Read Chothe Naga 2 KORENTHIYA 4 Bible Online

2 KORENTHIYA 4 - Chothe Naga bible

2 KORENTHIYA 4

¹Chungthieng lungshit na ani ta tullu hi ae rang pe sha weh chuna ani na hina taranga thadol rang am no ae.

²Ani na athup akha ajakpi tullu eja hi nakolla shi anga ae. Ani na Chungthieng marou ha ta diek no wa akha chu mee nam ma ae no weh Chungthieng kolla awar lea adiek hitta ringa am ma ani tak lim na ahra wakhal hal rang hot na ah am meh.

³Chuna, ejonga kani ahra tronglam rouril hi theipi no lea amang sha ngei taranga chu thei ang no weh.

⁴Mani na ngoiring nea no weh, rouram chu mani shilung ha hra no hlawang na athim thui ah shi ah. Amo na manita hata pak tullu lu pi ah awar ri pi no wa shi ae. Chungthieng mel mak Khrista hina mahung majai ahra tronglam awar jung hata ri no weh.

⁵Chuna nahi kani na no weh rourilla am hi. Kani rouril chu Khrista Jisu hi arengpu ae ti ah sha ae Jisu majarra kani hi nangei shuk kunge.

⁶Chungthieng amo na ril, “Athem thui hai thou wa awar hana war ange!” awar hata same amo mak hana kani shilung ta war pi ha Chungthieng ano ta mel dangpi rang lungsin pe ah Khrista mai ah mahung majai ha ri pi ae.

⁷Chuna arat jaitha lim hi ani tarang no lutta Chungthieng matarang sharukka alei ah shak bella ani anei adon shi ah sha ae.

⁸Kanita amunt changhonna nam ma shi pi ae chuti hal kom noi chu noi no weh.

⁹Anda mee na shihakti ae ehuti hal kom tonpi kam wat pi no ae. Akha chu ehekta aol ana pe ae chuti hakom tui pi chu am no ae.

¹⁰Apha changhonna Jisu hina athi sha pum ha ta kani na ronna rollenge chulea chu mani na maringchang hata kani pum hai thou ri ung shu oh.

¹¹Kani ringchang limma Jisu taranga khudong chu thi ah ngei kani ringchang hina Jisu ringchang hi ri ranga.

¹²Hina ril na chu, na athi tullu hi kani tarang sha ae, hana ringchang hina tullu chu nangei tarang sha ae.

¹³Jieksha rouna rillea, “Ka ngoiring jarra kei na ril shuk kinge.” ngoiring nga ngei muihla akha chakka. Kani na ngoiring sharukka rou hi kani na ril shuk kunge.

¹⁴Jisu ta ringthou pi Chungthieng amo ta kani na dang unge hana Jisu hitta kani ta kom ringthou pi weh ta ma am na ah nangei hitta am ha ange.

¹⁵Na lim pa hi nangei pha rang chakkae hana malungshit hi mee ngei chunga hella, hella tung juija chu mee ngei na Chungthieng ahung ajai hata ariem ma hella dam na chang shu oh.

¹⁶Hina tarang sharukka kani na nulea ti am nonge kani pum na olla wa hal kom, kani muihla na chu naha, naha rat na change.

¹⁷Chuna na apha aten te kani ol hina kani ta angakpi ah atreem nei no jaihra pha ange aol hata hella ol tek shai tek.

¹⁸Kani den na shi chu mitta ri ah no ae chuti weta mitta ri no ha ta ae, na ha chu atreem na apha pha jui ja chak ri pha ange, hana atreem na apha pha juija chu etikom na ha ri pha ang ni jo weh.