Read Chothe Naga GALATIYA 4 Bible Online

GALATIYA 4 - Chothe Naga bible

GALATIYA 4

¹Keina woiha leya rilsir tikke asanao akhana mapa kolla phaphung shuklim pha-ang halko amona unga changlei chu-amota iko no, shuk hekta halle.

²Amona alin asai shukka mapana pekphung shuklim peyo tikketa rilmalim atuyong meena naorui naokaiya hang ae.

³Chuhekta aniko muihla tinga arat shuk mating chu aleiram ma am muihla ngeina choi ah runga am ae.

⁴Chutiweta acha apha ha phayui ah chu Chungthieng na asanao pata hlapi ah namei wonsung ah wonchoiya Jihudi ngei rouphuna ringphur ae.

⁵Rouphun thui ah am ngeita hlok ranga akha chu anita ma sanaopa changranga ae.

⁶Masanao ngei ae ti dang ranga Chungthieng na ani lungsung a muihla pepi ah apa “kapa” ta kok ae.

⁷Chuna nang mee suuk ani yo ae asanaopa akha ah soche ae. Asanaopa akha ah sou chu Chungthieng na ma amlim ha asanao ngeita pepi ange.

⁸Amatinga nangei na Chungthieng ta dangphur no ae, chuna hlawang ngei suuk chang phur chau ae.

⁹Atunchu Chungthieng ta dangso chou ae-Chungthieng nako nangeita dangso ae. Hitiweta hoi alota nangeina hrano muihla tinga nule chou meh? Nangeina alowa leya mani suuk changsir num chou meh?

¹⁰Nangeina ahra rungni, kum hla, mapha akha chu ahra kumta lahlak chou ae.

¹¹Keina nangei tarang olling ae, nangei kolla ka tullu lu hi eko ano chang ang yo meh?

¹²Keina nangeita niya am ing ae kau kanao ngei oh, kei hekti you oh; kei ko nangei hekti sing ae.

¹³Nangeina kakolla diekno iko ae no chou ae, keina katak hoino sarukka nangeita ahra tongsan masa ah suiphur singe.

¹⁴Chuphao sung keita yunna hou no lutta nangeina wantinga ruihekta akha chu Khrista Jisu hekta keita ngaiphur chou ae.

¹⁵Nangeina haya a ariem phur ha atun chu elo ah yo meh? Nangei mitphao lasuk weta keita pene ang ae ta kei katak makna rilphur ing ae.

¹⁶Atun chu nangeita adiek rou karil sarukka kei hi nangei anda mee changa yo meh?

¹⁷Atuyong anda mee ngeina nangei lea keita ahran rang lungsi hungthei sa ah am ae.

¹⁸Arhapa maram ma lungsi hlak chu hra ae; keina nangei hitta amha leichak lungsi ah diekka am anga no sa ae.

¹⁹Kalungsit sanao ngei oh Khrista maring changha nangei sunga am malim chu kei katakka namei na wonchoi angtinga nat hekta ana dong ing ae.

²⁰Keina atunhi nangei hitta amha nelechu nangei kolla adang adang rouko rilnum ing ae. Maram chu keina nangei tarang olling ae.

²¹Nangei kolla atuyong na rouphun an am num lea chu keina riltik ae: rouphun hita ril ha thei no chou meh?

²²Hita ril ae, Abraham na asanao apa ani donphur ae, akhana suuk namei na don ae, akhana anamei takna donae.

²³Suuk namei don sapaha meedon mangai ah don ae, chuti weta anamei takna don sapa hachu Chungthieng na saro ei anu jui ah don sa ae.

²⁴Hi hina anina achurang lam ani shukka am ae, Namei ani tihi rou ngirhlak ani ha sa ae.

²⁵Suuk changrang unga don manu ha Hagar sa ae, amona Sinai mulla roungir hlak hut sa ae, atunna am Jerusalem akha chu suuk changa am mamee hi Arabia ah am mul Sinai hi Hagar ae ta dangna nei ae.

²⁶Chutiweta wan ramting ah Jirusalem chu ani nu ae amochu atu thui ah ko am no ae.

²⁷Maram chu Athieng abai na rille, “Ariem ou oh ungasal namei oh! Ariem ah ao oh, unga don angting aol dongno nang! Maram chu apisal na rhanhou namei hana sanaona apisal am namei na don sanaota lellang ae.”

²⁸Atu chu uleanao ngei chu Chungthieng na saro ei ah don Isak hekta Chungthieng sanao chou ae.

²⁹Apha hanalei thou ah atunphao a mee ngei don hek don amona Chungthieng muihla yarra don akhata aol ana phapi ah am ae.

³⁰Chutiweta athieng abai sung ah alota rilla si meh? Hita rille, suuk namei hale asanaopa hata yulla hou oh, maramchu suuknamei sanao amona mapa kolla phaphung limha ahal namei don sanao hitta pha ha ngai no ae.

³¹Chuna sarukka ulenao ngei oh anichu suuk namei hana sanao ah no sa ae ahal namei hana sanao ae.