Read Chothe Naga GALATIYA 1 Bible Online

GALATIYA 1 - Chothe Naga bible

GALATIYA 1

¹Ahalsa rui Pol mee na hla ko ano, mee na shukpiko ano, chuti weta athi hei thou ah ringthou Arengpu Jisu Khrista akha chu mapa Chungthiengna kei itta amha athieng insung limna Galatiya ah am akoksha meelimta ariem tronglam lan unge.

³Ani Pa Chungthieng akha chu Arengpu Jisu Khrista na nangei limta adai pek changsu oh.

⁴Anita atun riya hrano meerul hei thou wa sanpirang Khristana ani Pa Chungthieng ahal anu jui ah matakmak ani pak tarang pepiso-ae.

⁵Chungthiengha atreem naino wa loktek seitek su oh. Amen.

⁶Keina nangeita ngak ing ae, tichu Khrista mayarra nangeita kokpipa amota hla houweta adang ahra rou nu yuihi.

⁷Routakka chu ahra rou adangti am no ae. Chutiweta mee ahre na nangeita lunglong piweta Khrista ahra rou hita ngainum norang ae ah ameh.

⁸Kani nohal awantinga ruina halko kani chupiphur ahra rou alou chupi lea chu amoha sarmei hurra aol pha su oh.

⁹Kanina amatingko nangeita rilsong ae, atunko keina woiha lea rilla amsir-ing ae; atuyongna nangei ngeisa ano ah adang ahra rou suilechu amoha sarmei hura aol dongsu oh.

¹⁰Meengeina hra ae ta rilranga keina nahi rila meh? Ah no lea mee ngeina ayatrangchak ae ah am ma meh? Ano sa ae! Keina hita ae ah amlea chu kei Khrista rui ah ni ange.

¹¹Keina riltikke Ulenao ngei oh, ahra rou nangei kolla kasuihi mee kolhei thou wa shuk ano ae.

¹²Mee kolla hei thou wa kapha kom ano ae, atu akha na kom keita chupi ano ae. Hilim hi Jisu Khrista matakmakna keita ripi sa ae.

¹³Keina Jihudi darmo ah ratta ka am lei ha nangei nako dangha sa ae. Keina karat mahei choishukka Chungthieng akoksha meengeita ringrei lungsi dangno wa aol ana phapi ing ae.

¹⁴Keina Jihudi darmo akha chu kapa kapu ngei thingphur aephur limhi keina apha hana karul ngei karsunga keina aluching chang inge, tullu ae tek ing ae.

¹⁵Chutiweta Chungthiengna malungsit yarra matullu aerang keita donmating hei thou wa halpi so ae. Mahal anu jui ah keina Jihudi lou adang yat ngei kolla mahra rou hi suiranga masanao paha keita ripi so ae.

¹⁶Atu malmasi akha ninga ko trong choh thieng nong ae.

¹⁷Keina Jerusalem ma thingweta kamatinga ahalsa rui ngei ninga ko trong lathing nong ae, keina anatta Arabia ah thingweta Damaska tieng lea ing ae.

¹⁸Kum thum nutinga Jerusalem ma Pitar kolla rou dangranga amo itta hapta ani phur ing ae.

¹⁹Arengpu Jisu anaopa Jacob ano ah ahalsa rui atu akha ko tukhlak nong ae.

²⁰Chungthieng maikunga karil hi ae, keina kamur thei ah rilla ah nong ae.

²¹Hina nutinga chu keina Siriya akha chu Siliki ramsunga thingphur ing ae.

²²Apha hana leiya Judia a akoksha ngeina kamel dangno ae,

²³Meengei na rilchak, manina thei ae, “Mee hina amtinga anita aol ana peweta ani ngoiring yunna houpinum ha atunchu amona suiya am ae,”

²⁴chuna mani na kayara Chungthiengta lokpi seipi ae.