Read Chothe Naga 1 KORENTHIYA 14 Bible Online

1 KORENTHIYA 14 - Chothe Naga bible

1 KORENTHIYA 14

¹Lungshi ti hi jullo, chutiweta muihla na pek kutthul lim chunga chu Chungthieng rouril nea rang nalung lutta dijo.

²Rouram chu trong adanga tronga am amo ha adang ta tronga am ano weh, Chungthieng kolla sha ae rouram chu atu akha na muihla athieng arat hana adiek athup rou ha ril sha ae.

³Chutiweta atu jong akha na Chungthieng marou samlechu malmashi ngei ta thanum thathou pi ah hoi ahoi shukpi ae.

⁴Hana atu jong akha trong danglou ta tronga am lea chu matarang chakkae chuti weta atu yong akha na Chungthieng marouha samma rouril lea chu akoksa lim ta sanna sha ae.

⁵Nangei na trong danglou trong hi keina kom di inge; chuti weta lella kadit chu Chungthieng rou hi samthei akha akha changpi num minge. Rouram chu Chungthieng rouril mee na trong danglou trong mee amo ta lella aman tam tekkae, Rouram chu atu jong akha na rouril ha hrabak ta woiha let pi sier ano wa chu singlup lim na dang nea no weh.

⁶Chuna ulenao nangei am na kaphao juija ejonga keina danglou trong, trong lea chu ekanatna amma meh? Hana keina Chungthieng kol hai thou wa athup rou ril shuk nea no, ano lea, lungsing shukpi nea no ah, chupi chu lea chu ejeranga meh.

⁷Atara am muihla sum hung rasam hi atara shuk pi ano wa chu hung tara mo ano lea rasam tara mo, alo ta dang nea ang meh?

⁸Akha chu ejonga mee akha na trumpet tum jui ja athieng atara theipi no lea chu atuna ral taranga sem sha ang meh?

⁹Chuna chu hekta narouril juija nangna mee dang lou tronga ril lea chu narou ril lim ha thirang karra ariem ma mang ange!

¹⁰Shimlei chung hina trong adang adang ehekta am hom meh, halim ha artha am lou akha phao am no ae.

¹¹Chuna ejong atu motieng akha na rourilweta kei na bahap ta no lea chu amo ha kataranga chu meram adang tina mee ae hana kei kom mataranga chu meeram adang mee ae.

¹²Nangei na muihla athieng hina khuthul phanum shou chu, akoksa ngeita lokpi ranga nangei na eheilim chunga hot na ta sho weh.

¹³Mee dang lou tronga rouril amo na maril rou ha mee na dangpha ta ranga nie shu oh.

¹⁴Ejonga hihekta keina mee danglou tronga nie lea chu kamuihla na chak ae ah sa ae, chuti weta kadang na artha chu am no ae.

¹⁵Chule chu keina alota ae ang meh? Muihla tolla lah kom sha ange kalung ah ko bahap ta ah san ange, kamuihla tolla nie ange, akha chu kalunga ko bahap ta ah nie ange.

¹⁶Nangna nalung lutta Chungthieng kolla domma na nieklei lei a alo ta mee akha na tol weta “Amen” sang ang meh? Amo na naril rou ephao dang no lutta.

¹⁷Chuna naprathana na leima hra hal kom, adang taranga chu ephao sanna am no ae.

¹⁸Chungthieng ta kei na ehekta dom minge rouram chu nangei ta hella keina mee ram trong dang inge.

¹⁹Chutiweta meelim bomtul na chu mee na bahap taranga tronglam ranga chak halkom ril num minge meeta chupi takpi ranga meeram trong lasing katrong ang sarukchu.

²⁰Ulenao ngei oh unga ngei hek ta halla am no sha oh, chuti weta hrano taranga chu unga hek ti oh, chuna nahal nalung rang ha alin ashai shuk mee hekti oh.

²¹Hita jiekka shi so ae, “Arengpu na ril meeram adangei tronga keina rouril ange ka mee ngei kolla. Hana meeram adang trong chakka rourillange chuna phao kom kamee ngei na ngai numno-ae.”

²²Chuna meeram adang trong hi ngoiringlou ngei tarang sa ae chuna Chungthieng marou sham hi chu ngoiring ngei tarang ae ngoiring no ngei tarang no sa ae.

²³Chuna ejong singlup lim na rachun hajuija meeram trong dang no rourilla am juija ngoiring no mee ngei na lut jui manita thiempu ngei ae ta rillang no meh?

²⁴Chutiweta ejong meelim na Chungthieng marou hi rourilla am lei ah Khrista ngoiring no mee na lut jui mani theichakka rou ha thei pha ah pak am ingeta dangpha ange. Hana mathei rou hana amota routreem ange.

²⁵Malung shunga athup limpa ha choi ja shukkange hana amo na mapak lim ril shukka Chungthieng ta mokka, “Adiek Chungthieng hi nangei am na karra am tol ae rillange.”

²⁶Ulenao ngei oh hitta karil na chu, nangei na rachun na mokjui ja akha na laa sha mee, adang akha na chupi mee adang akha na Chungthieng athup rou ril shukkange, adang akha na meeram adang tronga rourillange hana adang akha na marou hina rilla artha pe pi ange chuna meelim na abom hina alok ashei shuk kange.

²⁷Ejonga atu jong akha meeram tronga rourilla am lea chu mee akha na maril ha hitta rilna ae ta tronglet mee tol anga ae.

²⁸Chutiweta atu jong akha na maril na rou ha tronglet pi mee am no lea amo ha Chungthieng lea manui tarang chak so ae chuna amo ha dai ah am su oh.

²⁹Mee ani no lea inthum na Chungthieng marourilla am lea chu adang ahre na mani ril rou ha ejongpa meh ta routreem ae anga ae.

³⁰Chutiweta ejonga atujong akha na Chungthieng haithou tronglam pha marouril ha ngir ah lea chu rourilla am amoha chan anga ae.

³¹Nangei lim na Chungthieng marou hi rillou oh, makam masam naiya, akha nutieng akha na chule chu nangei lim na thei hlakka thanum thathou ange.

³²Chungthieng rourillang kuthul pha mee amo ha chu matak na matakta mant nea mee changa ta ae,

³³maramchu Chungthieng hi achok arel Chungthieng no ae, adai sa ae. Athieng akoksa limna hitta thinghlak sa ae.

³⁴Namei ngei na tulbom shunga dai ah am shu oh, Jihudi ngei roupek nu juija mani ha rouril ngai no ae.

³⁵Ejonga mani na ejongpa akha ril num lea chu, mani pashal ta inn na sai shu oh! Maramchu Singlup lim karra nameinu na rouril hi ayakpi sa ae.

³⁶Anole, Chungthieng rou pekhi nakolla athouna a meh? Ano lea nakolla chak rou hi phao ah meh?

³⁷Anole ejonga Chungthieng marouril langa muihla lamlienga nangta kutthul am hal kom, amona madang pha ang chu ka jiekka kahla rou hi arengpu pek tronglam sha ae.

³⁸Chutiweta ejonga amo na karouril hi juinum no lea chu marou ril kom jui pi no oh.

³⁹Chuna sharukka kalungshit ule nao ngei oh Chungthieng rouril hi nalung lutta di oh. Hana adang adang trong nea ngei ta kom hamma shi no oh.

⁴⁰Eheilim na hrabakta akha chu masha rui nung nai pi oh.