Read Chothe Naga GALATIYA 2 Bible Online

GALATIYA 2 - Chothe Naga bible

GALATIYA 2

¹Kum asom inli nutinga keina leya Barnabas akha chu Taitas ko ruiya Jerusalem ma thing ing ae.

²Keina Kathinghi Chungthieng na ril; anu jui ah thing ing ae. Alu ching mee ahre kolla keina adang jat ngei ninga ahra rou kasui ha manita dangpi ing ae. Amating hal atun hal ka ae tulluhi keina arimsalla ae tichu changnum nong ae.

³Katonpi Taitas amohi Grik ahalko amota asartan oh ta rilnonge.

⁴Mee ahrena chu ae pi num ae, maramchu manina ngoiring tonpingei hekta hungthei saweta trongru cholla kani kara tolweta Jisu Khrista kolla amweta pha ariemha chanpiweta manina kanita kor chang ranga ae.

⁵Chutiweta ahra rou hi kani kolla lingno lutta amranga manita apha atante phao penong ae.

⁶Chuna hana am aluching ha keina chu mani ta aluching chingno tihi iko lelhlak pinong ae, Chungthieng na mee mel anweta routreem no ae akha chu mani katarang iko aepi nea no ae.

⁷Akhatienga Chungthieng-na keita adang chat ngei ta ahra rou suirang tullu pe ae tihi manina ripha ae, Pitar ta Jihudi ngei kolla ahra rou suirang tullu pe ae.

⁸Maramchu Chungthieng marat hana Jihudi lou chat ngei taranga keita ahal rui changpi so ae akha chu Pitar ta Jihudi ngei tarang ahal rui changpi ae.

⁹Hana alu ching ae ta am Pitar, Jacob akha chu Johon na keihi Chungthieng na hi ma tullu lu ranga peso weta dangpha jui ah manina atun chu ani akha rukta tullu lu ha tonpiso ae ta, dangna changa ariem ma Barnabas kanuita riemtuk pi ae, Barnabas lea kanui na adang chat ngei kolla akha chu manina Jihudi ngei kolla tullu lu sei oh ta ngaihlak song ae.

¹⁰Sara amno neno ngeita sanpi ti ka aenum mak maninako ae ei oh ta rille.

¹¹Antiyok ka Pitarna wak ah keina amota mee ngei maikunga ran ing ae, maram chu amo hi thienga lalle.

¹²Jacob na hla mee ngeina amunt hana tungmating, Pitar na adang jat ulenao ngei hitta bakha ennha ah am ae, meengei na hana tungyui ah Pitar na ma am na hei thou wa adang jat ngei itta bakha ah eenha ah am no hekta sonna lea ae, asartan no ngeita atit yarra.

¹³Jihudi ulenao ahreko Pitar hungthei sa hekta ae ae, Barnabas ko naha riweta alung longtalle.

¹⁴Manina ahra rou hi diekka thingnoha kariyui ah Pitarta manilim maikunga rilling ae, “Nangchu Jihudi akha che ae, chuti weta adang chat ngei hekta am che ae, Jihudi ngei hek tino che ae, hatilechu nangna adang chat ngeita Jihudi hekta ngai nea ang cha meh?”

¹⁵Routak ka anihi adonhei thou wa Jihudi sa ae, “Pakchel gentel” ngei ha ani chu ano sa ae.

¹⁶Anina dangpha ne-ae tichu Jisu Khrista ta ngoiring hana yarra Chungthieng hitta munha ampi ah adiek changpi ae, etika ko rouphun ril anu jui ah tullu lu hana ano sa ae, anita adiek so ae ta Chungthieng na lakpiranga Jisu Khrista ta ngoiring ung ae. Maramchu atu akhatako tullu lu weta adiek akha so-ae ta lano ae.

¹⁷Chutilechu anina Khrista hitta diekka am harang ae jui ah anihi yaisi gentel ngei hekti ae halea chu Khrista hi pakchel ngei rui ayo meh” eko ano ae!

¹⁸Keina therra kahousa rouphun ha keina woiha leya sathou sirle kei hi yaisi ing ae ti hi muhsang ae.

¹⁹Rouphun hina maram ma thukka hal lea chu Kei, hi athi sa sang ae. Rouphun mak hana keita thatsa so ae. Chutile chu Chungthieng hitta ringha ranga Khrista hitta Khros chunga thiha sang ae.

²⁰Chuna keina karinghi kei ah no ae Khristana kasunga ringa am ae. Atun ringa am karing changhi, Chungthieng ma sanaopata ngoiring yarra ringa am ing ae, amona keita lungsi ae akha chu maring changha kataranga pepi so ae.

²¹Keina Chungthieng lungsit yarhi yunna hounong ae, chuti weta eyongpa atuyong akhana rouphun hana yarra Chungthieng itta adiek ha lea chu Khristana thit hi arimsal so ae.