Read Chothe Naga 2 KORENTHIYA 8 Bible Online

2 KORENTHIYA 8 - Chothe Naga bible

2 KORENTHIYA 8

¹Uleanao ngei oh Chungthieng lungshit jarra Mosedoniya ram ma alo tullu lu mo ti ha kani na nangei ta dangpi num munge.

²Mani na ehekta aol ana dong nga thinge chuti halkom mani na ehekta ariem meh ha chu mani shilung lokka pek thei na hi, mani na eja sara ringrei hal kom.

³Kei na nangei ta chap cha ah rilla am minge mani pek thei hi mani na eja phao pe nea moti ha pe ae, hana ta hella kom mani na mani halla hata pe nea ae.

⁴Mani na kani kolla rillea ha chu Jehudi ah Chungthieng mee ngei taranga kani na sang rang apha te pe pi oh ta.

⁵Na lim pa hi kani hal ta lella sho weh, masha oh chu mani na mani takka arengpu kolla pe mee sha ae. Hana nutienga Chungthieng dit nu juija mani pa mani tak ha kani ta kom pe sho weh.

⁶Chuna na tullu thou pi Taitas kolla nie ah am minge matullu hi chan no ranga akha chu hija lungshi ahra tullu hi ae shu ranga.

⁷Nangei hi leima chonge nangei don lim ma, ngoiringa, rourilla akha chu hakjou no wa san num ma nangei lunghalla kani ta lungshi hi. Chuna sharukka kani na di unge na lungshi tullu hi kom shilung lokka, ae rang.

⁸Keina thingrang hangrang lam shemma shi ah nonge, chutichu mee adangei na eja ah san num ma am ma meh ta ril pi num ma singe. Hana, keina natakta diekka lungshi meh ti ha dang num minge.

⁹Nangei na areng Jisu Khrista ocha ah lungshi mee dang ange. Amatienga machong mareng, nangeita achong areng changpi rang sharukka amo matak mak na sara nouring change.

¹⁰Kahal ka lung rang chu nakum ma nangei thou phur tullu ha shu pi pa na hella hratekkange. Nangei na tullu chak no lu tullu ha kam nangei na masha ae hana ae num ha kom nangei ae.

¹¹Chuna tarang sharukka tullu ha kom shu pi jou oh! Nangei hal nu juija tullu shu rang kom hak jou no wa ae oh. Hana atun na hal nujui ja na am hana ae jou oh.

¹²Nangei na hakjou no wa Chungthieng kolla napek pot ha amena la pi ange na am no pot ha no ae.

¹³Nangei ta pot rit ronpi weta adang ahre ta na kei na shol ha rang ae na ingei nangei na atun apha chu laima tam ma am sou chu, dorkar am ngei ta nangei na san nang hi lei ma ahra tullu sha ae. Hana mani na kom atam am hom jui ja nangei darkar san nange chulea chu nangei akha lea akha cham mana ah san hlakkange.

¹⁵Jieksha rou na ril chu hekta, “Atam ma homma shi pa na atam am no hek ta, akha chu atom te shi pa na kom atom te am no ha jong pa ae.”

¹⁶Keina Chungthieng ta dom minge nangei ta kahal hekta Taitas lung shenga kom mahal pi sharukka!

¹⁷Kani hlem hi amo na ariem ma ngei pi chak no wa, amo matak mak na kom nangei am na thing num ma malung ngir taranga kom.

¹⁸Amo hitta mun ha ah abom lim pana hra marouril thei na sha rukka ehekta ajak ati, shak aton pi hla inge.

¹⁹Hana chakno wa, Areng mahung majai lungshi tullu hi ron na kani hitta thing ha rang abom ngei na halla angei pek mee ae. Kani na nangei ta san num meh ti kom dang ranga.

²⁰Apam am no lutta nangei pek ha kani tullu lu juija mee na jet no ranga ae.

²¹Kani hal chu Chungthieng ningtienga chak ahra ano lutta mal mashi ningtienga kom ahra taranga sha ae.

²²Chuna tarang sharukka kani ulea nou ha nangei am na hla unge. Amo ta kani na leima chang an sho weh lei ma tamma hana amo hi nangei ta leima san num ma am meh. Hana amo hi atun chu nangei ta leima tam ngoiringe. Hana amohi nangei ta san rang hakjou no wa am meh.

²³Taitas chu kei hitta tullu ron ha katon pi ae nangei tullu san ranga. Hana adang ton pi ngei chu abom ngei ahut shilla khrista ahung ajai ron na phao rang kani hitta thing ha unge.

²⁴Manita nalungshit ha ri pi oh, chulea chu abom limpa na na sharukka kani lokka am hi sui no wa dang ange.