Read Chothe Naga 2 KORENTHIYA 5 Bible Online

2 KORENTHIYA 5 - Chothe Naga bible

2 KORENTHIYA 5

¹Chuna pun na shak inn hekti akha chu alei ah shak inn hina tui juija chu kutta shaklou Chungthieng ta atreem neina thangwan ram ma inn akha am meh ta dange.

²Hana wanram ma ani am rang amunt ha hakjou no wa sholla am munge nalei shunga.

³Ha chu pun shenga am hal kom pun sheng no hekta am mange.

⁴Rouram chu ani na pun hek ti inn na am lei ah ani na lung olla am meh.

⁵Na ani ta ahlongpi hi Chungthieng amo na thourang ae pi sha ae. Hana amo na ani taranga hamma shi hana taranga ma muihla ha ani ta pe pi ae.

⁶Chuna anina apha changhonna danga am meh. Ha chu echan shotta anina inn na pum am na am lei lim chu Arengpu am na hai thou wa loa ah am meh.

⁷Ani na na hi mitta ri ano sha ae ngoiring jarra sha ae.

⁸Ani na hella di ae ani inn hai thou wa pum na hla ah hou phur weta Arengpu inn na apha chang honna am ha num unge.

⁹Eheilim ta hella kani na inna am hal hana am hal malungshit hata hella di unge.

¹⁰Ani lim pa hi routreem taranga Khrista maikunga ngir ange chuna meelim pa na ma tullu nu juija pha ange, ejonga ahra tullu lu mo ano lea hrano tullu lu mo ti ha.

¹¹Arengpu ta aty ti hina rou wa ani dang sha so weh chuna ani na mee ngei ta kom hlemma am meh. Chungthieng na anita eheilimpa dang sha so weh. Hana keina kom hallinge nangei lungshunga keita hrabakta dange ta.

¹²Kani na kani takta nangei maikung woiha lea ah dom ma nonge chuti weta shilung shunga no lutta awao wa alok sha ngei taranga nangei na dangpi ranga. Nangei lok ranga kani hina rou wa dangpi ah unge.

¹³Chuna shilung adanga kani na halla am hal Chungthieng kolla chu, hana shilung thienga kani hal hi nangei tarang sha ae.

¹⁴Rouram chu Khrista malungshit na anita huppa shi sho ae rouram chu kani na hitta hal lunge ha chu, mee akha na meelim taranga akha na thi pi so weh chuna meelim hi thi tol sho weh.

¹⁵Amo na meelim taranga thi pi sho weh chuna sharukka ringa am manita ranga ring no shu oh. Hana thi weta ringthou masharuk taranga hang shu oh.

¹⁶Ani na atu akha ta an weta routreem ae no shu oh atun hai thou wa. Apha akha chu ani na Khrista ta malmashi mit an na ae phur ae, naha ani na ae no jou shu oh.

¹⁷Atu jong akha an Khrista hitta am ha lea chu amo ha meethar so weh; ari ha thing so weh, athar ha phao so weh.

¹⁸Nalim pa hi Chungthieng na ae chak sha ae. Khrista majarra ani na anda mee hai thou wa tonpi chang pi akha chu ani ta pek chu mee adang ngei kom matonpi changpi anga ae.

¹⁹Ani rourillang chu Chungthieng na Khrista majarra malmashi lim pa hi matonpi changpi sho weh Chungthieng na ani ae pak hi atan te phao shi no weh. Hana amo na ani hi alo ta matonpi changpi meh ti ha rilla am meh.

²⁰Hina Khrista hutta kani na rou rilla am munge Chungthieng matak mak na kom ani kol hai thou wa ni ah am meh. Chungthieng na nakol hai thou wa anda mee hai thou wa tonpi wulpi shu oh.

²¹Khrista hi pak am no ae chutihal kom ani sharukka Chungthieng na ani pak sharuk ja tol pi ah amo hitta rachun ha ah Chungthieng adiek ani kom pha tol pi ae.