oh.

¹⁵Kei na nangei ta lunghal thei mee ae ta rilla am minge karil rou hi nangeina diek diekno minna hallo.

¹⁶Arengpu bu donna ah ani na Chungthieng ta dom hitta mun ha ah anina tuidon choija inha Khrista mathee sharuk ron ha ah am sha ae. Akha chu badol thera ani bakha Khrista pum sharuk pha ha ah am meh.

¹⁷Rouram chu ani lim na badol akha pum akha change maramchu ani lim na badol akha chakka bakha ae.

¹⁸Halla anno, Israel shanao ngei na hlawang ta kat pot kom Chungthieng maicham mai ah bakha ae.

¹⁹Chungthieng ta kat pot lea hlawang hi ejongpa akha ae ta keina rilla meh.

²⁰Ano weh, rouram chu hlawang ta kat pot hi chu Chungthieng ta ano ae, saitan ta ae, chuna keina saitan kolla nangei hi am pi num nonge.

²¹Nangna Arengpu inn na tuidon na akha chu saitan inna tuidon nako intiha dinonge nang na Arengpu bu donna maichama ko Saitan maichama ko bakha denonge.

²²Ano lea anina ta anar pinum ma meh? ani na amo ta hella rattekke ta halla meh?

²³Manina rille, “Ani hi eheilimpa ae ah ngai ae,” naha adiek sa ae, chuti weta eheilim pa hi ahra chak no ae, “Ani hi ehailimpa ae ngai ae” chuti weta eheilim pa hi kana rang ah no ae,

²⁴Atu akha na mataranga chak an no shu oh, chuna adang taranga kom an shu oh.

²⁵Kaithilla jurra am ameh ha nangei na ekom rou shai no lutta lei weta bakka ngai ae nangei lung aral tanorang.

²⁶Rouram chu jieksha rou na rille, “Shimlei akha chu eheilim pa hi Arengpu mata chakke.”

²⁷Ejonga atu jong Khrista mel dangno mee na nangei ta bubak kokka nangei na kom thingnum ta lea chu nangei lung hoino amno ranga ephao rou shai no lutta bakko.

²⁸Chutiweta atujong na nangei ta hlawang ta kat pot ae ta ril lea arilpa hana mamarama akha chu diek diekno aeta halrang yarra bakno-oh.

²⁹Naha nangei lunga halrang no ae, mee adang na adiek dieklou mani lenga dangrang sa ae, “Chutilechu, rhasowe” atujong akhana saiye, “Eje ah mee akhana diek diekno dangna malung hana ka ae num hata routreem ma meh.”

³⁰Ejonga keina kabakkang pot taranga Chungthieng ta kadom hi atujong akha na kachunga rou rillang am ma meh? Bakrang kadom hina maramma.

³¹Hrasowe, natullu lu eheilim, nangna bak che hal een che hal Chungthieng ajai taranga ae oh.

³²Jihudi ano lea jat adang ano lea Chungthieng koksha mee ngei kolla ephao aol ana shuk norang lamtinga ringo.

³³Ka ae hekta nangei kom ae oh; keina ka ae limhi meelim ngei keina ka rhat rangchak halnonge, chuti weta mee lim hrat rang hallinge, chutile chu mani ha sanpi ha pha ange.