Read Chothe Naga 1 KORENTHIYA 15 Bible Online

1 KORENTHIYA 15 - Chothe Naga bible

1 KORENTHIYA 15

¹Ulenao ngei oh, keina nangei ta atun hi angei thei pi num chu nangei kolla ahra tronglam karou ril phur nangei na la weta ngoiringa akha chu chetta nangei ngir oh.

²Naha chu ahra tronglam, nangei kolla karil phur ha ejonga nangei na nahata chetta choi ta lea chu sanpi pha ae, ha no lea chu sanpi ha ae, ha no lea chu nangei ngoiring hi ariem shallange.

³Eheilim loktekta kapha lim hi keina mathang, mathang nangei ta pe inge ha chu Khrista na ani pak taranga thi pi so ae; jieksha rouna rilchu hekta.

⁴Amo ha chu hlan sunga phum weta rungnie nathum su nie a ringthou so weh jieksha rouna jiekka shi nu juija.

⁵amona Pitar kolla ri pi weta ahalsha rui asom ani ha ta kom ripi-ae.

⁶Hana manu tieng jui mee riyanga ta kom woiha chakka ri pi ae, mani ha ahre chu thi hal kom tamtek pa chu ringa am the songe.

⁷Hana amona Jacob ta ripi ae akha chu ahalsha rui lim ta kom anutienga ripi ae.

⁸Eheilim ma atreem na kei ta kom ri pi ae, keina mee ngei don hekta donphur no halkom.

⁹Ahalsha rui ngei karra kom sin-tekti akha chu ahalsha rui ae ta kom kokphung sukno inge, rouram chu Chungthieng koksha mee ngei ta aol ana pe phur inge.

¹⁰Chutiweta Chungthieng lungshit na jarra kei hi atunna hita ringa am karinghi pha inge, hana mapek malungshit hina keita ephao wa sui pi no ae hana hutta tieng, keina ahalsha rui ngei karra ratta tullu lu inge. Nalim pa hi kathei chakka ka lu tullu ano ae, Chungthieng na lungshit na jarra kei hitta tullu hi ae inge.

¹¹Chuna nahi kakolla thou phao hal kom anole mani kolla phao hal kom na hi so weh nangei kolla kani rouril akha chu na hi so ae nangei ngoiring ang.

¹²Atun hi, ani na Khrista na athi hai thou ring thou na rourilla am sou chu nangei karra ahre na athi sha na alo ta ringa thou weta aring ringchang pha ang meh ta ril mee kom am ma meh?

¹³Ejonga naha adiek tak lea chu hana ril na chu Khrista hi ringthou no ae ti ah sha ae.

¹⁴Hana, ejonga Khrista hi athi hai thou ring no ae ti lea kani na nangei kolla rourillang ekom am no ae. Hana nangei na kom ephao ngoiring ang am no ae.

¹⁵Hana chunga Khrista athi hai thou ring so ae kani ril na hi ejonga nangei na athi hai thou ring no ta lea chu hana amo na Khrista ta athi hai thou ringpi no ta lea chu kani hi Chungthieng chunga murthui trongei so ae.

¹⁶Chuna athi sha ngei hi ring no ta lea chu, Khrista kom athi hai thou ring no ta so ae.

¹⁷Hana ejonga Khrista na ringthou no lea chu nangoiring hi lechok so weh hana nanghi atun phao sunga pak kum sunga am the songe.

¹⁸Chu chakno wa Khrista ta ngoiringa thi meelim hi kom manga am so ae.

¹⁹Ejonga atun tun taranga chak Khrista kolla lungrang am lea chu ani hi meelim karra jaishi tekti ae shimlei chunga.

²⁰Chuna adiek tak chu Khrista na athi hai thou ring thou sou chu atu jongpa na athi ah jalla am lea chu amo ha takom ring thou pi ange.

²¹Malmashi hai thou wa athi ti hi thou sou chu, chuna chu hekta akha rukka malmashi hai thou wa athi hai thou aring pha ange.

²²Rouram chu malmashi lim na Adam kolla tulha weta athi pha ae. Chuna chu hekta Khrista hitta mani na amha jarra ha meelim na kom athi hai thou wa ring thou ange.

²³Chuna meelim na kom ma tullu nu juija ring thou ange Khrista na meelim matienga ahalpa ae. Hana majung juija chu Khrista ta ngoiring lim kom ring ange.

²⁴Hana chu atreem nei ha tung ang so Pa Chungthieng rengram hi Khrista kutchunga pe ange ane jaitha akha chu muihla lamkai meelim ta kom.

²⁵Chungthieng amo ta anda lim ta nea ah akae pha thuija to wa shi malim ma Khrista na ronna am mange rengram ha.

²⁶Atreem na amo ta anda amo ha ta chu athi kom pha ang.

²⁷Jieksha rou na rillea, “Chungthieng na eheilim pa hi makae thuija shi ange” “Eheilim pa” ti hi Chungthieng amo chu tol no weh Khrista thuija am ngeichak kae.

²⁸Chuna meesanaopa na eheilimpa chunga dong hekta Chungthieng na eheilim pa chunga am chu hekta eheilim chunga amo na ripta mathui ja shi ange.

²⁹Atun chu ejonga ringa thou shir rang am no lea athi ae ta baptias ae ngei chu alo ti ang? Athi lim pa hi ephao ring no lea mani taranga eje ranga mani na baptias ae ah meh?

³⁰Hana taranga lea chu kani na eje ranga apha chang honna aol ana pha rang tan na chom ma rollang meh?

³¹Kalungshit uleanao ngei oh, rungnie chang honna athi mai tuk hlakka aminge. Nangei na ani arengpu Jisu Khrista hitta ani ringchang rachon na am hana jara kei na chou thukka ril shukkinge.

³²Ephisus ram hina malmashi ngei mai ah ejong kei na amatieng hekta, “Ramsha” ngei hekta shulhlak lea chu echu kei na pha ang meh? Chutiweta ejonga athi ngei na ringthou wa aring ringchang pha no lea, hitta rilhlak no meh, “Ani na bakka inna am mei oh, ani hi atukka thi ang sha so weh.”

³³Lungmo wa am no oh, “Hrano tonpi na ahra nangam mang rang sha ae.”

³⁴Hrano pak lampi hai thou wa thingno sha oh, akha chu ahra lungwar tienga lea jou oh, keina nangei ta ajak pha rang rou hi rillinge ha chu nangei ahre na chu Chungthieng ta dang no wa am meh.

³⁵Atujong akha na kom sai, “Athi sha na alota ring thou ang meh? Mani ha ejongpa pum ang meh?”

³⁶Lungmo ngei oh! Nangei na aleichunga muchi wor juija thi masha ah no wa chu ajiek adon hang no ae.

³⁷Chuna nangei na maru worjuija akung apum wor no weh gehu maru ha chak wor ra sha ae anutienga akung tou wa sha ae.

³⁸Chungthieng na maru ha ta apum chang ranga madit hana nu juija tou pi hange.

³⁹Ringa am lim pa hina atak hi adang adang rukkae Malmashi ngei hina atak na akha, ramsha ngei akha, awa ngei akha, hana anga ngei akha sa ae.

⁴⁰Hana wanram ma pum lea aleiram ma pum kom am mange. Chutiweta wanram ma pum hrat na aleiram ma pum hrat hi adang adange.

⁴¹Siemnie na kom hata ma hrat na am meh, hla kom ma hrat hata am meh. Hana arshingei kom hata ma hrat am meh, chuna chunga arshi chu adang adanga ma hrat hi am meh.

⁴²Nahi hek ti ange athi na woiha lea ah ringthou jui ja ring ringchang pum hi alei hrun sunga ui juija chu athi sha ha ae, chuti weta ringthou juija ring ringchang ha chu athi ti ha ammang no weh.

⁴³Ani na phum juija chu leima melshi ah ehekta shul lea, chuti weta ringthou jui ja chu mel hra ah akha chu ehekta rattange.

⁴⁴Anina phum lei ah chu pum ha ae, chuti weta ringa thou juija chu muihla pum chang ange oh weh, pum ha chun chu am mange chuti halkom naha muihla pum chang ange.

⁴⁵Jieksha rou na rillea, “Masha tekti apa, Adam, chu aringa mee ae ta shak sha ae”; chuti weta atreem na Adam hi chu ringchang pe pi muihla ae.

⁴⁶Masha ah muihla na phao no sha ae, pum sha ae hana muihla na rui nunga sha ae.

⁴⁷Masha Adam chu alei takka shak alei hai thou phao sha ae, hana ani su na pa Adam chu wanram tienga sha ae.

⁴⁸Alei ram taranga chak halla am amo ha chu, alei ah shak hekta amo ha mal pi ae. Hana wanram ma hekta mal amo ha chu wanram tieng hai thou jung ae.

⁴⁹Alei ram ma malmashi hekta punchoi dirchoi seng chu hekta ani na wanram ma mee hekta seng ha ei oh.

⁵⁰Uleanao ngei oh hina karilna chu tak lea athee na Chungthieng rengram tung nea no weh. Hana athi na thilou pha nea no weh.

⁵¹Adiek athup rou hi nangei na thei oh,

⁵²ani lim pa hi thi ang no weh atreem na trumpet sharrol tum juija. Ani lim pa hi edang dang hou no wa mit hap hek ta ahlong pha ange trumpet hana tum juija athi sha mee lim pa hi ringa thou ange woiha lea ah athi am mang no ae hana ani lim pa hi hlong ange.

⁵³Athi ha na thilou hlong ange. Hana amang hana manglou hlong ange.

⁵⁴Chuna na lim pa hi shuk juija chu amang hana manglou hlong juija chu jieksha rou hi adiek shuk shi jo weh, “Athi ha amang ni jo weh, Ralne ha na rakit pha ang so weh!”

⁵⁵“Athi na nea ha hoija meh? Athi nane jaitha ha jo meh?”

⁵⁶Athi ta nea chu pak chak sha ae pak ta nea chu Chungthieng tronglam sha ae.

⁵⁷Chutiweta Chungthieng ta dom minge amo na ani arengpu Jisu Khrista jarra ralne ani ta changpi ae.

⁵⁸Chuna kalungshit uleanao ngei oh atri no oh ratta ngir oh, reng tarang nga tullu ha atal adol am no wa ae oh. Nangei na dangpha sho chou ae arengpu ma tullu lu ha ephao arimshal am no ae.