Read Chothe Naga 2 KORENTHIYA 3 Bible Online

2 KORENTHIYA 3 - Chothe Naga bible

2 KORENTHIYA 3

¹Ani na ani tak makta dom ma am ma meh? Ano lea nangei ta hal anolea nangei taranga atujong akha na ae pi ti hi kani taranga atung am ma meh?

²Kani lungshunga atu jongpa na jieksha meelim pa na danga patta am kani abai hi nangei na ae.

³Na hi Khrista matak mak na thienga kanita jiekka hla sha so weh, mukka anolea alung chunga no ae aring Chungthieng muihla na malmashi lungshunga jieksha sho ae.

⁴Na kani ril rou hi Khrista jarra Chungthieng kolla ngoiring am sha rukka ae.

⁵Kani na tullu hi ae nea unge ta ephao wa ril shuk rang lung shunga am nonge Chungthieng kol hai thou jung kani nea te hi.

⁶Athar roungir hina tun hlou kani ron nea hi amo mapek chak sha ae naha chu jieksha roukung ha no sha ae muihla sha ae jiek sha roukung na athi ronna pha oh ae chuti weta muihla na chu aring ringchang pe ae.

⁷Roukung ha chu alung chunga jiekka shi ah, apek juija chu Chungthieng ahung ajai na mel mu pi ae chuna sharukka Israel mee ngei na Moses mai hatta mun na an kom nea no ae mani mitna. Ejonga roukunga athi ronna phao hal kom jaitha shukka wak jui ja chu ahung ajai chang na nei ae.

⁸Muihla hina tullu na eja matikka lok tek meh!

⁹Aring kaetto ron na phao ahung ajai tullu hana ae namtha ah shi nea ahung ajai hana hella thing.

¹⁰Rouram chu mang ang am ha lea ahung ajai hitta apha chang honna am ha lea chu eja ah mahung majai warrang meh.

¹¹Chuna mahung ajai hana apha atan te am the shong lea chu eja ah ahung ajai na warra atreem nei no ae.

¹²Rouram chu ani na na lungrang hi na taranga, ani na atri am no ae.

¹³Manga ngai ade awar Moses maisuon ha Israel sanao ngei na ri no rang hlum ma shi Moses jong pa no ae kani chu.

¹⁴Chuna mani shilung hirra shi ah awoni phao mani na ari sha meelung ngir ha chak pa ah am songe rouram chu Khrista jarra wurra shi pun ha hong so weh ti takpi no songe.

¹⁵Awoni kom ejonga mani na Moses pek trongshan ha pa lea chu mani shilung ha pun hana hlum ma shi ae.

¹⁶Chutiweta jieksha rouna rillea, Moses ril phur ha la ah hou ngai ae, “Amo na Arengpu kolla mai hai lea jui ja ahlum pun ha.”

¹⁷Atun chu, “Arengpu hi chu muihla ae; chuna Arengpu muihla na am na changhon, amunt ha atit rang am no ae.”

¹⁸Ani lim hi Arengpu hina ahung ajai na awar am pi so hlum ma shi no amai sum hana. Arengpu kolmai thou phao muihla na anita hlong pi so weh mamel hekta mang tek ti mahung majai hana apha chang honna.