Read Chothe Naga GALATIYA 6 Bible Online

GALATIYA 6 - Chothe Naga bible

GALATIYA 6

¹Ka-u-kanao ngei oh, atu jong akhana pak ah tulle chu amo hitta pak ae ha no rang muihla phasa nangeina hra bakta adiek lamting ah ruile oh.

²Akhale kha arit pot ronha au oh hita ae lea chu Khrista tongsan ha nangeina jui chou ae.

³Maram chu eko changlou mee na kei emo akha si ang ae ta hal lea chu amoha mathei chak ah hungthei ae mee ae.

⁴Limpana ma ae ma ae tullu hana ah no ah chu mee ae tullu hana ma lokrang eko am no ae.

⁵Maram chu meelim pana mata mata aritpot ha ron ang ae.

⁶Ahra rou dangsa amona, amota chupi pa itta ahralim samha ang ae.

⁷Natak nathei chaka hungthei no oh; atunako Chungthieng ta lungmoh pinea ang no ae. Maram chu ma ae ma ae ha amona pha sir ang ae.

⁸Nangna napum tarang wor lea chu pumna amangha pha ang ae, chuti weta muihla tinga wor lea chu muihla tinga samla ringchang ha pha ang ae.

⁹Chuna sarukka anina ahra tullu aelei ah olno ei oh. Anina channo lutta ae ah am lea chu acha apha ah ahom rang apha ha pha ang ae.

¹⁰Chuna ae ang apha amlei ah anina meelimta ahra ha ae ei oh; ani itta ngoiringha inn sungeita lella ae ei oh.

¹¹Kakut makna jiek rolla nangeita kajiek ah hla ing ae.

¹²Nangeita asartanno hrano ae ta hata ae ah am ngeita manita Khrista khross marama aol pha norang akha chu manina manitheichak lokrang ae ah sa ae.

¹³Asartan mani phao ah rouphun rilha yuinea no ae. Mani rilha jui talea chu manina maniril jui so ae ta mani lokrang ae ah sa ae.

¹⁴Khrista Khross ah no ah chu keichu kalokrang eko am no ae, khross yarra hina aleiram ah thiphursing ae.

¹⁵Asartan hina eko ah no sa ae athar kutsem chang hana sa ae.

¹⁶Na karil hi maring changa yuimi amoha machunga akha chu Chungthieng inn sunglim chung ah adai, yaihra pek chang su oh.

¹⁷Atreem na chang ah karil numchu atunako keita aol ana pepi no su oh, maram chu Khrista rui ae tihi muh rang ah kataka mol meh aming ae.

¹⁸Kau kanao ngei oh Jisu Khrista ringrei ngaipi ha nangeilim chunga am su oh. Amen.