Read Chothe Naga 1 KORENTHIYA 7 Bible Online

1 KORENTHIYA 7 - Chothe Naga bible

1 KORENTHIYA 7

¹Nangei na kakolla jiek ka hla rouram anu jui-ah mee akhana taichangno pana hra tekkae.

²Chutiweta vokno tam sha rukka apa akhana mata, mata namei am pa na hra tekkae. Hana namei nu na kom mata, mata apishal am shu oh.

³Apa ha na kom ma ae phung shuk tullu ha pasalpa akha changa ae su-oh. Hana namei nu na kom ma ae phung shuk tullu ha mapung pha pi shu oh. Hana ani mak na akha na akha hina darkar anu juija san hlak shu oh.

⁴Apishal am sha namei nu akha na mapum hi amona amitpu ano ae, chuti weta mapishal na sa ae chuna chu hekta anamei am sha palsha pa nakom mapum hi amona amitpu ano ae, anamei nu na sa ae.

⁵Nangei natakna anikrang apha amrang, apha tante taranga ngailhak ano achu, nangei akhana khata ngaida lhakno oh, akha chu nangeina natakka manne no sarukka saitan na lhem neno ranga woi ha tul sirro.

⁶Nangei kolla karil rou hi lungshi ah ril singe arang tronga no singe.

⁷Routakka chu nangei limpa hi kei hekta am di inge; chuti weta mee chang honna mata mata kut thul Chungthieng kolla pha ae, akhana khatinga hana akhana adang tinga pha ah am ae.

⁸Chuna taichang no the ngei lea arong nu ngei kolla rilla am minge mani na ka am hekta am nea ang lea chu am pa na hra tekkange.

⁹Chutiweta ejonga mani na mani pum ta sum na nea ang no lea chu mani ha taichangpa na hra tekkange rouram chu aol donga am mang sha ruk chu taichangpa na hella hratekkae.

¹⁰Chuna taichung sha mee ngei taranga keina tronglam pe ah am ming nahi katheichakka rou no ae arengpu rou sha ae nameinu na apishal hla ah hou no shu oh.

¹¹Chutiweta ejonga namei nu na hata ae lea chu, amo ha; hata am shu oh, ano lea apishal hitta lungle hlak shu oh. Akha chu pashal pa ngei na kom anamei ta hran no shu oh.

¹²Adangei ta kom keina rilla aminge ejong, Khristain akha na Khrista mel dang no namei nei shu lea chu hana namei nu hana kom apishal hitta am ha nea ang sange ta ngai lea chu namei nu hata hran no shu oh.

¹³Akha chu Khristen namei na kom Khristen lou apa kolla innpal lea amona pal ha nea ange ta ngeihlak shu lea chu namei hana kom apishal ta hran no shu oh.

¹⁴Rouram chu ngoiringlou pashal ha anamei na thiengpi so ae hana ngoiringlou anamei nu ta kom apishal na thiengpi so weh anole chu asanao ngei ha thiengno ngei chang ange, chuna asanao ngei ha atun chu thieng so ae.

¹⁵Chutiweta ejonga ngoiringlou amo na hran nange ta hran lea chu hata hran shu oh, rouram chu apa namei hi hojong shunga olla am rang no weh rouram chu Chungthieng na ani ta adai pha ranga kok sha ae.

¹⁶Chuna Khristen namei nu oh nangna napi shalta sanpi ang, sanpi angno tihi alota dang nea ang che? Khristain pashalpa nangna kom na namei ta sanpi ang, sanpi angno tihi alota dangne ang che?

¹⁷Amatienga Chungthieng na nangei ta kok lei apha hekta nangei lim pa na arengpu na pek nu juija ringa am oh. Na roulam hi ae keina abom chang honna kachupi katakpi ha.

¹⁸Ejonga Chungthieng kok lei ah amo ha asartan lea chu na ha mang ranga amo na ae no shu oh. Asartan ma amo ta kok lea chu asar tan rang ae no shu oh.

¹⁹Asartan lea asartan no hi ekom no weh chuti weta Chungthieng roukung ha ta jui ja thing ha sha ae.

²⁰Amo hata Chungthieng na kok lei apha ah atu mo ti ha, hata am shu oh,

²¹kor changa na am lei ah kok lea chu ajou shu oh, hana taranga ephao nule no oh. Chutiweta ejonga nangta hla pi lea chu hana kom hella hra so ae.

²²Rouram chu kor changa na am lei ah arengpa na kok lea arengpu makolla chu nang ha ahla mee so weh. Hana kor no ngei takom arengpu na kok hi makor chang ranga sha ae.

²³Chungthieng na nangta amant pe ah lei so weh chuna sha rukka nangei na mee kor chang no oh.

²⁴Katonpi ngei oh, Chungthieng hitta nangei akha lea akha na bomtul ha ah akha chakka am mang nga sha ae nangei ta kok lei apha hekta.

²⁵Taichangno na rou wa nangei ril nujui ja kahal kalunga chu Arengpu lungshit pha mee amo ha chu ngoiringa shi num minge, nahi Arengpu pek rou no ae.

²⁶Atun na shukka am rouram lim hina tarang halleng chu, hata am hana hella hra tek kae.

²⁷Nang hi namei neijo che? Nangna taichang shu ta lea chu hran hlak no oh. Hana taichangno the ta lea chu namei nei rang hal no oh.

²⁸Chuna ejonga nang na taichang lea chu nangna pak ae ni yo weh. Chutiweta ejonga athieng namei na taichang lea chu amo ha pak tullu lu ah no weh chuti weta hella karil num chu awoni taichang sha ngei na rungnie changhon na aol ana halleng chu taichang no pa na hra tekkae.

²⁹Kalungshit uleanao ngei oh, hina karil na chu apha kom tam ma am ni jo weh chuna atun hai thou wa chu apa akha na taichang shu lea chu taichangno ngei hekta amo na ringa am no shu oh.

³⁰Tappa am ngei na, tappa am no ngei hekta; Ariem ma nui ah am ngei na riem no hekta; pot lei ngei na mani ta no hekta.

³¹Potchei ahra, ahra chakka halla am ngeina mani tarang no hekta mani na shi, atun chu shimlei hi wulla thinga shot ta am ni jo weh.

³²Keina chu nangei hi aol ana hai thou wa shukka thingpi num minge taichang no the apa na arengpu na amo ta lungshit ranga ma reng tullu chak halla am meh Maram chu arengpu pelrang chak ae am meh.

³³Chutiweta taichangsha apa na chu aleiram ma taranga halla am meh rouram chu anamei na ap el ranga.

³⁴Chuna amo chu alam ani nah kai ae. Hana taichangno the athieng namei nu na chu mapum muihla ani mak hi reng tullu lu ranga kathukka pe nea ae. Chutiweta taichang sha namei nu na chu aleiram ma tarang chakka halla am meh, rouram chu apishal na amota pel ranga.

³⁵Karilla am rou hi nangei ta san num minge nangei ta kei na hamma shi ah no shange. Nangei na hoitiengpa na adiek mo ano lea nangei tak hi Reng matullu ae juija ahan am no ranga keina di inge.

³⁶Ejonga atu jong akha na athieng namei ta vokno tullu lu ang sharak chu reikung shil shu oh. Hana namei nu na kom ejong malunga rang lea chu hata taichang shu oh. Rouram chu manui ha pak tullu lu noranga ae.

³⁷Chutiweta atujong apa akha na mee adang na amota akal rou ril no lutta mathei chakka taichang ang nonge ta malung ngir shu lea chu, naha leima hra so weh.

³⁸Chuna apa hana taichang hal kom hra so weh. Chutiweta taichang no hal kom ehekta ahra ae.

³⁹Apalsha namei akha na apishal ringlei lim chu hran ngai ang no ae. Chutiweta apishal thi lea chu madit apa akha kolla palla ngei ae, chuti weta Khristen apa chang anga ae.

⁴⁰Amo na hatta palla am lea chu amo ha ahoi tekkange. Naha Chungthieng muihla tolla kahal rou sha ae.