Read Chothe Naga 1 KORENTHIYA 4 Bible Online

1 KORENTHIYA 4 - Chothe Naga bible

1 KORENTHIYA 4

¹Chungthieng hina athuk athup adiek rou pekka shi Khrista shuk kani taranga nangei na hallanga ae.

²Suuk akha changa ehekta darkar ui chu mitpu kolla ngoiring rang tullu lu hi ae.

³Atun hi kei na eheilimpa routreem ae nea nonge malmashi mit an na; kei katak phao nalim an nea nonge.

⁴Kahal kalungrang hi leima thienga hallinge na hi rilweta kei chu maral ephao am nonge ti nonge, kei ta kom routreem ae ang chu arengpu amo sha ae.

⁵Chuna nangei na atu akha ta kom apha acha phamalim ma routreem ae no oh. Arengpu phao malim chu atreem na routreem hakka am mangawe. Amo na malmashi ngei thup pa shi lung rang lim hana athiem lim kom awar na ri pi ang sha ae. Hana jui apha ah meelim na Chungthieng kol hai thou wa adom pha ange.

⁶Chuna nangei sharukka uleanao ngei oh kei katakmak akha chu Apollos na, na lim hi ae unge, chulea chu nangei na rilla am hina rou hi kani kolla dang na nei oh. “Jieksha rou ta lella thingno oh,” atu akha na alok sha weta akha ta athuija shi no oh.

⁷Nathei nasing ha atu pekka no ae? Nalim ha Chungthieng pek chak no meh? Chuna nang na alowa kuthul apha no weta eje ranga nangna alok sha ah che?

⁸Nangei na darkar lim ha am shu jou mo ae? Nangei hi achong nga jo che? Ani am no wa nang nathei chakka rengpa chang nga che? Oh ae kei na kom nareng hi di oh ani lim rachun ha weta rengpa chang ngei meh?

⁹Kei na hitta hallinge ha chu Chungthieng na kani hitta atreem ang tienga ahalsha rui akha chu ram lim ma tusan rai ngei akha chu simlei meelim mai kunga athit ranga pek sha hekty ae.

¹⁰Khrista Jisu minga kani hi lungmo unge chuti weta nangei na chu Khrista hitta am ha na jarra lungsing mee so ae kani chu shul unge, nangei chu rat ae, kani chu mee anda mee unge nangei chu meena ajak ati ae.

¹¹Atun apha hina thou wa kani na wantam tuiralla; aol ana bom shunga; phitta rei ah; amunt akha hai thou akha ah rol unge;

¹²kani na kani thei chakka aol hi donga, kani ta sarkou juija kani na jaihra pe unge; aol ana pek jui ja, kani na dong thei unge;

¹³kani ta ajak pek jui ja kani na hrabakta sang pi unge kani hi alei ramna anda mee ae; hana kani hi alei ram ma tui aphul jongpa songe atun apha hai thou wa.

¹⁴Nangei kolla kajiekka kahla hi nangei ajak shu oh ta rilla nonge kalungshit kasanao ngei hekta chupi ranga.

¹⁵Khristen ring changa nanu napashek lising asom nangei na am halkom; napa chu akhachakke khrista hitta nangei ringchanga am ha ah ahra tronglam hi nangei kolla choija phao ah keina nangei pa chang inge.

¹⁶Chuna keina nangei ta rilla am minge, kanu jui jo.

¹⁷Hina tarang sharukka kei na Timothi hi nangei kolla hla inge. Amo chu Khrista minga kalungshit ngoiringa kashi kasanao pa ae. Amo na Khrista Jisu kolla karing na lam hi hrabakta jui ange. Hana abom amunt chonghanna kachupi katakpi lim na kom jui ange.

¹⁸Nangei kar shunga ahre na chu leima alok sha num ma am so ae rouram chu kei hi phao ang ni jo weh ta halla.

¹⁹Areng ahal am lea chu kei leima ranga nangei am na phao sier ange. Hana juija kei na alo ta aphao sha weta tronga am ngei aratha kei na jong ange.

²⁰Rouram chu Chungthieng rengram ma chu murra trong chak no ae jaitha chakkang sha ae.

²¹Lungshi ahra muihla lam ma mo ano lea malsum moltek choi ja kei na phao ang mo hoi pa na nangei dit meh?