Read Chothe Naga 1 KORENTHIYA 6 Bible Online

1 KORENTHIYA 6 - Chothe Naga bible

1 KORENTHIYA 6

¹Ejonga nangei kar shunga atu jong akha na rou shukhlakka am lea chu nang na athieng mee ngei am na hutta thing ang sha rukka thiengno mee ngei am na thing chou weh.

²Nang na dang no wa che shimlei ram hi Chungthieng ma mee ngei na routreem ange ti hi? Chuna nangei na shimlei hi routreem mang ta lea chu, nanghi asin te tullu taranga routreem nea ang no mee ah meh?

³Nangei na dangno wa chau wan rui ngeita ani na routreem ange ti hi? Chuna na ringchang hina eja ah hel mo ae!

⁴Chuna ejong rou akha phao juija nangna manita abom ah tollou mee ngei am na ah routreem pi ang che?

⁵Na ha nangei taranga ajakpi ae! nangei Khristen ulea-nao shunga atu mo lungsing akha chu am mange amo hana roushuk ka am ha daipi nea ange.

⁶Hana hutta Khristen akha na akhata roushuk weta ngoiringlou routreempu kolla rou shu rang ril thinge.

⁷Hina adiek takka takpi chu nangei mashel shunga akha lea akha anshi anda hlakka eheilim hi ngei ni jo weh. Chuna nangei hi aral pana hra tek no meh? Hana nangei hi aru thei pa na hra tekno meh?

⁸Nangei na na-u-nanao makta aral tullu lu ah akha chu aru tullu lu so ae!

⁹Nangei na dang ngou oh, hajong hrano mee na Chungthieng rengram pha nea ang no ae, lungmo no oh, vokno anolea kutta shem hlawang ta mok ano lea meenamei meepashal ta vokno tullu lu mee ngei oh.

¹⁰Ano lea atujong aru ano lea hopla ano lea ju enn rat ano lea mee hrat no rang rourilla aruthei ngei na Chungthieng rengram tung nea ang no ae.

¹¹Nangei kar shunga ahre na chu hajong hek ti phur ae chuti weta nangei ha pak lim ha thiengpi so ae. Nangei ha Chungthieng kolla pe shu sha so ae; Ani arengpu Jisu Khrista akha chu Chungthieng muihla jarra nangei hi Chungthieng kolla adiek mee wulpi so ae.

¹²Atujong akhana rille, “Keina limpa ae ngai ae.” O-ve, chuti weta eheilimpa hi nakolla arha chak ah no-ae. Eheilim pa hi kataranga angai chakkae. Chutiweta ejongpa akha phaona keita chu kor changpi nea ang no ae.

¹³Atujong kaha na hitta rillea, “Rak hi won taranga ae akha chu won hi rak taranga ae.” Oh weh chuti weta Chungthiengna na ani makhi mangpi ang ae. Pum hi vokno hrano taranga no ae chuti weta arengpu tullu lu rang sha ae. Akhachu arengpu na taranga awat amno ah pe-ange.

¹⁴Chungthieng na arengpa ta athi hai thou ringpi so ae chuna amo na ani ta kom majaitha hana jarra ringthou pi ange.

¹⁵Nangei na dang chou ae nangei pum hi Khrista hina pum saruk akha ae. Keina Khrista pum ahui ta lah weh ta vokno namei changpi ngai ah meh? Uithuk lou sa ae!

¹⁶Ano lea Nang na dang no wa che atu jong akha na matak mak na vokno namei akha hitta rachun lea chu amo hitta pum akha chak so ae? Jiksa rou na hitta rille, “Pum ani ha akha chak chang ange.”

¹⁷Chutiweta atu jong akha na matak makhi arengpu kolla rachun lea chu amo ha muihla ningtinga arengpu hitta akha chak so ae.

¹⁸Wokno tullu lha hou-oh atujong mee akha na pak tullu lu lea chu mapum ma ekom amang am no ae. Chutiweta atujong mee akha vokno tullu lu lea chu matak na matak chunga pak ae sa ae.

¹⁹Nang na dang no wa che natak hi muihla athieng am na inn ae ti hi. Amo ha nakolla Chungthieng pek sha ae? Nang hi Chungthieng ta ae, nataranga no ae.

²⁰Amo na nangta lei sho ae chuna natak hi Chungthieng mahung majai tarang chanpi oh.