Read Chothe Naga 1 KORENTHIYA 2 Bible Online

1 KORENTHIYA 2 - Chothe Naga bible

1 KORENTHIYA 2

¹Kalungshit uleanao nangei kolla Chungthieng athuk adiek rou rillang kaphao juija keina aphao sa num nonge hana leima athei asing hek ti nonge.

²Rouram chu nangei am na ah ka am tol juija ehei lim mak weta Khrista Jisu na Khross chunga mathit ha chak hallinge.

³Chuna nangei am na katung juija kei hi leima shulla ati ahir inge.

⁴Hana pa chu nangei kolla kachupi katakpi malmashi ngei athei asing hekti nonge chuti weta Chungthieng muihla jaitha hana jarra dangpi inge.

⁵Chuna nangei ngoiring hi malmashi hina athei asing jarra no ae Chungthieng jaitha sha ae.

⁶Chuti chun muihla lamma mapung pha sha ngei shunga chu keina lungsing na rouril inge, chuti weta na hi chu alei ramma ane angam ngei lungsing ano ae mani jaitha ha chu amang ha sa ae.

⁷Nangei kolla karouril lungsing chu Chungthieng athuk lungsing sha ae na hi chu malmashi kol hai thou wa chu athup sha ae. Chutiweta ani ahung ajai taranga amo na simlei hi shak matieng hai thou wa hal sha so ae.

⁸Simlei chunga reng atu na kom na lungsing hi am no sha ae. Ejonga mani na na hi dangphur leng mani na ahung ajai na shihakti arengpu ta Khross chunga that ang no ae.

⁹Chutichun jieksha rou na rillea Atu akha na hijongpa rikom ri no ae hana thei kom thei no ae, atu akha na hal kom ephao shuk no songe ejongpa mo ae Chungthieng na amota lungshi mee taranga mathourang.”

¹⁰Chutiweta, ani taranga hi so ae muihla na chu Chungthieng athup ha kom dang pi nea ae muihla na chu Chungthieng athukka shi mahal eheilim phao jonga am meh.

¹¹Maram chu mee shunga am muihla ano wa chu atuna mee ngei maram hi danga meh chuna chu hekta atu kha nakom Chungthieng lunghal hi dangpha nea no ae Chungthieng ma muihla mak ano wa chu.

¹²Ani na simlei ramma muihla ha pha no ae hana hutta ani pha chu Chungthieng hla muihla ha sha ae Hana jarra Chungthieng na ani ta pek lim pa hi dangpha nea ae.

¹³Chuna sharukka ani na malmashi ngei na pek lungsing roulam ma trongshuk no ae, muihla na pek chak ril shukkae atujong muihla am ngei karra muihla adiek rou ha hrabakta ril unge.

¹⁴Atujong muihla am no mee na chu Chungthieng pek jaihra hi pha ang no ae hajong mee na chu mani ta halla shukkang no ae. Mani chu mani muihla hana nujuija routreem ange.

¹⁵Atujong muihla am amo na chu eheilim ma amant tam ma routreem meh chu na atu akhana amota routreem ae nea ang no ae.

¹⁶Jieksha rou na ril lea, “Atu na arengpa lungrang dang nga meh? Atu na amo ta rou pe nea ah mo ae?” Chutichun ani hi Khrista hina lung rang ha am meh.