Read Chothe Naga 2 KORENTHIYA 1 Bible Online

2 KORENTHIYA 1 - Chothe Naga bible

2 KORENTHIYA 1

¹Chungthieng ahal akha chu ulea nao Timothi kolhai thou wa Khrista Jisu ahal rui. Pol na Korenthiya ah am Chungthieng akok sha mee ngei hana Akaiya ah am Chungthieng mee limta

²pathieng ani Chungthieng akha chu Arengpu Jisu Khrista na lungshi adai pek chang shu ah.

³Anina Chungthieng akha chu arengpu Jisu Khrista ta ariem ma dom mei oh. Ringrei thei Pathieng sha ae makol hai thou wa eheilim hi ani ta san na sha ae.

⁴Amo na ani aol ana lim hi sanpi ae chuna jarra ani na kom aol ana eja lim ta san nea ah ae. Chungthieng kolla ani pha santhei naha na jarra.

⁵Khrista kolla aol ana sharuk ani ron ha na chu hekta. Chungthieng santhei na hi Khrista kolla hai thou wa ani na ron ha nea ae.

⁶Ejonga ani na aol ana pha lea chu nahana nangta sanpi ange akha chu aring kaeto phao. Ejonga ani na san pi lea nangta kom sanpi ange hana jaitha kom hap pi-ange hana aol ana pha jui ja dong nea rang jaitha kom pha ange.

⁷Chuna sharukka ani lungrang hi ephou linga nea ang no weh anina danga am chu aol ana hina sharuk ron ha lea chu, nang na kom ani hi mee na santhei hi pha tol ae.

⁸Uleanao ngei oh, kani na nangei ta angei thei pi num munge. Asia ram shunga ani aol ana dong lim hi. Hina taranga aol ana kanidang lim hi hal jui ja ringa am mange ti phao lungrang am ni jo weh.

⁹Kani hal chu athi tina kani ta hella thing so weh na lim hi kani hina jar no weh, athi hai thou ringa thou Chungthieng amo chak na ae sha ae.

¹⁰Chuna hahekti atri pi athi ang phao amo na anita sanpi ae akha chu amo na anita sanpi ange hana woi ha kom amo na sanpi ang songe.

¹¹Prathana ae weta kani ta sanpi na chu hek ta kani taranga nie ah am na hi Chungthieng na sangpi ange hana kanita jaihra pe pi ange kani hina sharukka mee eja na ariem ma sanrol shukka dom mange.

¹²Shimlei hina ani lunghal ahra kari juija kani hi leima chouthukkunge. Ani am lungshit hlak hi Chungthieng amo na shilung thienga akha chu routhup roukoi am no pekpi taranga nahi alei ram ma malmashi ngei athei asing ano sha ae.

¹³Kani jiekka hla rou hi nangei na pat nea rang akha chu halla shuk nea ranga sha ae. Chu phao shunga nangei dang chu atan ehak sha ae chuna kahal chu nangei na ripta hal thei ti hi di inge chu lea chu ani arengpu Jisu rungnie tungni ah kani sharukka nangei na kom chou thukkange kani na nangei sharukka chuthuk hekta.

¹⁵Nangei kolla masha ah phao ange ta keina halla hou phur inge woini tran jaihra nangei pha ranga.

¹⁶Rouram chu Mesedoniya kalampi thing lam ma, hana ka lea juija kom Judiah ka thing rang sha rukka nangei kolla sanpi rang kom la num minge.

¹⁷Chuna hijeng kaden sha lim hi angir am no hekta kari pi jui am ma meh? Anolea najongpa lim ha kataranga chak mal jou meh? Keihina oh weh karil sha chu hato ngirra ka-am ngai nonge kati chu ngai no wa ka-am na jarra.

¹⁸Chungthieng amo chu adiek rou ha chak ril shou chu kei na saro ai ah am minge oh weh kati sha chu ngai nong ti nonge.

¹⁹Kei katak mak Silase hana Timothi na Chungthieng a sanao pa Khrista Jisu hina rou ril lim pa hi ngainum lea ngainum no ani mak taranga no ae. Amo chu ngai num ma chak am sha ae.

²⁰Chuna sharukka Chungthieng amo chu ma saro ei sha chu hata ling no am mang sha ae. Hina sharukka Jisu Khrista hina jarra “Amen” Chungthieng ahung ajai chang shu oh.

²¹Ani ringchang hi Khrista hitta rachun ha so weh ti diekka sempi takpi hi Chungthieng matak mak sha ae.

²²Anita mitpu changpi shu chak no wa muihla athieng kom ani lung shunga pe pi weta ani taranga amo na wat no wa ham ma shi pi ae.

²³Korenthiya ah thing ang nong ka ngir ka lung rang hi, kalung dang nea Chungthieng amo ta kei na kok kinge adiek dang ranga.

²⁴Kani na nangei ngoiring na mitpa chang tikkae ta ae nonge. Kani na dang unge nangei na ngoiring chetta am hi kani chu nangei ariem na karra riem tol num ma unge.