Read Chothe Naga 1 KORENTHIYA 8 Bible Online

1 KORENTHIYA 8 - Chothe Naga bible

1 KORENTHIYA 8

¹Hlawang ta pek abakpot rou wa nangei sai na nujuija. Ani lim pa na, nalim ha danghap sha sho weh chutichun hajong chu apha atante chakkae, hana Lungshiti na chu sem nea ae.

²Atujong na amo hi ejong akha dang inge ta halle chu routakka chu amo ha madangphung shuk ha dangno shonge.

³Chutiweta Chungthieng ta lungshi mee amo ta chu Chungthieng na kom amo ta dange.

⁴Chuna hlawang ta pek abak een hina rou hi: Ani dang chu kutta hlawang hi ephao am no ae. Ani dang chu Chungthieng akha chak am meh ti ha ae.

⁵Thangwan ano lea aleiram ma hajong hlawang hi leima am hal kom hachak no wa hlawang ngei akha chu rengei am hal kom.

⁶Chutichun ani taranga chu sempi pa Pa Chungthieng akha chak am meh. Hana Arengpu Khrista Jisu chakkae majarra eheilim pa sem sha ae hana ani kom majarra ringa am meh.

⁷Chutiweta na adiek rou hi malmashi lim pa na dang no weh. Malmashi ahre na chu atun kom hlawang ta pek abakpot hi mani na bak juija hlawang ta bak rang pot anina bak sho weh ta mani lung shunga pak hekta halla leima shul pi ae mani thei chakka.

⁸Chutiweta abakpot na ani hi Chungthieng kolla nai tekka am na no weh. Ani na bak no weta hella hrano mee kom ano weh akha chu bak weta hella hratekna kom am no ae.

⁹Chutichun nangei na singthei ah nangei ae num ae hana ngoiringa ashul ngei kolla kae mathui na changpi no oh.

¹⁰Chuna ejonga hajong lungrang shukthei no wa am mee maikunga nang na chu dang inge ta eko no hekta bak ta lea chu nangna hajong mee ta thanum thathou pi ah che ae hlawang ta pek abak pot ha.

¹¹Chuna hajong lungrang shukthai no na-u-nanao taranga Khrista na mataranga thit jarra ha, ariem shalla nang na mangpi so che dang inge ta na ti hana.

¹²Hijong lampi ah nangei na na-u-nanao ngei ta pakka tulpi ae akha chu ashul Khristen ngeita hella ahra lungrang shukpi no weh.

¹³Chuna ejonga abak pot na ka-u-kanao kolla pakka tul pi lea chu keina ameh phao etikkom bakkang nonge ka-u-kanao pakka tul no ranga.