Read Chothe Naga 1 KORENTHIYA 12 Bible Online

1 KORENTHIYA 12 - Chothe Naga bible

1 KORENTHIYA 12

¹Kalungshit ulenao ngei oh Muihla hina kutthul maramma jiekka lha rouha, keina nangeita hana maramma dieka dangpi num minge.

²Nangei na jat adang changa amleija, nangeita ringchang sum kutta sem hlawangta mokranga lam eja ah ruija numa tukka am he, nangei na dangchou ae.

³Keina nangei ta kadangpi num chu Chungthieng muihla na lamkai mee akha na, “Jisu ta sarkou ang no ae” hana atu akha na, “Arengpu Jisu” ta ril shuk nea ang no ae muihla athieng hana lamkai ah no wa chu.

⁴Muihla lam ma pek kutthui hi adang adang am hom meh chuti weta mani lim ha muihla chu akha chakke.

⁵Arengputa domang tullu kom adang adang am hom meh chuti weta arengpu akha ta domange chak.

⁶Mane, mane ang tullu am hom meh chuti weta Chungthieng na limpata mane mane anga pek sha ae.

⁷Meelim ahrat ranga Muihla na mee akha akha chunga ma amha lam ahre-a ripi-ae.

⁸Muihla na mee akha ta chu rouril na rang lungsing la ha pe ae na muihla hana adang akha ta chu lungwar shuk rang pe ae.

⁹Na muihla hana adang akha ta chu ngoiring arat rang pe ae, hana adang akha ta chu dampi hrapi nea rang pe ae.

¹⁰Na muihla hana atu jong akha ta chu anealah tullu lu rang pe ae. Hana adang akha ta chu Chungthieng rouril hi hrabah ril nea rang pe ae. Hana adang akhata muihla ngei dang nerang thou phou. Hana adang akha ta trong dang adang dang nea rang, akha ta na let nea rang pe ae.

¹¹Chutiweta na lim pa hi muihla athieng ha chu akha chak sha ae amo na madit nu juija adang adanga pe ah sha ae.

¹²Khrista hi pum akha hekti ae, kajat ija amhalkom akha chu kajat adang adangna semhalkom pumchu akha chak sa ae.

¹³Chu hekta ani lim hi Jihudi hal jat adang hal ano lea kor hal kor no hal muihla hana pum akha sunga baptias ae pi so ae. Hana ani ta muihla akha chakka minga inn ha bakha rang pe so ae.

¹⁴Rouram chu pum akha hi kajat akha chakna sem no ae chuti weta kajat ija na sem ae.

¹⁵Ejonga kae na, kei chu, “Kut nonge chuna pum ma tol nonge,” chuna pum nonge ril chu ngai ang no ae.

¹⁶Hana ejonga kur na kom kei chu, “Mit no sou chu pum ma tol nonge,” ril chu ngai ang no ae.

¹⁷Ejonga pum akha hi mit chak lea chu alota amo na thei na ang sha? Hana kur chak lea chu alo ta amo na ariem thei pha nea angsha?

¹⁸Chuna chu hekta, Chungthieng na maditna juija kajat lim pa hi pum akha chakka sha ae.

¹⁹Kajat akha chak lea chu pum akha kom wul nea ang no ae.

²⁰Chuna sarukka kajat adang adang am hal kom pum chu akha chak sha ae.

²¹Chuna, mit na kom kut kolla ril nea ang no-ae, “Nang kakolla anei rang am noae!” lu na kom ke ta, “Nanghi kakolla aneirang am nongae.”

²²Hana chakno wa pum ma shultek ti hana tol no lea pum na tullu hi ae nea no weh.

²³Akha chu ani na haljuija pum ma sintek ta hella hal tek kang am meh, hrano ae tahal pumma kajat akha tana ani na hella an pi-ae.

²⁴Chuna ani arha kajatngei hi aneirang am no ae chuti weta ajak atri pekkang wat kajat hana Chungthieng na lello rha-a ajak atri pepia pumma rachun pi ae.

²⁵Chuna pum shung hina adang adang hran hlakkang am no ae, kajat lim hi akha lea akha rachun weta anlhak rang sa-ae.

²⁶Chuna ejonga pum shunga kajat akhana ana pha lea chu adang kajat lim pa kom na tol ae; Ejonga kajat akha na ariem ma adom pha lea chu adang ngei na kom ariem pha ae.

²⁷Nangei lim hi Khrista pum sa ae, akha chu nangei pum hana kajat ae.

²⁸Chungthieng na abom shunga lim pa hi amunt acha ah shi so weh. Masha ah ahal sha rui ani shuna pa na rouril ngei, inthum su na pa na chupi takpi ngei, hana nutienga chu atripi tullu lu ngei, hana ana asha hrapi dampi ngei hana meeta sanpi thei ngei hana adang chat trong ta ril shuk nea ngei.

²⁹Mani lim ha ahal sha rui hana rouril chupi takpi ngei chak no ae. Hana meelim hi atripi tullu lu rang jaitha pha hap no ae.

³⁰Anolea rai eja dampi nea am lea jat adang trongta trongne mee ril na makhai ta let nea no ae,

³¹chuna maru kitek kutthut hata meelung lutto, lim chung rhatek hachu athui a pek lam hi ae