Read Chothe Naga 2 KORENTHIYA 7 Bible Online

2 KORENTHIYA 7 - Chothe Naga bible

2 KORENTHIYA 7

¹Kalungshit chim lea rol ngei oh nalim pa hi ani taranga saro ei sha sho weh, chuna sharukka eheilimpa ah ani na anitak makhi thienga shi ei oh. Muihla akha chu pum hi. Hana ani ring hi Chungthieng kolla thienga shi ei oh.

²Nangei lung ha kani taranga shi pi oh, kani na atu akha ta lal nonge; kani na atu akh ta kom amang ata shuk pi nonge atu akha kolla kom tan cha lak ranga hot na nonge.

³Na karil rou hi nangei ta neinunt pe ah nonge. Amatienga karil chu hekta nangei na kani ta lungshi ah ap ha chang honna ringhal thi hal am ha sharukka ril singe.

⁴Kei na nangei hi sui ang no ae ta halla am minge nangei sharukka kei hi leima lokka am minge kani ae anat eheilim ma kei chu thanum thathou wa am minge. Kei hi ariem na shi hak ti inge.

⁵Mesedoniya ah kani tung shu wai tak phao kani na sol ha no songe. Amunt chang honna aol ana shi hakti ae akha lea akha trong jet hlakka kani lung shunga ehekta ati unge.

⁶Chutiweta Chungthieng amo na kani lung kui sha ta thanum thathou pi ae, Taitas phao na kom kani ta hella thathou pi ae.

⁷Maphao na chakka kani ariem na ah no weh nangei na alo ta amta thanum thathou pi meh ti rou kom kani kolla rilna kom ariem munge maril na chu nangei na alo ta makhai kei ta ri num ma am meh ti kom ril pi ae hana nangei lung ol na, hana kataranga nangei lung olpi chuna tarang sharukka atun kam lei ma ariem minge.

⁸Ka jiekka kahla karou hina nangei lung olpi hal kom hana taranga keina ephao nulea nonge, kei na pel no hal kom nangei ta apha atan ta taranga lung ol pi range ta kei na ri pha inge.

⁹Atun kom kei chu ariem minge nangei ta lung ol pi sharukka no ae. Chutiweta nangei lung ol na jarra nangei na ahlong pha na chang ha, na ajak nangei tukha Chungthieng sem sha ae, chuna kanina nangei kolla ephao amang atah shukpino ae.

¹⁰Chuna sharukka Chungthieng na pak nangei ajak tuk hana nangei lung hlong na nei ah samla ringchang tuk na change. Chuna taranga ephao pel no rang am no ae. Chutiweta, ajak tuk ringchang na chu malmashi ta athi ha pha pi ae.

¹¹Anno Chungthieng na nangei taranga na ajak tullu lu ah meh, eja shilung thienga nangei taranga sem pi ah meh, nangei maral am no ae ti ha dangpi na so weh, hana hajong lungsha, hajang tung hal, hajong naniek hajong dieklou ta dandi pek ranga nadit, nalim pa hana nang natak mak na eheilima aral am no weh ta ri pi ae.

¹²Chuna kei na nangei ta jiekka hla phur hal kom aral ae mee amo taranga no weh hana aral lung halla am mee taranga kom ah no weh chuti weta kani akha chu nangei taranga Chungthieng mit ta dang ranga kei na jiek shu sange.

¹³Chuna tarang sharukka kani na nangei ta thanum thathou pi ah unge. Hana taranga chak kani na thanum nonge Taitas na kom kani ta ano na leima ariem pi ae nangei na amota eheilim lampi ah shanpi ah ariem tul shukpi ha!

¹⁴Chuna ejonga kei na nangei jarra makolla kalokna nei inge keina ephao ajak tuk kang nonge hana eheilim ma adiek rou ril chu hekta Taitas maikunga kalok na ha kom adiek chang so weh.

¹⁵Hana malungshit na hi hella nangai rat na change. Amo na mak thei no wa am na chu alo ta nangei na maril matrong jui ranga thou rang ae mo ti ha, hana nangei na amota atri ajakka hakka am mo ti ha.

¹⁶Eja ah kei na ariem ma meh. Chuna sharukka keina nangei kolla eheilimpa beija am minge.