Read Chothe Naga GALATIYA 3 Bible Online

GALATIYA 3 - Chothe Naga bible

GALATIYA 3

¹Lungmoh Galatiya ngei oh nangeita atuna lungmoh pi ah meh? Nangei maikung takka Khrista na Khros chunga thit ha!

²Rillou oh nangeina rouphun tullu ae weta Chungthieng muihla pha chou mo ano lea ahra rou thei weta ngoiring pha chou meh?

³Alo wa haya ah lungmoh ah chou! Chungthieng muihla thou weta nangei rat na shupi ang yo chou meh?

⁴Nangeina aol ana haya mahei dongweta eko ano ah arimsalla changpi ang yo chou?

⁵Nangeina rouphun tullu ae sarukka Chungthiengna muihla pea nangei sunga anealah tullu ae chou mo ano lea ahra rou theiweta ngoiring sarukka mo ae?

⁶Abraham ae phurha halla ann oh, athieng abai na hita rille, “Amona Chungthiengta ngoiring ae chuna amota Chungthieng adiek mee ae ta lapiso ae.”

⁷Nangeina dang jou oh, ngoiring lim Abraham sanao ngei sa ae.

⁸Athieng abai sunga hita jiek phur ae, ngoiring jara gental limko amo itta adiek changpi ang ae hina sarukka athieng abai na Abrahamta ahra rou dangpi phur ae, “Nangei jara Chungthieng-na malmasi limtako yaihra pe ang ae.”

⁹Abraham na ngoiringa yaihra pha ae, chuna ngoiring lim hako amo hekta yaihra pha ang ae.

¹⁰Rouphun na ril tullu ae weta aring pha aeta halla am lim sarkou tukkae. Maramchu athieng abai na rille, “Atu yongmeena rouphun abai sunga jiekka silim jui no lea chu amoha Chungthieng sarkou tukka am ae.”

¹¹Chuna rouphun yarra atu akha nako Chungthieng kolla adiek chang nea no ae. Maramchu athieng abai na rille, “Ngoiring yarhana Chungthieng kolla adiek mee changa ring pha ang ae.”

¹²Ngoiring ah no achu rouphun hana eko ae nea no ae. Chuna sarukka athieng abai sunga rille, “Rouphun hana rillim yuine mee hana aring pha ang ae.”

¹³Ani chunga rouphuna phapi ang sarkou ha Khristana ani tarang phapi so ae, maramchu hita jiekka houphur so ae, “Khros chunga thi mee amoha sarkou tukkae.”

¹⁴Anina ngoiring yarra Chungthieng muihla pharang akha chu Abraham phaphur yaihra ha gental ngeiko pharanga Khristana thipi ae.

¹⁵Ulenao ngei oh, Keina meelim ngeina dangpa ranga rillinge ae, atuyong mee ani na ngaihlak ha atu akha nako kuipi akha chu ha chunga alolko ngai ang no ae.

¹⁶Chungthiengna saro ei ah Abraham akha chu matu mate ngeita rilha meelimta ril ano ae, matu mate tichu Khrista ta rilla sa ae.

¹⁷Hina karil maram chu Chungthiengna Abraham hitta saro ei ah ngaihlakha akum riyali somthum nutingphao akui atreem am no ae.

¹⁸Maram chu Chungthieng kutthul hi rouphun yarra ah no ae, Abraham hitta saro ei hlak yarra ae. Chuna Chungthieng na saro ei hana yarra makut thulha Abraham ta pephur ae.

¹⁹Chutile rouphun chu iye ranga sa? Saro ei ah semphur Abraham sanao (tute) hana phaomalim diekno tulluha muranga akha chu. Marui ngei hitta mee akhana tullu ae athing harang wanrui ngei kutta pekhla rouphun sa ae.

²⁰Chutiweta meering akha chakna thingha ae tiha ril ngai no ae; Chungthieng chu akha chak ae.

²¹Chuti lea chu rouphun hina Chungthieng saro ei hita ngaihlak no ah meh? Hako ano ae. Mee ngeina rouphun yuiweta aring ringchang tuk lea chu, meelim pana naha yuiweta Chungthieng hitta adiek changta so ae.

²²Chuna sarukka abai hana rille, simlei limhi pak jaitha thui ah am so ae, hina sarukka ngoiring limta Chungthiengna saro ei ah Khrista ta ngoiring ranga pephur pi so ae.

²³Chuna ngoiring ang apha ha phamatinga rouphun na anita hunga siphur ae.

²⁴Anina Chungthieng hitta diekka ngoiring jarra am ha rang Khrista tungma ah rouphun na ani chunga am phur ae.

²⁵Atunchu ngoiring rang apha haso ae, routhun na anita sotta runga amrang ah niyo ae.

²⁶Khrista hitta amha weta ngoiring yarra nangeilim Chungthieng sanaopa changso chou ae.

²⁷Khrista hitta baptias ae sa nangei limna pun dir seng hekta Khrista ta sengso chou ae.

²⁸Chuna Jihudi ti, gental ti, mee suuk, mee suukno akha chu apa namei ti teihlakna amniyo ae.

²⁹Nangei na Khrista mee alea chu Abraham sanao ngeiha changso ae, Chungthieng saro eiha nangeiko pha ang ae.